Kapyegèle 24 - Cebaara Bible 2010

Zyefubèle i sɔ́ɔn Pɔli na

¹ A canya kagunɔ ga kwɔ́ɔ, a sáriga-wòlobèle kàfɔgbɔɔɔ pan, pe i wi yiri Ananyasi, woro ní wolɛɛbèle pèle ní, n fàra nànwaa na wee wi joomi cán lè, pe i wi yiri Tɛrituli. A poro ba ni guvɛrinɛɛriw sɔ́ɔn Pɔli na.

^2-3 Lǎli ni be Pɔli yeri lè, a Tɛrituli gi séli ni kérigèle nyuu ni taari wi na níì jo: «Felikisi, mɔ wee wi lè báriga-syɔ́ɔn, yɛɛ̀nyingbɔɔgi wo taa lè mɔ bárigaw ni, ní kacǎngèle saʔa ní tári naa syɛ̀ɛnnɛ taa lè mɔ kacɔɔnrigèle báriga ni, ki n wolo dɛ́nɛ. Wolo tɔ̀nɔ́ i bariga kaangi mɔ ma kérigèle bee myɛ na tɛ́ɛyi myɛ ni.

⁴ Wolo o caa bi mɔ fɔ̀rɔ ní syɛɛnnɛʔɛrɛ ní í, kàjáa mii i mɔ nyɛ́ɛri mɔ í fɔ̀lɔ mɔ funjǎngi báriga ni si lóʔo wolo ma cɛɛri.

⁵ Wolo n nǎnw naa nyaa àmɛɛ káfalaga yáama nyɛ lè, wi i Zyefubèle myɛ nyúnyo kàragí dulunyanw tɛ́ɛyɛ myɛ ni, ní i nyɛ Nazarɛti ye jànvaa kólogi kùndigi,

⁶ wi si maa ni ŋàʔaná bi Kolocɔlɔɔ kpɔ̀ʔɔrɔli kpaʔa nɔ́nʔɔ. A wolo si wi cò [ní i caa bi kútiiw kúun wi na bi yɛlɛ ní wolo làlwaw ní,

⁷ kàjáa sùlasiibèle kàfɔgbɔɔɔ be yiri lè Lisyasi, a woro pan n baa wi yirige wolo kɔ́yi ni ní wi fànbeegi ní,

⁸ níì wolo pye waa maa naa mɔ ma wo ba kútiiw joo mɔ taana]. Mɔ tiimaa ga wi yíbe, mɔ a gbǎn ki myɛ fílige cán gee na wolo kútiiw kúunri wi na lè.»

⁹ A Zyefubèle wɔ́ɔ̀ yére gi ni níì jo, ànbée gi tɔ̀nɔ n pye.

Pɔli n wiyɛɛ kéeli joo n tɛ̀ɛn Felikisi yɛ́ʔɛ ma

¹⁰ A guvɛrinɛɛriw fɛ̀ɛ pye Pɔli ma níì jo wi wi wóri joo, a Pɔli gi joo wi ma níì jo: «Mii n gi cán nlaa yaà mɔ i nyɛ tári naa syɛ̀ɛnnɛ kútiijooo, ki n kɔ́ɔ̀ yɛ̀ʔɛlɛ saʔa kwɔ́ɔ. Gee bee na mii a mii wóri joo mɔ ma ní fundaanra ní.

¹¹ Mɔ fánʔa i nyɛ bi gbǎn kérigèle naa yíbe bi ge fílige cán, mii maa kári Zyerusalɛmi ma sa Kolocɔlɔɔ kpɔ̀ʔɔrɔ, ki ga kɔ́ɔ̀ sɔ̀lɔ canya kɛɛ ní siin na í.

¹² Wàa si ga mii ní syɔɔnwaa faala nyaa a wo i woyɛɛ gábala kpɔ̀ʔɔrɔli kpaʔa ni í, wàa ga wɔ́ɔ̀ mii nyaa a mii kàfulogo yìrige syɛ́ɛnmi nínge ni Zyefubèle sérikpaagaa ni í, wàlá kěgi fúngo tɛ́ɛgaa faala ni í.

¹³ Kérigèle be joo n taʔa mii na lè tɔ́ɔliw ni, pe fanʔa o nyɛ bi gbǎn ge fílige mɔ ma í.

