Kapyegèle 23 - Cebaara Bible 2010

¹ A Pɔli nyapiigèle le Sanedirɛnw ni ni wéle níì jo: «Ni senyɛ̀nnɛ, mii maa ni mii kérigèle myɛ kpéʔele ní funjànga ní Kolocɔlɔɔ yɛ́ʔɛ ma fwɔɔ n baa nan níjanʔa na.»

² Sáriga-wòlobèle kàfɔgbɔɔɔ pe yiri lè Ananyasi, a woro Pɔli taana wóbèle pye pe wi kpúmɔn nyɔ́ɔgi na.

³ Lǎli bee ni a Pɔli wi yari: «Mɔ gunviigi bee, Kolocɔlɔɔ wi a mɔ kpúmɔn! Mɔ n tɛ́ɛn beè ni mii kútiiw nyuu n yɛlɛ ní Mowizi làlwaw ní, ní kɔ́ɔ̀ jo pe mii kpúmɔn, gee gi lè ki ga yɛlɛ ní làlwaw ní í!»

⁴ A wi taana wóbèle jo: «Kolocɔlɔɔ sáriga-wòlobèle kàfɔgbɔɔɔ si lé mɔ fɔ̀lɔ ni teeri?»

⁵ A Pɔli be pye: «Ni senyɛ̀nnɛ, mii da gi cán ncan woro wi nyɛ sáriga-wòlobèle kàfɔgbɔɔɔ í. Níì cán ki n sɛ́bɛ níì jo: ‹Mɔ a kɔ́ syɛɛnpeere joo bi wáa mɔ tári syɛ̀ɛnnɛ kùndigi na í.› »

⁶ Amɛɛ Pɔli gi cán lè syɛ́ɛnbèle bee pèle i nyɛ Sadusebéle, pèle si i nyɛ Farisibéle, a wi yákpoli wáa Sanedirɛnw nínge ni níì jo: «Ni senyɛ̀nnɛ, mii i nyɛ Farisio, ní wɔ́ɔ i nyɛ Farisibéle jáa. Amɛɛ mii mii sɔ̀ngumi taʔa kúbèle nyán-yirile kéele na lè, koro na kútiiw kúunri mii na.»

⁷ A Pɔli ga syɛ́ɛnri bee joo, a kàkabalagi fala n yìri Farisibèle ní Sadusebèle nínge ni, a koro gi kaan syɛ́ɛnmi sɔ̀ngurɔ ga níì pínɛ í.

⁸ Níì cán Sadusebèle n jo, kúbèle a nyán í, níì jo, tundunbéle o yaà nyɛ̀ʔɛni na í, pìigēle si wɔ́ɔ o nyɛ í, á Farisibèle si tága dee bee myɛ na.

⁹ Lǎli bee ni a kàfulogi fala n kpɔ́ʔɔ be níngi ni. làlwaw sɛ́bɛwelebèle bele be pye lè Farisibèle, a poro pèle yìri n yére níì be kábala níì jo: «Wolo ga kapeelaa faala nyaa nǎnw naa na í. Kapye pìlaa li da joo ní wi ní koro ga jáa nyɛ̀ʔɛni tundunwaa yoo yele ga cán í.»

¹⁰ Amɛɛ kàsiiw kpɔ́ʔɔgi ni maa lè, a sùlasiibèle kàfɔgbɔɔɔ fyáa Pɔli kéeli na ní i sɔ̀ngí pe a kɔ́ wi kíle cɛnɛ, a wi tun sùlasiibèle ma níì jo pe tìgi paa maa pe ba Pɔli yirige syɛ́ɛnbèle nínge ni pe sa wi lége yaà poro tɛɛkòrogi ni.

¹¹ Cángi bee nyǐndaliga yébilige ni a Kàfɔw pan Pɔli ma n baa joo ní wi ní níì jo: «Soro mi yére, níì cán àmɛɛ mɔ mii séeraw kpéʔele lè Zyerusalɛmi ni, ànbée gi yɛlɛ mɔ í wɔ́ɔ wi kpéʔele Wɔrɔmi ni.»

Nyɔɔkuunro Pɔli sìíw kánma na

¹² Lǎli ni nyǐngi tali lè, a Zyefubèle pèle peyɛɛ nyaa n nyɔɔ kúun, níì kàli n jo, poro a ní lìi í, poro a wɔ́ɔ gbaa í bi taa poro í Pɔli taa kpóo.

¹³ Kéeli bee joofɔɔlɔ maa nɛʔɛ n sɔ̀lɔ togoye siin na.

¹⁴ Pe maa kári sáriga-wòlobèle kàfɔɔlɔ ní wolɛɛbèle ma n sáà gi joo be ma níì jo: «Wolo n kàli n le woyɛɛ na níì jo, wolo a yafyɛn lìi í bi taa wolo í Pɔli taa kpóo.

¹⁵ Koro na gi yɛlɛ tɔ́ɔliw ni yele ní Sanedirɛnw í tun yaà sùlasiibèle kàfɔgbɔɔɔ ma ye wi pye wi Pɔli kɔ́ri waa maa ní wi ní yele ma koro ga pye yele í ba wi kéeli sɛʔɛ wéle bi li fílige cán bi sɔ̀lɔ. Níì cán wolo n sámaga n kwɔ́ɔ n yére wi kpóoli na sáni wi nùuni naa lè.»

¹⁶ Pɔli nariw si maa Pɔli sigeli syɛ́ɛnrɛ lóʔo, a wi kári sùlasiibèle tɛɛkòrogo ma n sáà gi joo wi ma.

