Kapyegèle 4 - Cebaara Bible 2010

Pyɛri ní Zyan yérigeli kútiijoo-gbooli yɛ́ʔɛ ma

¹ Lǎli ni Pyɛri ní Zyan da ni nyuu ní syɛ́ɛnbèle ní lè, a sáriga-wòlobèle, ní kpɔ̀ʔɔrɔli kpaʔa gáridibéle kafɔlɔ, ní Sadusebèle pan.

² Pe fúnyi maa tɔ̀nɔ n tanʔa Pyɛri ye kurugo n sɔ̀lɔ, àmɛɛ be syɛ́ɛnbèle tama lè, ní i kúbèle nyán-yirile syɛ́ɛnrɛ nyuu ni fíligi Zyezu kéeli na lè.

³ A be be cò n le kàsow ni n yaʔa yaà ni nyǐndaligi sige, níì cán cángi maa kwɔ́ɔ.

⁴ Koro ní ki myɛ ní bele pe da be syɛ́ɛnri lóʔo lè, a poro pèle saʔa tága, a pe myɛ bìnɛw baa pye nànbēle selebingéle siin ní saala kagunɔ félege.

⁵ Koro nyǐndaligi na a Zyefubèle kùndigibéle ní wolɛɛbèle, ní làlwaw sɛ́bɛwelebéle peyɛɛ gbóʔoro Zyerusalɛmi ma,

⁶ n fàra Ana na wi lè sáriga-wòlobèle kàfɔgbɔɔɔ, ní Kayifu, ní Zyan, ní Alɛkisandiri, ní sáriga-wòlobèle kàfɔgbɔɔɔ senyɛnzanbèlē myɛ ní.

⁷ A be Pyɛri ní Zyan yérige peyɛɛ níngi ni, níì be yíbe níì jo: «Fàngìí félege ní yele gee bee kpéʔele, ba wìí mɛ́ʔɛ na yele gi kpéʔele?»

⁸ Lǎli bee ni àmɛɛ Pyɛri fúngi da nyìn lè Pìicǎnni na, a wi be yari: «Yele Isirayɛli ye kùndigibèle ní yele bele ye nyɛ lè wolɛɛbèle,

⁹ kacǎnni li kpéʔele lè yáaw na, kapye yele i wolo yíbe níjanʔa lee bee kéele na àmɛɛ wi pye lè níì pɔʔɔ,

¹⁰ ki n yɛlɛ yele myɛ, ní Isirayɛli ye syɛ́ɛnbèle myɛ í gi cán bi cán Zyezu Kirisi wi lè Nazarɛti ye wów, woro wee yele da kóri lè tiiparigi na, á Kolocɔlɔɔ wi nyán n yirige kúbèle nínge ni lè, woro mɛ́ɛgi na nǎnw naa pɔʔɔ, wi lè wee woyéreo ní yele yɛ́ʔɛ ma.

¹¹ Zyezuw bee wi nyɛ ‹Kàdɛnɛgi, gee gi lè yele kpaafaanbèle da ni gi córo yafyɛn í, koro ki baa pye kpáagi jɛ̀ɛ́nnɛ kadɛnɛzelige.›

¹² Syɔɔli a tée taa wàa nikwɔɔ ni woro kàdoʔo ma í. Níì cán Kolocɔlɔɔ ga níì mɛ́ɛgaa nikwɔɔ kaan syɛ́ɛnbèle ma dulunyanbo gee na wo yɛlɛ bi syɔɔ lè í.»

¹³ A pe ga Pyɛri ní Zyan nyaa a be soro n yére ni nyuu nya, níì gi cán pe ga Kolocɔlɔɔ làlwaw tamana kpéʔele í, ní i nyɛ sɛ́bɛnaa-sìnjanbéle, a be i káama gi na. Pe maa gi cán, ncan pe n pye ní Zyezu ní.

¹⁴ Nǎnwee wi pɔʔɔ lè, a pe ga wee bee nyaa be taana woyéreo ní, pe ga gbàn n níì yafyɛn taa bi joo í.

¹⁵ A be be pye be yiri Sanedirɛnw nínge ni, koro kàdoʔo ma a be i nyuu ní peyɛɛ ní kéeli bee na níì jo:

¹⁶ «Nyàʔá wolo a kpéʔele nǎnbèle naa na? Níì cán Zyerusalɛmi syɛ́ɛnbèle myɛ n gi cán poro be kakpɔɔgi naa kpéʔele, wolo si a gbǎn gi kábala í.

¹⁷ Kàjáa ki n yɛlɛ wo gi joo wo gbàn be ma wó be pye pe a ní kɔ́ ra nyuu syɔɔnwaa faala ma mɛ́ɛgi bee na í, koro ga pye kéeli naa í kɔ́ cariga syɛ́ɛnbèle nínge ni bi léeli yaà í.»

¹⁸ Lǎli bee ni a be be yeri, ní baa gi joo n gbàn be ma níì jo, pe a ní kɔ́ ra nyuu Zyezu mɛ́ɛgi na wàlá bàā syɛ́ɛnbèle tama wi mɛ́ɛgi na nyáana í.

¹⁹ A Pyɛri ní Zyan si be yari: «Kapye ki n sín Kolocɔlɔɔ ma wolo í da yele syɛ́ɛnri lúro koro ga jáa Kolocɔlɔɔ wóri, ki n yɛlɛ ye gi tímana ye wéle.

