Kapyegèle 22 - Cebaara Bible 2010

¹ «Mii senyɛnbèle, ní mii tóobèle, ye mii syɛ́ɛnri lóʔo dee mii a joo lè tɔ́ɔliw ni bi mii kéeli tɛ̀ɛn yele na.»

² Amɛɛ be wi nyaa wi i nyuu ní poro ní Heburu-syɛ́ɛnri ni lè, a be níì kàa fàra be pyèrigi na n sɔ̀lɔ wozeligi na. A Pɔli jo:

³ «Mii i nyɛ Zyefuwaa, pe n mii see Tarisi ni, Silisii tári ni. Kěgi naa si ni mii baa lɛɛ, Gamaliyɛliwi mii tama wolo tóolɛɛbèle làlwa kpéʔelevorolo na. Mii fúngi myɛ maa pye Kolocɔlɔɔ kàbangi na àmɛɛ yele myɛ nyɛ lè níjanʔa.

⁴ Mii maa ni kólogi naa syɛ̀ɛnnɛ wɔʔɔ àlí fwɔɔ ni pèle kúu, mii maa ni be pwoo n sa ni nii kàsow ni, n nǎnbèle fàra cébèle na.

⁵ Sáriga-wòlobèle kàfɔgbɔɔɔ ní wolɛɛbèle myɛ i nyɛ mii séera kéeli bee na. Alí poro má mii da caà sɛ́bɛbèle taa, bele mii a dée sa kaan wolo felegefɔ-nyɛ́nbèle ma Damasi ni lè, beè mii da ni syée lè tágafɔbèle kurugo bele be yaà lè bi sa be pwɔɔ bàā maa ní be ní Zyerusalɛmi ma koro ga pye bi ba be wɔʔɔ.»

Pɔli n wi tágali kéele joo

⁶ «Lǎli ni cángi kòro cɛɛri si nan nyùngo na lè n mii yaʔa kólogi na, á mii si i nùuní Damasi na lè, a gbɛ̀ɛngbɔɔmɔ yìri nyɛ̀ʔɛni na terire n baa too mii na.

⁷ A mii fala n too tári na, níì yákpolo lóʔo, a li joo ní mii ní níì jo: ‹Sɔli, Sɔli, nyàʔá na mɔ mii wɔʔɔ nya?›

⁸ A mii jo: ‹Mɔ wìí wii, Kàfɔw?› A wi mii pye: ‹Mii Zyezu wii, Nazarɛti ye wów, wee mɔ wɔʔɔ lè nya.›

⁹ Bele pe da pye ní mii ní lè, pe maa tɔ̀nɔ n gbɛ̀ɛ́nmi nyaa, kàjáa wee wi da joo ní mii ní lè, pe ga wi syɛ́ɛnri lóʔo í.

¹⁰ A mii wi pye: ‹Kàfɔw, nyàʔá gi yɛlɛ mii í kpéʔele?› A Kàfɔw mii yari: ‹Yìri maa syée Damasi ma, gee gi yɛlɛ mɔ í da kpéʔele lè, pe a sa gee bee joo mɔ ma nɛɛ bee.›

¹¹ Amɛɛ mii kàri lè n pye mii ní o nyaagi í gbɛ̀ɛ́nmi bee darigala báriga ni, a mii kôdanʔanyɛnbèle mii cò kɔ́gi na ni syée Damasi ma.

¹² Nànwaa si maa pye yaà Damasi ni pe i wi yiri Ananyasi, wi maa ni fɛ̀ɛgí Kolocɔlɔɔ na ní i wi làlwaw kólogo sámagi ni táanri, kěgi bee Zyefubéle myɛ maa ni wi mɛ́ɛtaangi yiri,

¹³ a wee bee pan mii tɛɛkòrogi ma n baa yére mii taana níì mii pye: ‹Ni senyɛnnɛ Sɔli, mi ní maa nyaagi.› Lǎli bee wonijanna ni a mii nyapiigèle wɔ́ɔ̀ fala n múgu a mii wi nyaa.

¹⁴ A wi mii yari: ‹Wolo tóolɛɛbèle Kolocɔlɔɔ wi da téè mɔ nyɛ́nɛ n wòlo koro ga pye mɔ í woro nyɛ́nɛ kérigèle cán, si wɔ́ɔ Wozinw nyaa, si syɛɛnraa lóʔo wi tiimaa nyɔ́ɔgi na.

¹⁵ Níì cán gee mɔ nyaa lè ní gee mɔ lóʔo lè, mɔ a pye wi séera bàā gee bee nyuu syɛ́ɛnbèle myɛ ma.

