Kapyegèle 27 - Cebaara Bible 2010

Pe n Pɔli tórigo Wɔrɔmi ma

¹ Amɛɛ be gi tímana n kwɔ́ɔ lè wolo í jée bàtowaa ni bi kári Italii tári ma lè, a be Pɔli ní kàsolebèle pèle pínɛ n kaan fànʔafɔgbɔɔw sùlasiibéle dabata kàrigafɔwaa ma pe i wi yiri Zyulusi.

² A wolo jée Adiramiti bàtowaa ni, wee wi sɔ́lɔgi ni sɔ̀lɔ́ lè Azii tári kàgomɔ na ni syée, Arisitaki si maa pye ní wolo ní, wi i nyɛ Maseduwani tári wówaa, níì yìri Tesaloniki ma.

³ Ki nyǐndaligi na a wolo nan Siidɔn na. A Zyulusi kacànna kpéʔele Pɔli na nɛɛ bee, níì cán wi maa fɔ̀lɔ n wi yaʔa a wi kári wi tàannyɛnbèle ma, koro ga pye pe sa wi dɛ̀ɛmɛ.

⁴ Koro kàdoʔo ma a wolo yiri nɛɛ bee ni Syipiri tári sɔ́lɔgi n di yaʔa wolo ní káfalagi nínge ni, níì cán káfalagi maa ni wolo fàrá.

⁵ A wolo Silisii ní Panfilii sɔ́lɔgɔ n sáà nan Miira na ki lè Lisii ni.

⁶ A sùlasiibèle kàrigafɔlɔ Alɛkisandirikaʔa ye bàtowaa nyaa yaà, wee wi syée lè Italii ma, a wi wolo lége wee bee ni.

⁷ A wolo lǒgi tánʔana kpéʔele yɛrirɛ canya saʔa ni n ŋàʔana n sáà nan Kiniidi zǐnmi na. Tánʔani bee si maa tɔ̀nɔ n gbàn, àmɛɛ káfalagi da ni wolo yéregi lè wolo a ní gbǎn kári yɛʔɛ̀ ma zǐnmi bee na í, a wolo i syée Salimone zǐnmi na n Kirɛti tári yaʔa wolo ní káfalagi nínge ni.

⁸ Kirɛti tári taana sɔ̀lɔlɔ si maa gbàn wolo ma n sɔ̀lɔ, a wolo sáà nan tɛɛgaa na pe i gi yiri Bàtobèle Tɛɛ̀yérejànga, gee taana Laze kěgi pye lè.

⁹ Amɛɛ làla saʔa sɔ̀lɔ lè, a lǒgi tánʔana kòro ní fyáara ní, níì cán súnle-lali maa sɔ̀lɔ n kwɔ́ɔ gee bee na Pɔli da be sàmi

¹⁰ níì jo: «Syɛ̀ɛnnɛ, mii n gi nyaa lǒgi naa tánʔana a pye ní wɔʔɔlɔ, ní kálagigbɔɔlɔ ní, bàtow ní wi fúngi túgoro yagana si ban ti a kálagi í, fwɔɔ wolo tiimaa a wɔ́ɔ pínɛ kálagi wi ni.»

¹¹ Kàjáa a sùlasiibèle kàrigafɔlɔ bàtow fɔ́lɔ ní wi fànvɔw syɛ́ɛnrɛ lóʔo n sɔ̀lɔ Pɔli wóri na.

¹² Tɛ́ɛgi bee da nyɔɔ bàtow í gbǎn yére yaà bi taa wéeri làla í sɔ̀lɔ í, a be saamaw jo be yiri nɛɛ bee pe ŋàʔana be nan Fenikisi na pe sa wéeri làla kwɔ́ɔ nɛɛ bee, ncan tɛ́ɛgi bee i nyɛ bàtobèle tɛɛ̀yéregaa Kirɛti tári ni. Ki i nyɛ canʔajeemɛ ma.

Káfalakpɔɔgi yìrile kéele sólomi lɔ̀ʔɔ ǹjoʔo ni

¹³ Amɛɛ káfalagi da yìri lè canʔa parima ma wòrogulo kàbangi na ni funu yɛrirɛ, a be i gi sɔ̀ngí ki a kpéʔele poro nyɛ́nɛ pyele na, a be bàto-yérige-tunmɔjinigi yirige lǒgi ni n lége bàtow ni, níì fala ni Kirɛti tári sɔ́lɔgi ni syée, ní i sɔ̀ngí poro a kɔ́ léeli di na í.

