Kapyegèle 3 - Cebaara Bible 2010

Syɛɛnmɔngɔɔ n pɔʔɔ

¹ Cangaa Pyɛri ní Zyan maa ni syée kpɔ̀ʔɔrɔli kpaʔa ma cangàrigi na, lǎli bee maa pye Zyefubèle làrinyɛɛrilaa Kolocɔlɔɔ ma.

² Pèle si maa ni maa ní nànwaa ní wee be see lè womɔngɔɔ ní, n ba ni téeri kpɔ̀ʔɔrɔli kpaʔa kpàánweelaa nyɔ́ɔ na canʔa o canʔa, lee be yiri lè kpàánweejǎnni koro ga pye waa wáliw nyɛ́ɛri kpɔ̀ʔɔrɔli kpaʔa jéefɔɔlɔ ma.

³ A wi ga Pyɛri ní Zyan nyaa pe i jǐn yaà, a wi be nyɛ́ɛri jàngó be wáli kaan woro ma.

⁴ A Pyɛri ní Zyan be nyapiigèle le wi ni, a Pyɛri kɔ́ɔ̀ wi pye: «Da wolo wéle.»

⁵ A wi i be wéle ní i sɔ̀ngí pe a yarigaa kaan woro ma.

⁶ A Pyɛri wi pye: «Wálifiio ní tɛɛ̀ o nyɛ mii ma í. Kàjáa gee gi nyɛ mii ma lè, koro mii a kaan mɔ ma.» Níì wi pye: «Yìri maa táanri Zyezu Kirisi mɛ́ɛgi na wi lè Nazarɛti ye wów!»

⁷ Níì wi cò kàliige kɔ́gi na n yìrige. A wi yédefabiyi ní tɔzogugèle fala n fànʔa taa terire n nìri.

⁸ A wi fala n ye n yìri n yére ní i táanri, níì jée ní be ní kpɔ̀ʔɔrɔli kpaʔa ni n sa ni táanri, ní i yegi, ní i Kolocɔlɔɔ kpɔ̀ʔɔrɔ́.

⁹ A syɛ́ɛnbèle myɛ wi nyaa wi i táanri ní i Kolocɔlɔɔ kpɔ̀ʔɔrɔ́.

¹⁰ A be wi wéle n cán ncan nǎnwee wi da ni tɛ̀ɛ́n lè kpɔ̀ʔɔrɔli kpaʔa Kpàánweejànna nyɔ́ɔ na ni wáliw nyɛ́ɛri lè, woro wii, gee gi kpéʔele wi na lè, a gi be fúnyi wɔ́ɔ, a be i káama gi na.

Pyɛri syɛɛnjóori kpɔ̀ʔɔrɔli kpaʔa ni

¹¹ Amɛɛ wi da tan Pyɛri ní Zyan na lè, a syɛ́ɛnbèle myɛ i káama gi na, níì pínɛ ni fé ni syée be ma kpáali ma be yiri lè Salomɔn kpáali.

¹² A Pyɛri ga gee bee nyaa, a wi syɛ́ɛnbèle pye: «Yele Isirayɛli ye nyàʔá na yele káama kéeli naa na? Ba nyàʔá na yele wolo wéle mɔ a jo wolo bɛɛ wo nǎnw naa yìrige wi i táanri ní wolo tiimaa fǎngi ní, koro ga jáa àmɛɛ wolo fɛ̀ɛgí Kolocɔlɔɔ na lè, koro bárigaw ni wi yìri ni táanri?

¹³ Abirahami, ní Izaaki, ní Zyakɔbi Kolocɔlɔw wi lè wolo tóolɛɛbèle Kolocɔlɔɔ, woro wi nìjangbɔɔri taʔa wi falipyew Zyezu na, wee yele da le wi nigoobèle kɔ́yɔ ni lè, ní wɔ́ɔ̀ wi cée Pilati yɛ́ʔɛ ma, lǎli ni wi da joo wi a wi yaʔa waa syée lè.

¹⁴ Yele maa wi cée, woro wee wi lè Wojanw, ní wɔ́ɔ i nyɛ Wozinw, níì màʔâ syɛɛnkpóō nyɛ́ɛri níì jo pe woro kaan yele ma.

¹⁵ Yele n sìíw Kàfɔlɔ kpóo, kàjáa Kolocɔlɔɔ n wi nyán n yirige kúbèle nínge ni. Wolo i nyɛ gee bee séerabéle.

¹⁶ Woro mɛ́ɛgi gi fànʔa kaan nǎnw naa ma wee yele nyaa lè ní wɔ́ɔ̀ wi cán. Koro n kpéʔele tágali báriga ni wi mɛ́ɛgi na, níì cán tágali li nyɛ wo ma lè Zyezu na, loro li wi pɔʔɔ yele myɛ nyɛ́nɛ na.

¹⁷ Ni senyɛ̀nnɛ, mii si n gi cán yele ní yele kùndigibèle maa gi kpéʔele kateemɛ na.

¹⁸ Kàjáa gee Kolocɔlɔɔ da téè joo lè booma ni kanyaajoobèle myɛ nyɔ́ɔyɔ ni níì jo woro Kirisiw a ba wɔʔɔ bi kùu lè, koro gi baa foro nya.

¹⁹ Koro na gi yɛlɛ ye kàdoʔo wáa yele kapeegèle ma yé kàri Kolocɔlɔɔ ma, koro ga pye wi yele kapeegèle kurugo láʔa,

²⁰ ŋɔ́ndaali làrigēle sáā maa gele Kàfɔw a kaan lè, wí wɔ́ɔ Kirisi tun naa yele ma, woro wee wi da kɔ̀rirɔ n nyɛ́nɛ n wòlo lè yele kéeli na, wi lè Zyezu.

²¹ Ŋàʔanaga gii wi kòro nyɛ̀ʔɛni na fwɔɔ bi taa pe ba yáriri myɛ séli bi sámaga kàvɔn, àmɛɛ Kolocɔlɔɔ da gi le lè wi kanyaajoocǎnbèle nyɔ́ɔyɔ ni booma ni a be gi joo lè.

²² Mowizi maa gi joo níì jo: ‹Kàfɔw wi lè mɔ Kolocɔlɔw wi a kɔ́ ba mii félege kanyaajooo yìrige yele senyɛnnɛgi nínge ni bi kaan yele ma. Wi ga baa yárigee faala joo yele ma lè, ye gi lóʔo wi ma.

²³ Syɔ́ɔnwee faala ga baa pye wi o lúro kanyaajoow bee ma lè í, woro a kwɔ́ɔ bi yirige syɛ́ɛnbèle nínge ni.›

²⁴ Kanyaajoobèle pe da ni nyuu lè nlaa yaà Samyɛli lǎli ni, ní bele ní be pan lè wi kàdoʔo ma, bele bee myɛ maa wɔ́ɔ ni nyuu cányi bee kéele na.

²⁵ Yele i nyɛ kanyaajoobèle pìibēle, ní wɔ́ɔ i nyɛ joogaanni kɔriliibéle, lee Kolocɔlɔɔ da kaan lè wolo tóolɛɛbèle ma lǎli ni wi da gi joo lè Abirahami ma níì jo: ‹Narigbaayi myɛ yi lè tári na, yee bee a ba dùbaw taa mɔ yodaʔagi báriga ni.›

²⁶ Yele má Kolocɔlɔɔ da sélì wi falipyew tun, wee wi da nyɛ́nɛ n wòlo lè, koro ga pye wi ba dùbaw kpéʔele yele ma, si yele myɛ nibin nibin kàriga bi yirige yele kakolobyeri ni.»