¹⁴ Mii si n yére kéeli naa ni mɔ yɛ́ʔɛ ma, loro li nyɛ mii i mii tóolɛɛbèle Kolocɔlɔɔ kpɔ̀ʔɔrɔ́ n yɛlɛ ní kólogee ní poro yiri lè jànvaa kólogi. Syɛ́ɛnree di sɛ́bɛ lè Mowizi làlwaw sɛ́bɛ, ní kanyaajoobèle sɛ́bɛ ni, mii n tága dee bee myɛ na.

¹⁵ Mii n mii sɔ̀ngumi taʔa Kolocɔlɔɔ na, ní wɔ́ɔ̀ tága gi na ncan syɛɛnsinbèle ní syɛɛnnaa-sìnzinbèle a nyán yiri, gee poro tiimaa wɔ́ɔ i sige lè.

¹⁶ Koro na mii wɔ́ɔ i ŋàʔaná làrigèle myɛ ni koro ga pye mii fúngi í fílige Kolocɔlɔɔ ní syɛ́ɛnbèle yɛ́ʔɛ ma.

¹⁷ Amɛɛ yɛ̀ʔɛlɛ saʔa kwɔ́ɔ lè mii ga níì kári Zyerusalɛmi ma í, gee bee na mii da kári sa kpɔʔɔrɔ kaan mii tári syɛ̀ɛnnɛ ma, si wɔ́ɔ sáriga wòlo Kolocɔlɔɔ ma.

¹⁸ Koro si mii da ni kpéʔele á be mii nyaa kpɔ̀ʔɔrɔli kpaʔa ni mii jéemununi kàdoʔo ma, syɛ́ɛnmi da pye yaà í, kàfulogo da wɔ́ɔ̀ pye yaà í.

¹⁹ Azii Zyefubèle pèle si maa pye yaà. Kapye poro n mii nyaa a mii keelaa kpéʔele, poro pe da yɛlɛ be pye naa mɔ yɛ́ʔɛ ma bi kútiiw kúun mii na.

²⁰ Kapye koro ban í, poro bele be naa lè, kapye pe maa kapeelaa nyaa mii na lǎli ni mii da yére lè Sanedirɛnw nínge ni, pe lee bee tɛ̀ɛn,

²¹ kapye kéeli naa nibin ban í, loro li nyɛ àmɛɛ mii da yìri n yére lè pe níngi ni níì yákpoli wáa níì jo: ‹Kúbèle nyán-yirile kéele na kútiiw kúunri mii na yele yɛ́ʔɛ ma níjanʔa.› »

²² Amɛɛ Felikisi Zyezu kólogi kéele cán lè cama, a wi be pye: «Yaa syée. Sùlasiibèle kàfɔgbɔɔɔ be yiri lè Lisyasi wi ga pan cángee lè, mii a ba yele kéeli cɔɔnri,»

²³ níì sùlasiibèle dabata kàrigafɔlɔ pye waa Pɔli kɔ̀rɔsíi, wi si a kɔ́ gi gbàn wi na í, ní wɔ́ɔ̀ wi pye, wi wowaa ga ni maa ba yarigaa kpéʔele wi ma, wi a kɔ́ wi yérige í.

Pe n pan ní Pɔli ní Felikisi ní Durusii ma

²⁴ A canya cɛɛri ga kwɔ́ɔ, a Felikisi pan ní wi céw ní pe i wi yiri Durusii, wi maa pye Zyefucewaa. A Felikisi Pɔli yeri n baa tágali syɛ́ɛnrɛ lóʔo wi ma, toro di nyɛ àmɛɛ gi yɛlɛ lè syɔɔn í tága Kirisi Zyezu na.

²⁵ A Pɔli ga ni nyuu sínni kéele na, ní niyɛɛ-cǒmi, ní kútiipeew kéele na wi maa lè, a fyáari Felikisi cò, a wi wi yari: «Da syée gbɛnʔɛnɛ, mii ga kɔ́ɔ̀ làlaa taa, mii a ní mɔ yeri.»

²⁶ Wi sɔ̀ngumi maa wɔ́ɔ̀ pye gi na Pɔli a wáli kaan woro ma. Gee bee na wi da ni wi yiri làrigēle saʔa ni n ba ni nyuu ní wi ní.

²⁷ A yɛ̀ʔɛlɛ siin ga kwɔ́ɔ, a be Pɔrisyusi Fɛsitusi télege Felikisi sìndɛɛgi ni. Amɛɛ Felikisi da ni caa lè bi Zyefubèle kanidaanna kpéʔele, gee bee na wi da Pɔli yaʔa kàsow ni.