¹⁴ Kàjáa a cɛɛri ga pye a káfalakpɔʔɔ yìri tári bee ma, pe i káfalagi bee yiri Urakilɔn.

¹⁵ A gi i bàtow fíigi ni máari, wolo fánʔa ga taa káfalagi na í, a wolo tɔ̀ʔɔ́ ján n woyɛɛ yaʔa gi ma.

¹⁶ A wolo sa ni lǒgi nínge tápiipiilaa sɔ́lɔgi n li yaʔa wolo ní káfalagi nínge ni, pe i li yiri Koda, a wolo gbàn n kɔ́rɔw pwɔɔ n lége bàtow ni, kàjáa wi pwɔɔganmi maa tɔ̀nɔ n gbàn.

¹⁷ A wo ga wi yìrige n lége n kwɔ́ɔ, a be yapwɔɔyi láa n bàtow pwɔɔ jàngó wi a kɔ́ jaa í. Amɛɛ pe da wɔ́ɔ ni fɛ̀ɛgí lè níì jo, ki ga yɛlɛ bàtow í kɔ́ tìgí tɛ́ɛn Siriti tɛ́ɛgi lɔ̀ʔɔ táminyɔɔ na í, a be fànikpɔɔgi kùru n láʔa bàtow na níì wi yaʔa káfalagi kɔ́yɔ ni.

¹⁸ Cángi bee nyǐndaliga na a be bàtow túgoraa yirige n wáa lǒgi ni, àmɛɛ káfalagi dígi wo ni n caanri lè,

¹⁹ a canya taanri ga kwɔ́ɔ, a be níì bàtofan-yáriri yirige ní be tiimaa kɔ́yi ní n wáa lǒgi ni.

²⁰ Canya saʔa maa tɔ̀nɔ n kwɔ́ɔ, canʔa ga nyaa í, ŋɔripiigèlē ga wɔ́ɔ̀ nyaa í, á káfalakpɔɔgi kòro ni funu ni syée nya, a wolo pìígèle yiri wolo ni fyáari báriga ni, a wolo jo wolo a ní gbǎn syɔɔ í.

²¹ Ki si maa tɔ̀nɔ n kɔ́ɔ̀ mɔn wolo ga lìi í. Lǎli bee ni a Pɔli yìri n yére pe níngi ni níì jo: «Syɛ̀ɛnnɛ, àmɛɛ mii da yele pye lè wo kòro Kirɛti ni, yele ga maa yére gi ni, wɔʔɔli naa, ní kálagili naa mǎà dée too wo na í.

²² Kàjáa tɔ́ɔliw ni mii i yele nyɛ́ɛri ye yele sɔ̀ngumi télege, níì cán yele wàa faala nyúngo a pùuni í, fwɔɔ bàtow yagana.

²³ Kolocɔlɔwee wóo mii nyɛ lè, woro wee mii kpɔ̀ʔɔrɔ́ lè, wee bee tundunwaa n pan mii ma yébiligi naa ni

²⁴ n baa mii pye: ‹Pɔli, mɔ a kɔ́ fyáa nyáana í. Ŋàʔanaga gii fwɔɔ mɔ í kári sa yére Sezari yɛ́ʔɛ ma.› Ní níì jo: ‹Wéle, Kolocɔlɔɔ n mɔ kôdanʔanyɛnbèle myɛ kaan mɔ ma.›

²⁵ Gee bee na, syɛ̀ɛnnɛ, ye yele sɔ̀ngumi télege, níì cán mii n tɔ̀nɔ n tága Kolocɔlɔɔ na ncan àmɛɛ wi gi joo mii ma lè, ànbée ki a tɔ̀nɔ́ wɔ́ɔ kpéʔele.

²⁶ Kàjáa ŋàʔanaga gii fwɔɔ wolo í sa too lǒgi nínge táraa kàgomɔ na.»

²⁷ Cángi bee gi pye wolo yébiliye kɛɛ ní sicɛrɛ wógi àmɛɛ káfalagi wolo fíigi ni máari lè sólomi lòkpɔʔɔ ni pe yiri lè Adiriyatiki, lǎli ni nyǐngi lɛɛ lè, a bàtow falipyebèlē kɔ́ ni gi sɔ̀ngí wo n nùuni táraa na.

²⁸ A be lǒgi tímana n gi nyaa mɛ́tirinyɛngéle togoye siin félege. A pe ga sɛ̀ʔɛrɛ yɛʔɛ̀ ma cɛɛri, a be níì gi tímana n gi nyaa mɛ́tirinyɛngéle toko ní kpɔrigɔ félege.