¹⁶ Nyàʔá mɔ ní i sige tɔ́ɔliw ni? Yìri mi sa batɛmiw kpéʔele, mí Kàfɔw yaʔa wi mɔ kapeegèle jée wi láʔa mɔ na wi mɛ́ɛgi yerile báriga ni.› »

Pɔli i gi nyuu kánmee na pe woro tun syɛɛnfeleyi ma lè

¹⁷ Amɛɛ mii lúru n kári lè Zyerusalɛmi ma, a mii ga sa ni nyɛ́ɛri kpɔ̀ʔɔrɔli kpaʔa ni, a mii yanyaʔa* nyaa,

¹⁸ Kàfɔw mii da nyaa, a wi mii pye: ‹Wári mi yiri Zyerusalɛmi ni, níì cán séeraw mɔ kpéʔele mii kéeli na lè, pe a wi lóʔo í.›

¹⁹ A mii wi yari: ‹Ni Kàfɔlɔ, pe tiimaw n gi cán ncan bele pe da tága mɔ na lè Zyefubèle sérikpaaya myɛ ni, mii maa ni bele bee pèle nii kàsow ni, ní wɔ́ɔ i bele kpúmɔn.

²⁰ Lǎli ni be Etyɛni sìsyaanw wo lè, woro wee wi da ni mɔ séeraw kpéʔele lè, mii tiimaa maa pye yaà, mii maa yére ní wi kpóofɔbèle ní, ní i be búroyi kɔ̀rɔsíi.›

²¹ A wi mii pye: ‹Yìri maa syée, níì cán mii a mɔ tun syɛɛnfeleyi ma tɛɛ̀leeliye ni.› »

Pɔli ní Wɔrɔmi ye sùlasiibèle kàfɔlɔ

²² Syɛ́ɛnbèle maa ni Pɔli syɛ́ɛnri lúro n taa n baa nan syɛɛnfeleyi kéele na. Lǎli ni wi syɛɛnfeleyi kéele joo lè, a be i yákpogèle wáa níì jo: «Nǎnw naa félege n yɛlɛ pe wi yirige tári ni! Wi ga yɛlɛ wi ní kòro sìi na í!»

²³ Amɛɛ be yákpogèle wáa lè, ní i be búroyi wáa, ní i támiigi koli ni wáa ǹjogi ni lè,

²⁴ a sùlasiibèle kàfɔgbɔɔɔ sùlasiibèle pye be Pɔli lége poro tɛɛkòrogi ni, pé wi yíbe ní sapile ní, koro ga pye àmɛɛ be fúlo wi na lè, woro í gee bee nyúngo sámaga cán.

²⁵ Lǎli ni be wi pwɔɔ lè ní sáligi mɛ́ɛngéle ní, sùlasiibèle dabata kàrigafɔlɔ maa pye yaà woyéreo ní, a Pɔli wi pye: «A gi yɛlɛ lé yele í Wɔrɔmi ye wɔ́rɔbilaa kpúmɔn ní sapile ní kútii sìnjoo ni?»

²⁶ A sùlasiibèle dabata kàrigafɔlɔ ga dee bee lóʔo, a wi kári be kàfɔgbɔɔw ma n sáà wi pye: «Nyàʔá mɔ sɔ̀ngí bi kpéʔele gee? Nǎnw bee i nyɛ Wɔrɔmi ye wɔ́rɔbilaa.»

²⁷ A be kàfɔgbɔɔw pan n baa Pɔli yíbe níì jo: «Ki joo mii ma, Wɔrɔmi ye wɔ́rɔbilaa lé mɔ nyɛ?» A wi wi yari «Ɛɛn.»

²⁸ A be kàfɔgbɔɔw wi yari: «Wáli saʔa mii tɛ́ʔɛ n niyɛɛ zyɔɔ n pye wɔ́rɔbilaa.» A Pɔli wi yari: «Pe si n tɔ̀nɔ n mii see nya.»

²⁹ Bele pe da ni caa bi wi yíbe lè, a poro fala n núngo wi taana, a be kàfɔgbɔɔw ga gi cán Pɔli i nyɛ Wɔrɔmi ye wɔ́rɔbilaa, a woro wɔ́ɔ̀ fyáa àmɛɛ woro wi pwɔɔ lè.

Pe n Pɔli yérige Sanedirɛnw nínge ni

³⁰ Ki nyǐndaligi na a sùlasiibèle kàfɔgbɔɔɔ i caa bi Pɔli kéeli sámaga cán kányɛʔɛ ni, lee na Zyefubèle tìgi wi na lè. A wi Pɔli sánʔana, níì sáriga-wòlobèle kàfɔɔlɔ pye pe peyɛɛ gbóʔoro ní Sanedirɛnw myɛ ní, ní náà tìgi ní Pɔli ní n sáà wi yérige pe níngi ni.