²⁰ Kàjáa gee wolo lóʔo lè ní gee wolo nyaa lè, wolo a tɔ́ɔ gbǎn gi yaʔa sìnjoo ni í.»

²¹ A be níì gi joo n gbàn n sɔ̀lɔ be ma, ní náà be yaʔa a be i syée, syɛ́ɛnbèle maa gi kaan pe ga kanmaa taa bi be wɔʔɔ í. Níì cán syɛ́ɛnbèle myɛ maa ni Kolocɔlɔɔ kpɔ̀ʔɔrɔ́ kéeli bee na li da kpéʔele lè.

²² Níì cán nǎnwee na bìngaara pɔʔɔli bee da kpéʔele lè, wi yɛ́ɛgèle maa nɛʔɛ n sɔ̀lɔ togoye siin na.

Tágafɔbèle nyɛ́ɛrigɛ

²³ Pe yaʔali kàdoʔo ma a be kári be tágafɔnyɛnbèle ma, gee myɛ sáriga-wòlobèle kàfɔɔlɔ ní wolɛɛbèle joo poro ma lè, a be sáà gee bee joo n tɛ̀ɛn be na.

²⁴ Amɛɛ be gi lóʔo lè, a pe myɛ pínɛ n nyɛ́ɛri Kolocɔlɔɔ ma ní fungo nibin ní níì jo: «Kàfɔgbɔɔw, mɔ wee wi nyɛ lè nyɛ̀ʔɛni, ní tári, ní sólomi lòkpɔʔɔ, ní di fúnyi yárira myɛ faanfɔlɔ,

²⁵ mɔ wi da syɛ́ɛnri naa lége wolo tóow Davidi nyɔ́ɔgi ni, wee wi da pye lè mɔ falipyew, a wi di joo Pìicǎnni báriga ni níì jo: ‹Nyàʔá na syɛɛnfeleyi jángi? Ba nyàʔá na syɛ́ɛnbèle nyùngo fun sɔ̀nguri sɔ̀ngí?

²⁶ Tári fànʔafɔɔlɔ n yìri, A kùndigibèle wɔ́ɔ̀ peyɛɛ gbóʔoro Kàfɔw ní wi Kirisiw kánma na.›

²⁷ Níì cán kányɛʔɛ ni Herodi, ní Pɔnsi Pilati, ní syɛɛnfeleyaa, ní Isirayɛli ye syɛɛnfeleyi maa kpóʔoro kěgi naa ni mɔ falipyecǎnw kánma na wi lè Zyezu, woro wee mɔ nyɛ́nɛ n wòlo lè wi pye Kirisi,

²⁸ koro ga pye, gee mɔ da téè kɔ̀rirɔ n tímana lè n yɛlɛ ní mɔ fangi, ní mɔ nyɛ́nɛ kéeli ní níì jo ki ba kpéʔele lè, pe gee bee kpéʔele foro.

²⁹ Kàfɔw, mi gi wéle àmɛɛ be gi joo n gbàn wolo ma lè tɔ́ɔliw ni, koro na wolo wo nyɛ lè mɔ falipyebèle, mi nànzorodi myɛ kaan wolo ma wolo í gbǎn ra mɔ syɛ́ɛnri nyuu,

³⁰ mí mɔ kɔ́gi sánʔa koro ga pye yáabèle í da poori, fɛ̀ɛ́bèle, ní kakpoloyi sáā kpéʔele mɔ falipyecǎnw mɛ́ʔɛ na wi lè Zyezu.»

³¹ A pe ga nyɛ́ɛri n kwɔ́ɔ, tɛ́ɛgee ni pe da peyɛɛ gbóʔoro lè, a tɛ́ɛgi bee cúngo. A pe myɛ fúnyo nyìn Pìicǎnni na, a be fala ni Kolocɔlɔɔ syɛ́ɛnri nyuu ní nànzorodo ní.

Tágafɔbèle i be kɔlɔ̀ yáriri lee peyɛɛ na

³² Syɛ́ɛnmi pi da tága lè, pi myɛ maa pye fungo nibin na, ní pìle nibin ni. Pe wàa faala da ni woro kɔ́lɔ yáriri córo woro nibin wóro í, níì cán pe maa be yáriri myɛ pye fòrobáa.

³³ Pìitunbèle maa ni Kàfɔw Zyezu nyán-yirili séera kpéʔele ní fàngbɔʔɔ ní. A Kolocɔlɔɔ dùbakpɔɔw pye pe myɛ na.

³⁴ Pe wàa faala ga fɔ̀n yarigaa ni í. Níì cán bele má séyi ní kpáayi pye lè, pe maa ni yi pára ní i yi lɔ́ri lée ni syée

³⁵ n sa ni kaangi pìitunbèle ma, a be i di lee pe myɛ nibin nibin na ni yɛlɛgi ní be màkonyɔɔri ní.

³⁶ Nànwaa maa pye yaà pe i wi yiri Zyozɛfu, pìitunbèle si i wi yiri Barinabasi, ki kɔ́rɔw wi nyɛ kɛɛlɛli pyà, wi maa pye Levii ye wówaa, táree ni si be wi see lè pe i di yiri Syipiri.

³⁷ Seʔe maa pye wi ma, a wi gi pára níì gi lɔ́ri láa n sáà kaan pìitunbèle ma.