²⁹ Lǎli bee ni a be fala ni fɛ̀ɛgí níì jo, dɔ̀ʔɔ́ bàtow a kɔ́ sa círi kàdɛnɛyaa na bi too yoo poro ga cán í. A be bàto-yérige-tunmɔjiniye sicɛrɛ yirige n cáan lǒgi ni bàtow kàdoʔo ma jàngó bi wi yérige, níì kòro ni nyǐngi talima sige ní funvuuyo ní.

³⁰ Bàtow falipyebèlē si maa ni caa bi yiri bàtow ni bi fàn syɔɔ, gee bee na be kɔ́rɔw cáan lǒgi ni níì peyɛɛ bye mɔ a jo poro a bàto-yérige-tunmɔjiniyi yirige bi cáan lǒgi ni bàtow yɛ́ʔɛ ma,

³¹ a Pɔli si sùlasiibèle kàrigafɔlɔ ní sùlasiibèle pye: «Nǎnbèle naa ga pye pe ga kòro naa bàtow ni í, yele a gbǎn syɔɔ í.»

³² Lǎli bee ni a sùlasiibèle sáà kɔ́rɔw mɛ́ɛngéle cɛnɛ níì wi yaʔa a lǒgi wi láa.

³³ Amɛɛ nyǐngi kɔ́ naà tali lè, a Pɔli syɛ́ɛnbèle myɛ nyɛ́ɛri níì jo pe lìi nya, ní níì jo: «Níjanʔa wi nyɛ yele canya kɛɛ ní sicɛrɛ wógi sigeli na yele ga kɔ́ɔ̀ yaliire lìi í.

³⁴ Gee bee na mii i yele nyɛ́ɛri, ye mii pɔʔɔ yé lìi nya, níì cán gee bee a yele syɔ́ɔli kéele wɛ́ʔɛri, àlí yele wàa ǹjookanna a pùuni í.»

³⁵ Syɛ́ɛnri bee joolo kadoʔo ma a wi búru láa níì bariga kaan Kolocɔlɔɔ ma syɛ́ɛnbèle myɛ nyɛ́nɛ na, níì wàa kabagi n séli lìíli na ni líi.

³⁶ A syɛ́ɛnbèle myɛ be sɔ̀ngumi télege, níì soro n wɔ́ɔ̀ lìi.

³⁷ Wolo bele wo da pye lè bàtow ni, wo maa pye syɛ̀ɛnnɛ sirakele ní togoye taanri ní kpɔrigɔ ní kɔrɔni.

³⁸ A pe ga lìi n tín, yaliiree ti da pye lè bàtow túgoro, a be dee bee yirige n wáa lǒgi ni koro ga pye bàtow í faʔa.

Bàtow kálagila

³⁹ Lǎli ni nyǐngi tali lè, pe ga tári bee cán í, kàjáa pe maa pùndɛɛgaa nyaa, táminyɔɔ si i nyɛ ki lógbew na, a be jo poro fánʔa ga taa, poro a bàtow fàn bi wi sígi yérige nɛɛ bee.

⁴⁰ A be bàto-yérige-tunmɔjiniyi sánʔana n yaʔa yi kòro yaà lǒgi ni, ní wɔ́ɔ̀ bàtofan-bìniyi yapwɔɔrɔ sánʔa làrinijanna ni, níì bàtow fànikpɔʔɔ sánʔa n yaʔa káfalagi ma, ní i syée zìnmɛ na lógbew ma.

⁴¹ A be sáà nan táminyɔɔw na lòfarami tɛ́ʔɛ ni. A bàtow yɛ́ʔɛ sígi n yére, a wi kàdogi kabagi lǒgi kùngurupeeye báriga ni.

⁴² Lǎli bee ni a sùlasiibèle fala ni caa bi kàsolebèle myɛ kpóo, koro ga pye pe wàa a kɔ́ fànʔa taa bi lǒgi nyán bi yiri fàn í.

⁴³ Kàjáa àmɛɛ sùlasiibèle kàrigafɔlɔ da ni caa bi Pɔli syɔɔ lè, a wi be nyɛnɛ kéeli sàa, níì gi kpéʔele kánmi naa na. Wi maa jo bele be lònyanmi cán lè bele bee í da tuun lǒgi ni bàā syée tári ma,

⁴⁴ wozanbèle sáā lúru tiigbeleyi na ní bàtokabagiw kàgbeleye na. A be gi kpéʔele kánmi bee na, a pe myɛ taa n sáà nan tári na cerenyinmɛ na tɔ̀nɔgēle.