Kapyegèle 26 - Cebaara Bible 2010

Pɔli n wiyɛɛ kéeli joo n tɛ̀ɛn Agiripa yɛ́ʔɛ ma

¹ A Agiripa Pɔli pye: «Mɔ a gbǎn mɔ tiimaa kéeli joo.» Lǎli bee ni a Pɔli wi kɔ́gi yìrige níì fala n séli ni wiyɛɛ kéeli nyuu níì jo:

² «Fànʔafɔw Agiripa, ki n mii dɛ́nɛ mii í mii kérigèle myɛ joo mɔ yɛ́ʔɛ ma níjanʔa, gele Zyefubèle joo n taʔa mii na lè,

³ àmɛɛ mɔ Zyefubèle kalɛɛgéle ní be kàkabalayi myɛ cán lè, gee bee na mii i mɔ nyɛ́ɛri mi mii pɔʔɔ mí lóʔo mii ma ní kpàracogo ní.

⁴ Nlaa mii yìri lè wojáriɔ ní Zyefubèle myɛ n mii tánʔaganmi cán, níì cán Zyerusalɛmi ni mii lɛɛ mii felegefɔ-nyɛ́nbèle nínge ni.

⁵ Pe n mii cán booma ni. Pe ga maa fɔ̀lɔ, pe mǎà dée gbǎn gi séeraw kpéʔele si jo, mii maa ni wolo Kolocɔlɔw kpɔ̀ʔɔrɔlɔ kólogaa táanri, gee gi gbàn n sɔ̀lɔ lè, koro gi nyɛ Farisi-kólogi.

⁶ Tɔ́ɔliw ni pe i kútiiw kúunri mii na, àmɛɛ mii mii sɔ̀ngumi taʔa lè Kolocɔlɔɔ nyɔɔfaligi na, gee wi da kpéʔele wolo tóolɛɛbèle ma lè.

⁷ Nyɔɔfaligi bee kéele na wolo Zyefubèle féleye kɛɛ ní siin Kolocɔlɔɔ kpɔ̀ʔɔrɔ́ ní be fúnyi myɛ ní canʔa ní yébilige, níì be sɔ̀ngumi taʔa gi na n jo ki a ba foro. Fànʔafɔw, àmɛɛ mii wɔ́ɔ̀ mii sɔ̀ngumi taʔa nyɔɔfaligi bee na lè, gee bee na Zyefubèle kútiiw kúunri mii na.

⁸ Syɛ̀ɛnnɛ! A yele jo lé syɔɔn a tɔ̀ʔɔ́ gbǎn tága gi na bi cán Kolocɔlɔɔ a ba kúbèle nyán í?

⁹ Mii tiimaa maa tɔ̀nɔ ni gi tímana mii fúngi ni n jo, ki n yɛlɛ mii í da kèlē saʔa kpéʔele bàā Zyezu mɛ́ɛgi kálagi, wi lè Nazarɛti ye wów.

¹⁰ Koro si mii da wɔ́ɔ ni kpéʔele Zyerusalɛmi ni, mii maa ni Kolocɔlɔɔ syɛɛncanbèle saʔa nii kàsow ni, àmɛɛ sáriga-wòlobèle kàfɔɔlɔ da fǎngi bee kaan mii ma lè, pe ga ni caa bi wàa kpóo, mii n wɔ́ɔ̀ yére gi ni.

¹¹ Mii maa ni be wɔʔɔ tɔlɔyɔ saʔa Zyefubèle sérikpaaya myɛ ni, ní i be ŋàʔaná paa Zyezu mɛ́ɛgi kálagi. Mii maa tɔ̀nɔ n be para gbanʔama, àlí mii maa sa ni be caa ni wɔʔɔ kèleeliyi ni.

Pɔli i wi tágaganmi kéele nyuu

¹² «Gee bee kánma na mii da ni syée Damasi ma sáriga-wòlobèle kàfɔɔlɔ báriga ni, ní be fǎngi sɛ́bɛ ní.

¹³ Fànʔafɔw, lǎli ni cángi tɛ́ɛn nyùngo ni lè n mii yaʔa kólogi na, a mii gbɛ̀ɛnmɛ nyaa a bi yìri nyɛ̀ʔɛni na n baa too mii ní mii kôdanʔanyɛnbèle na, pi maa ni nyɛ́ʔɛnɛ ní i daragi n sɔ̀lɔ cángi na.

¹⁴ A wolo myɛ too tári na, á mii yákpolo lóʔo a li gi joo mii ma Heburu-syɛ́ɛnri ni níì jo: ‹Sɔli, Sɔli, nyàʔá na mɔ mii wɔʔɔ nya? Ki n gbàn mɔ ma àmɛɛ mɔ tunmɔgaan-fìrigele fologi lè.›

¹⁵ A mii jo: ‹Mɔ wìí wii, Kàfɔw?› A Kàfɔw mii yari: ‹Mii Zyezu wii, wee mɔ wɔʔɔ lè nya.

¹⁶ Koro ní ki myɛ ní yìri mi yére mɔ tɔ́lɔyi na, ncan mii n niyɛɛ dɛ̀ɛn mɔ na koro ga pye bi mɔ kpéʔele mii falipyeo, jàngó mɔ í da mii kérigèle séera kpéʔele gele mɔ nyaa n kwɔ́ɔ lè, ní gele ní mii a kɔ́ ba tɛ̀ɛn mɔ na lè kàdoʔo ma.

