Kapyegèle 21 - Cebaara Bible 2010

Pɔli kárili kéele Zyerusalɛmi ma

¹ Lǎli ni wolo wàli Efɛzi ye na lè, a wolo jée bàtow ni n lǒgi jeli n kári zìnmɛ na Kɔsi ma, koro nyǐndaligi na a wolo nan Worodi na, a wolo ga yiri nɛɛ bee, a wolo kári Patara ma.

² A wolo sáà bàtowaa caa n taa, wee wi a jeli bi kári Fenisii ma lè, a wolo jée wi ni n kári.

³ Lǎli ni wolo ba ni Syipiri wéle ni nyaagi lè, a wolo kàmɔnɔ cáan wi na níì fala ni syée Sirii ma n sáà yére Tiiri ni, níì cán nɛɛ bee pe da yɛlɛ bi bàtow túgoro yirige.

⁴ A wolo sáà pìitamabèle caa n nyaa, níì canya kɔrɔsiin kwɔ́ɔ yaà ní be ní. A poro gi joo Pɔli ma Pìicǎnni báriga ni níì jo ki ga yɛlɛ wi kári yaà Zyerusalɛmi ma í.

⁵ Cányi bee kwɔ́ɔlɔ kadoʔo ma, a wolo kólogi láa ni syée, a pe myɛ sáà wolo tórigo, poro, ní be cébèle, ní be pìíbèle n yiri kěgi kàdoʔo ma. A wo kpùmɔnɔ nɛɛ bee lǒgi kàgomɔ na níì Kolocɔlɔɔ nyɛ́ɛri.

⁶ Koro kàdoʔo ma a wolo wòsiiw kaan woyɛɛ ma níì jée bàtow ni, á poro lúru n jée kěgi ni.

⁷ Lǎli ni wolo yiri lè Tiiri ni n sáà nan Pitolemayisi na, a wolo lǒgi tánʔana kwɔ́ɔ nɛɛ bee, a wolo senyɛnbèle syáanri, níì canʔa nibin kwɔ́ɔ yaà ní be ní.

⁸ Ki nyǐndaligi na a wolo yiri nɛɛ bee n kári Sezarikaʔa ma n sáà tìrige Filipi na, wi lè Syɛɛnjóocǎnri joofɔlɔ, ní wɔ́ɔ i nyɛ kɔrɔsiinw pe da nyɛ́nɛ n wòlo lè bele bee wàa, a wolo i syɔ̀ɔ́n yaà.

⁹ Pìibēle sicɛrɛ maa pye wi ma pìcaala, pe maa ni kérigèle nyaagi ni nyuu.

¹⁰ A wolo canya saʔa kwɔ́ɔ yaà, a kanyaajoowaa yìri Zyude ma n pan, pe i wi mɛ́ɛgi yiri Agabusi.

¹¹ A woro baa wolo nyaa yaà, níì Pɔli sɛntiiriw láa n wiyɛɛ bwɔɔ tɔ́lɔyi, ní kɔ́yi na níì jo: «Pìicǎnni li syɛ́ɛnri naa joo níì jo, Zyefubèle a sa sɛntiiriw naa fɔ́lɔ pwɔɔ kánmi naa na Zyerusalɛmi ni, si wi le syɛɛnfeleyi kɔ́yɔ ni.»

¹² Amɛɛ wolo dee bee lóʔo lè, a wolo ní tɛ́ɛgi bee syɛ̀ɛnnɛ Pɔli nyɛ́ɛri níì jo wi a kɔ́ kári yaà Zyerusalɛmi ma í.

¹³ Lǎli bee ni a Pɔli wolo yari: «Amɛɛ yele nyaan lè nya, nyàʔá na yele koro kpéʔele ni mii fúngi nyáʔami? Alí mii n yére gi ni bi kùu Zyerusalɛmi ni Kàfɔw Zyezu mɛ́ɛgi kéele na, n náa kɔ́ɔ̀ yére pwɔɔlɔ na.»

¹⁴ Amɛɛ gi nyɛ lè Pɔli ga fɔ̀lɔ bi wolo syɛ́ɛnri lóʔo í, a wolo di yaʔa níì jo: «Kàfɔw nyɛ́nɛ kéele li yɛlɛ li kpéʔele.»

¹⁵ Cányi bee kwɔ́ɔlɔ kadoʔo ma a wolo wolo yáriri kpóʔoro n kári Zyerusalɛmi ma.