¹⁷ A Pɔli sùlasiibèle dabata kàrigafɔwaa yeri ní baa wi pye: «Nìgɔcariw naa tórigo yaà yele kàfɔgbɔɔw ma, níì cán wi i caa bi joo ní wi ní.»

¹⁸ A wi wi kɔ́ri n kári kàfɔgbɔɔw ma ní sáà wi yari: «Kàsolew pe yiri lè Pɔli, woro wi mii yeri níì mii pye mii í ba nìgɔcariw naa tórigo naa mɔ ma, yarigaa i wi ma bi joo mɔ ma.»

¹⁹ A kàfɔgbɔɔw nìgɔcariw cò kɔ́gi na n kàri kɔlɔ̀ na ní sáà wi pye: «Nyàʔá mɔ caa bi joo mii ma?»

²⁰ A wi wi yari: «Zyefubèle n bɛ̀ɛ gi na bi ba mɔ pye mɔ í Pɔli tìrige bi tórigo wi sa yére Sanedirɛnw yɛ́ʔɛ ma nyɛ̀ʔɛna, koro ga pye poro í sa wi kéeli sɛʔɛ bi li fílige cán bi sɔ̀lɔ.

²¹ Ki si ga yɛlɛ mɔ í be syɛ́ɛnri lóʔo í, níì cán poro pèle i yaà ni wi sige, pe n nɛʔɛ n sɔ̀lɔ syɛ̀ɛnnɛ togoye siin na, pe n kàli n le peyɛɛ na níì jo, poro a lìi í, poro a wɔ́ɔ gbaa í bi taa poro í Pɔli taa kpóo. Tɔ́ɔliw ni pe n sámaga n kwɔ́ɔ yaà, níì kòro ni líiyi cáan naa mɔ ma.»

²² A kàfɔgbɔɔw nìgɔcariw yaʔa a wi kári níì wi pye: «Mɔ a kɔ́ gi joo syɔɔn faala ma si wi yari, mɔ n kéeli naa joo mii ma í.»

Pe n Pɔli tórigo guvɛrinɛɛriw Felikisi ma

²³ Koro kàdoʔo ma a wi sùlasiibèle dabata kàrigafɔbèle pèle siin yeri n baa be pye: «Ye sa sùlasiibèle pèle sirakele yirige ní syɔɔnyɔ fɔ̀ɔlɔ togoye taanri ní kpɔrigɔ ní, n fàra tàbaabēle fɔɔlɔ sirakele na, yé be pye be peyɛɛ zámaga, làrizinɛni ga nan paa syée Sezarikaʔa ma.

²⁴ Yé wɔ́ɔ ye syɔɔnyaa sámaga Pɔli ma, koro ga pye yele í sa wi tórigo yɛɛ̀nyinge na Felikisi ma, wi lè guvɛrinɛɛriw.»

²⁵ A wi sɛ́bɛwaa sɛ́bɛ n kaan be ma, a wi syɛ́ɛnri jo:

²⁶ «Mii Kulodi Lisyasi n mɔ syáanri Felikisi, mɔ wi lè guvɛrinɛɛri-càndelew.

²⁷ Zyefubèle maa nǎnw naa cò ní i caa bi wi kpóo, lǎli bee ni a mii nan yaà be na ní sùlasiibèle ní n sáà wi syɔɔ be ma, níì cán mii maa gi lóʔo wi i nyɛ Wɔrɔmi ye wɔ́rɔbilaa.

²⁸ Amɛɛ si mii da ni caa bi gi fílige cán gee na Zyefubèle tìgi wi na lè, a mii kári ní wi ní pe Sanedirɛnw ma.

²⁹ A mii sáà gi nyaa pe làlwaw kéele na pe kàkabalagi kpéʔele ní wi ní, koro na be kútiiw kúunri wi na, kàjáa kapeelee li yɛlɛ lè ní kpóolo ní, wàlá ní kàso lele ní, wi ga loro làa faala kpéʔele í.

³⁰ Amɛɛ be gi joo mii ma lè níì jo, syɛ́ɛnbèle pèle n nyɔɔ kúun nǎnw naa na bi too wi na, koro na mii fala n wi tórigo mɔ ma, bele be kútiiw kúunri lè wi na, mii n wɔ́ɔ̀ be pye paa syée mɔ ma pe sa ra kútiiw kúunri wi na mɔ taana.»

³¹ Gee pe da joo sùlasiibèle ma lè, a be gi kpéʔele ànbée, níì Pɔli kɔ́ri ni syée ní wi ní yébiligi ni n sáà nan Antipatirisi na.

³² Ki nyǐndaligi na a be lúru n kári be tɛɛkòrogi ma, níì syɔ́ɔnyi fɔ̀ɔlɔ yaʔa pe i syée ní wi ní.

³³ A syɔ́ɔnyi fɔ̀ɔlɔ ga sáà jée Sezarikaʔa ni, a be fala n sɛ́bɛw kaan guvɛrinɛɛriw ma, ní wɔ́ɔ̀ Pɔli yaʔa yaà wi ma.

³⁴ A guvɛrinɛɛriw sɛ́bɛw wéle níì Pɔli yíbe wi tári mɛ́ʔɛ na. A wi ga gi nyaa wi i nyɛ Silisii tári wówaa,

³⁵ a wi wi yari: «Bele be kútiiw kúunri mɔ na lè, pe ga nan naa, mɔ a náa joo mii í lóʔo,» níì be pye pe sa wi lége fànʔafɔw tɛɛkòrogo ni pe yiri lè Herodi wógi, páā wi kɔ̀rɔsíi yaà.