¹⁷ Mii a mɔ syɔɔ syɛ́ɛnbèle naa ma, si wɔ́ɔ mɔ syɔɔ syɛɛnfeleyi ma, yee má mii a mɔ tun lè.

¹⁸ Mii a mɔ tun be ma mɔ í sa be nyapiigèle paʔala, koro ga pye pe yiri yébilimi ni bi jée gbɛ̀ɛ́nmi ni, pé wɔ́ɔ kàdoʔo wáa Sutanaw fànʔa ma si kàri Kolocɔlɔɔ ma, koro ga pye wi be kapeegèle kùsulugo syɔɔ, pé wɔ́ɔ pínɛ kɔ́rigi taa ní syɛ́ɛnbèle ní, bele Kolocɔlɔɔ sámaga n yaʔa wiyɛɛ ma lè, àmɛɛ be tága mii na lè.›

Pɔli i wi fáliw kéele nyuu

¹⁹ «Awá, fànʔafɔw Agiripa, mii ga yanyaagi bee cée í, ki lè nyɛ̀ʔɛni wóʔo.

²⁰ Koro na mii da kári Damasi ma gbɛnʔɛnɛ ní Zyerusalɛmi ní, n fàra Zyude tári myɛ na, ní wɔ́ɔ̀ kári syɛɛnfeleyi ma n sa ni syɛ́ɛnri nyuu be ma níì be pye be kàdoʔo wáa be kapeegèle ma, pé kàri Kolocɔlɔɔ ma, páā kérigèle kpéʔele gele ge yɛlɛ ní kàdowaari ní kapeegèle ma lè.

²¹ Gee bee gi gi kaan a Zyefubèle mii cò kpɔ̀ʔɔrɔli kpaʔa ni, ní i caa bi mii kpóo.

²² Kolocɔlɔɔ si i mii syoo àlí n baa nan níjanʔa na, a mii i séeraw kpéʔele syɛ́ɛnbèle myɛ ma, syɛɛn-yilibèle yoo, syɛɛnkpolobèle yoo, mii o tàa faala taari kanyaajoobèle syɛ́ɛnrɛ ní Mowizi wóri na í, dee pe da joo lè níì jo ti a kɔ́ ba foro.

²³ Pe maa jo Kirisi a ba wɔʔɔ bi kùu si nyán yiri kúbèle nínge ni wozeliw, sáā gbɛ̀ɛ́nmi kéele nyuu da tèé wolo syɛ́ɛnbèle ní syɛɛnfeleyi wozanya na.»

Pɔli n Agiripa yeri wi tága

²⁴ N Pɔli yaʔa syɛ́ɛnri bee joolo na wiyɛɛ kéeli na, a Fɛsitusi yákpoli wáa níì jo: «Pɔli, mɔ n cúro! Amɛɛ mɔ sɛ́bɛw tama n caanri lè, gee bee n cúromɔ wáa mɔ na.»

²⁵ A Pɔli si wi yari: «Fɛsitusi, mɔ wee wi nyɛ lè báriga syɔ́ɔn, mii ga cúro wii í. Kányɛʔɛ syɛ́ɛnrɛ mii nyuu, ní wɔ́ɔ i nyuu yákirifɔlɔ jooganma na.

²⁶ Fànʔafɔw Agiripa n kérigèle bee cán, gele bee si mii ní i nyuu wi ma ní nànzorodo ní, mii n tága gi na ncan li làa faala ga làra wi na í, níì cán ke ga kpéʔele làrama ni í.

²⁷ Fànʔafɔw Agiripa, mɔ ga tága kanyaajoobèle syɛ́ɛnrɛ na ì? Mii n gi cán mɔ n tága di na.»

²⁸ A Agiripa Pɔli pye: «Mɔ i sɔ̀ngí cɛɛri na bi mii fúngi kàriga mii í pye Kiretyɛɔn!»

²⁹ A Pɔli wi yari: «Kolocɔlɔɔ í koro kpéʔele, ki ga pye cɛɛri na àmɛɛ mɔ jo lè yoo, a gi náà mɔn yoo, mii o caa gi pye mɔ nibin í, fwɔɔ yele bele myɛ ye mii syɛ́ɛnri lóʔo lè níjanʔa, mii i caa yele í pye àmɛɛ mii nyɛ lè, mii si ga jo wobwɔɔbéle ní í.»

³⁰ A fànʔafɔw, ní guvɛrinɛɛriw, ní Berenisi yìri, n fàra bele na pe da pye lè ní be ní wodɛ́ɛnbéle ní.

³¹ A pe ga yiri kàfugi na, a be i nyuu ní peyɛɛ ní níì jo: «Nǎnw naa ga yafyɛn kpéʔele gee gi yɛlɛ lè ní kùu ní wàlá ní pwɔɔlɔ ní í!»

³² A Agiripa Fɛsitusi pye: «Mɔ mǎà dée gbǎn nǎnw naa yaʔa, kapye wi da jo woro a kári Sezari ma wi sa woro kútiiw kéele cɔɔnri í.»