¹⁶ Sezarikaʔa ye pìitamabèle pèle maa wɔ́ɔ̀ pínɛ n kári ní wolo ní n sáà wolo tórigo Minazɔn kpáagi ma, beè wolo yɛlɛ bi tìrige lè, wi maa pye Syipiri tári wówaa, ní wɔ́ɔ i nyɛ tágafɔlɛɛwaa.

Pɔli n kári Zyaki ma

¹⁷ A wolo ga nan Zyerusalɛmi na, a senyɛnbèle wolo sámaga n cò ní fundaanra ní.

¹⁸ Ki nyǐndaligi na a Pɔli kári ní wolo ní Zyaki ma, a yɛɛ̀kinibèle myɛ wɔ́ɔ̀ kári yaà.

¹⁹ A wi ga be syáanri n kwɔ́ɔ, a wi kérigèle myɛ joo n tɛ̀ɛn be na nibin nibin, gele Kolocɔlɔɔ kpéʔele lè syɛɛnfeleyi nínge ni woro kɔ́yi ni lè.

²⁰ A pe ga syɛ́ɛnri bee lóʔo, a be Kolocɔlɔɔ kpɔ̀ʔɔrɔ ní náà Pɔli pye: «Wolo senyɛnw, wéle, Zyefu-syɛ́ɛnmi bi tága lè, pi n tɔ̀nɔ n nɛʔɛ n sirakamayɛ kánmaa kwɔ́ɔ, Mowizi làlwaw kéele si i nyɛ pe myɛ fúnyo ni.

²¹ Kàjáa pèle n baa gi joo be ma níì jo, Zyefubèle be yaà lè syɛɛnfeleyi nínge ni, mɔ i bele bee tama níì jo pe Mowizi làlwaw cée, mɔ n be pye, pe a kɔ́ ra be pìíbèle kɛ́nɛ kpéʔele í, pe a wɔ́ɔ kɔ́ taʔa kalɛɛgèle na í.

²² Nyàʔá si gi yɛlɛ wo kpéʔele? Níì cán ki ga pye felege o felege na pe a gi lóʔo mɔ n pan naa.

²³ Gee bee na gee wolo a joo mɔ ma lè, ki n yɛlɛ mɔ í gi kpéʔele ànbée. Nànbēle sicɛrɛ i naa wolo ma, pe maa be nyɔ́ɔyi fàli Kolocɔlɔɔ ma.

²⁴ Mi pínɛ ní bele bee ní, mi sa mɔ jéemununi kpéʔele ní be ní, mí wáliw wòlo jàngó pe be nyúnyi kùnunɔ kpéʔele. Koro ga pye syɛ́ɛnbèle myɛ a gi cán, gee pe da lóʔo lè mɔ kéeli na, ki i nyɛ jànvaa, si wɔ́ɔ gi cán bi cán mɔ tiimaa wɔ́ɔ i làlwaw kólogo táanri.

²⁵ Gee gi syɛɛnfeleyi tágafɔɔlɔ kéele kwɔ́ɔ lè, wolo maa sɛ́bɛw tórigo be ma níì jo, wolo nyɛ́nɛ na ki n yɛlɛ paa còʔoró yasunyi káara na, n fàra sìsyaanw, ní yacorigboori káara, ní kanɔnʔɔri na.»

²⁶ Ki nyǐndaligi na a Pɔli nǎnbèle bee kɔ́ri a be pínɛ n be jéemununi fáli kpéʔele koro kàdoʔo ma a wi jée ní be ní kpɔ̀ʔɔrɔli kpaʔa ni bi sa be jéemununi forolo canʔa tɛ̀ɛn, sárigaw si náa wòlo pe myɛ nibin nibin kéele na.

Pe n Pɔli cò kpɔ̀ʔɔrɔli kpaʔa ni

²⁷ Lǎli ni cányi bee kɔrɔsiin caa bi kwɔ́ɔ lè, a Azii ye Zyefubèle ga Pɔli nyaa kpɔ̀ʔɔrɔli kpaʔa ni, a be syɛ́ɛnmi léʔe wi na n wi cò,

²⁸ ní i yákpogèle wáa níì jo: «Yele Isirayɛli ye, ye ba wolo dɛ̀ɛmɛ! Nǎnwee wi da ni nyuu lè syɛ́ɛnbèle myɛ ma tɛ́ɛyi myɛ ni ní i syɛɛnpeeri nyuu ni wáa wolo syɛ́ɛnbèle na, n fàra Mowizi làlwaw, ní tɛ́ɛgi naa na, woro wi wee. Alí wi maa wɔ́ɔ̀ Girɛkibèle pèle kɔ́ri n baa jée kpɔ̀ʔɔrɔli kpaʔa ni n tɛɛcǎngi naa nɔ́nʔɔ.»

²⁹ (Níì cán pe maa Efɛzi ye wówaa nyaa ní Pɔli ní kěgi ni cangaa, pe i wi yiri Turofimi, a be i sɔ̀ngí Pɔli maa wi kɔ́ri n jée yaà kpɔ̀ʔɔrɔli kpaʔa ni.)

³⁰ A kěgi syɛ̀ɛnnɛ myɛ fúnyo nyáʔami be na, a syɛ́ɛnbèle i yìrigí tɛ́ɛyi myɛ ma ni fé ni maa n baa Pɔli cò, níì wi fulolo n yirige kpɔ̀ʔɔrɔli kpaʔa ni, á be fala n kɔ̀riyi tɔ́n.

³¹ Lǎli ni pe da ni caa bi Pɔli kpóo lè, a syɛ́ɛnri bee nan sùlasiibèle kàfɔgbɔɔɔ na, wee wi nyɛ lè sùlasiibèle kabiya myɛ nyúngo na, a gi jo, Zyerusalɛmi i nyáʔami tɛ́ɛyi myɛ ni.

³² A wi fala n yiri lǎli bee wonijanna ni n sùlasiibèle kɔ́ri n fàra be kàrigafɔbèle myɛ na, bele be sùlasiibèle dabata-da kàragí lè, a be tìgi ni fé ni syée n sáà nan be na. A pe ga sùlasiibèle nyaa ní be kàfɔgbɔɔw ní, a be Pɔli kpúmɔnri yérige.

³³ A sùlasiibèle kàfɔgbɔɔɔ sáà nùuni Pɔli na níì wi cò níì be pye pe wi pwɔɔ ní nyɔ̀ʔɔdiriye siin ní, níì syɛ́ɛnmi yíbe bi gi cán wee wi nyɛ lè, ní gee wi pye lè.

³⁴ A syɛ́ɛnmi i yákpogèle wáa, a pèle i nyuu kanmaa na, á pèle wɔ́ɔ i nyuu kanmaa nikwɔɔ na. Pe kàfulogi báriga ni wi ga níì kányɛɛgi cán í, a wi be pye pe sa wi lége sùlasiibèle tɛɛkòrogo ni.

³⁵ Lǎli ni Pɔli nan lè tɛɛ̀lúgujeegi na, a sùlasiibèle wi láa n yìrige ni lúru ní wi ní syɛ́ɛnbèle tanʔara kéele na,

³⁶ níì cán syɛ́ɛnmi myɛ maa taʔa wi na ní i yákpogèle wáa níì jo: «Ye wi kpóo!»

Pɔli n wiyɛɛ kéeli joo n tɛ̀ɛn

³⁷ A sùlasiibèle ga ni caa bi Pɔli lége be tɛɛkòrogi ni, a wi sùlasiibèle kàfɔgbɔɔɔ yíbe níì jo: «A mii a gbǎn yarigaa joo lé mɔ ma?» A wi Pɔli yari: «A mɔ tɔ̀ʔɔ̂ Girɛkiiri cán lé?

³⁸ Mɔ ban wi nyɛ Ezyipiti ye wów ì, wee wi syɛɛnkpoobèle selebingéle siin sɔ́ɔn lè níì be kɔ́ri n tórigo fìími tára ni cányi naa ni ì?»

³⁹ A Pɔli wi pye: «Mii i nyɛ Zyefuwaa, ní i nyɛ Tarisi kananbilaa, kěgee gi nyɛ lè Silisii kèkpɔɔgaa. Mii i mɔ nyɛ́ɛri, mi mii pɔʔɔ mí gi yaʔa mii í joo ní syɛ́ɛnbèle ní.»

⁴⁰ A sùlasiibèle kàfɔgbɔɔɔ fɔ̀lɔ gi na, a Pɔli yìri n yére tɛɛ̀lúgujeegi na níì wi kɔ́gi nyáʔana syɛ́ɛnmi ma níì jo be pyèri. A pe myɛ pyèri tábi. A wi i nyuu ní be ní Heburu-syɛ́ɛnri ni níì jo: