Kapyegèle 20 - Cebaara Bible 2010

Pɔli kárili kéele Maseduwani ní Girɛsi ma

¹ Lǎli ni be kàfulogbɔɔgi bee ceri lè, a Pɔli pìitamabèle kpóʔoro n baa be kɛɛlɛ, koro kàdoʔo ma a wi kólogi nyɛ́ɛri be ma n kári Maseduwani ma.

² A wi sáà tári bee myɛ nyaari n foro n pìitamabèle kɛɛlɛ ní syɛɛnrɛ saʔa ní, koro kàdoʔo ma a wi kári Girɛsi ma.

³ Ní sáà yeye taanri kwɔ́ɔ yaà, ní kɔ́ ba ni caa bi jée bàtowaa ni bi jeli kári Sirii ma. A wi si gi cán Zyefubèle pèle n peyɛɛ nyaa n joo ní i caa bi woro kpóo, a wi gi kɔ̀rirɔ bi lúru sɔ̀lɔ Maseduwani kólogi ni.

⁴ Wi kôdanʔanyɛnbèle pe da pye Sopatɛri, Bere ye wów, wi lè Pirusi jáaw, n fàra Arisitaki, ní Sekɔndusi na, be lè Tesaloniki ye wóbèle, ní Gayusi, Dɛribe ye wów, ní Timɔte ní, n náà fàra Tisyiki ní Turofimi na, Azii ye wóbèle.

⁵ Bele bee maa kári wolo yɛ́ʔɛ na n sáà wolo sige Turowasi ni.

⁶ Wolo si na, levé fun búruw séri canya kwɔ́ɔlɔ kadoʔo ma, a wolo jée bàtowaa ni Filipikaʔa ni n canya kagunɔ kwɔ́ɔ, ní náà be fàra n taa Turowasi ni, a wolo canya kɔrɔsiin kwɔ́ɔ nɛɛ bee.

Pɔli kpóʔorozanni kéele Turowasi ni

⁷ Cégbooli cânzélige na a wolo woyɛɛ gbóʔoro bi búruw kabagi kabagi woyɛɛ na. Amɛɛ Pɔli da ni caa bi kári lè ki nyǐndaligi na, a wi joo n mɔn be ma fwɔɔ n baa nyǐngi lɛɛ.

⁸ Kpáagee ni si wolo da woyɛɛ gbóʔoro lè, ki maa pye kpaataʔagaa, fètingéle saʔa maa pye gi ni.

⁹ Nìgɔcariwaa maa pye yaà pe i wi yiri Utikusi, wi maa tɛ́ɛn fɛ̀nɛtiriw na, a ŋúnɔmi kɔ́ baa wi jáa gbanʔama àmɛɛ Pɔli joo n mɔn lè. A wi ŋúnɔ fwɔɔ n baa láʔa yaà kpaataʔa-taanri wógi fɛ̀nɛtiri na n baa too. A be wi láa n wi nyaa a wi kùu.

¹⁰ A Pɔli tìgi n baa tìn n jée wi ni n wi láa n taʔa wi fìcibigi na níì jo: «Ye a kɔ́ ra nyaan í, níì cán wi pǐli i naa wi ni.»

¹¹ A wi níì lúgu n sáà búruw kabagi kabagi níì lìi, níì fala ni nyuu be ma fwɔɔ n baa syɔ́ɔn. Lǎli ni nyǐngi tali lè, a wi náà kári.

¹² A be lúru n kári ní nìgɔcariw bee ní woweeo ní, a gee bee be fúnyi nyíngi gbanʔama.

Pɔli n yìri Turowasi ma n kári Milɛti ma

¹³ A wolo jée bàtow ni n jeli n kári Pɔli yɛ́ʔɛ na Asɔsi ma ní i sɔ̀ngí bi sa wi láa nɛɛ bee, woro tiimaa wi da gi joo nya, níì jo woro a ra syée tɔlɔyɔ na.

¹⁴ Lǎli ni wi wolo fàra n taa lè Asɔsi ni, a wolo wi láa bàtow ni n kári n sáà nan Mitilɛni na.

¹⁵ Ki nyǐndaligi na a wolo yiri nɛɛ bee n lǒgi jeli n sáà yére Kiyɔsi taana. Cángi bee nyǐndaliga na níìgēle a wolo nan Samɔsi na, koro nyǐndaligi na a wolo nan Milɛti na.

¹⁶ Pɔli maa gi kɔ̀rirɔ n jo woro a Efɛzi sɔ́lɔgɔ, koro ga pye lǎli a kɔ́ sɔ̀lɔ bi woro yaʔa Azii tári ni í. Níì cán wi fúngi maa wári kapye ki a gbǎn kpéʔele Pantikɔtiw canʔa í woro taa yaà Zyerusalɛmi ni.

Pɔli jooli kéele ní Efɛzi ye yɛɛ̀kinibèle ní

¹⁷ Lǎli ni Pɔli pye lè Milɛti ni, a wi tun Efɛzi ma níì jo pe sa Egiliziw yɛɛ̀kinibéle yeri paa maa.

¹⁸ A pe ga nan yaà wi na, a wi gi joo be ma níì jo: «Nlaa mii jée lè cânzeligi na Azii tári ni yele n mii tánʔaganmi cán yeyɛɛ níngi ni.

¹⁹ Mii maa ni Kàfɔw fáli kpéʔele ní màama, ní nyatinmɛ ní, kagbanyi nínge ni, yee yi kpéʔele lè mii na Zyefubèle nyɔɔkuunro báriga ni.

²⁰ Syɛ́ɛnree ti a gbǎn yele dɛ̀ɛmɛ lè, mii da fyáa syɛ́ɛnri bee joolo na yele ma í, mii maa ni yele tama syɛ́ɛnbèle nyɛ́nɛ na, ní wɔ́ɔ i yele tama yele kpáayi ni nibin nibin.

²¹ Mii maa tɔ̀nɔ ni séeraw kpéʔele Zyefubèle ní Girɛkibèle ma níì jo pe be fúnyi kàriga Kolocɔlɔɔ ma, pé tága wolo Kàfɔw Zyezu na.

²² Ye wéle, tɔ́ɔliw ni Pìicǎnni i mii kíle ni syée Zyerusalɛmi ma, kéelee si li a sa mii taa yaà lè mii ga li cán í.

²³ Kàjáa kàʔa o kàʔa ni mii jée lè Pìicǎnni tɔ̀nɔ́ i mii sàmí níì jo, pwɔɔli ní wɔʔɔli i mii sige yaà.

²⁴ Koro ní ki myɛ ní mii o mii tiimaa sìíw córo yarigaa í, jàngó mii í tɛ́nɛ kàfyaali fǎn foro, mii fáliw si wɔ́ɔ foro, wee Kàfɔw Zyezu kaan mii ma lè níì jo mii í da Kolocɔlɔɔ kpɔ́ʔɔri syɛɛnjóocànra séera kpéʔele.

²⁵ Ye wéle, yele bele myɛ nínge ni mii nyaari n sɔ̀lɔ lè ni Kolocɔlɔɔ fǎngi kèlē nyuu yele ma, tɔ́ɔliw ni mii n gi cán yele wàa a ní mii yɛ́ɛgi nyaa í.

²⁶ Gee bee na mii a gi joo yele ma níjanʔa, yele wàa faala ga baa kálagi, wi yàkɛɛ ní o nyɛ mii na í.

²⁷ Níì cán mii n Kolocɔlɔɔ nyɛ́nɛ kérigèle myɛ joo yele ma, mii ga li làa faala làriga yele na í.

²⁸ Yaa yeyɛɛ kɔ̀rɔsíi, ye wɔ́ɔ yaa bǎbèle myɛ kɔ̀rɔsíi, bele yɛ́ʔɛ na Pìicǎnni yele kínige lè, jàngó yele í pye Kolocɔlɔɔ Egiliziw nàʔafɔɔlɔ, wee wi syɔɔ lè wi tiimaa sìsyaanw báriga ni.

²⁹ Mii n gi cán mii ga kári, solomikaari a jée yele níngi ni, ti si a bǎbèle yaʔa sìngalagi ni í.

³⁰ Níì cán syɛ́ɛnbèle pèle a kɔ́ ba yìri yele tiimaa níngi ni bàā jànvaa syɛ́ɛnri nyuu koro ga pye sáā pìitamabèle nyúnyo kàragí bàā taari peyɛɛ na.

³¹ Koro na gi yɛlɛ yaa kɔ̀rɔsíi, yé yele sɔ̀ngumi yaʔa gi na bi cán mii maa ni yele myɛ nibin nibin kɛɛlɛ ní nyatinmɛ ní. Mii ga kɛɛlɛli bee yaʔa làlaa faala ni yɛ́ɛgèle taanri nínge ni í, n cányi pínɛ yébiliyi ni.

³² Tɔ́ɔliw ni mii n yele yaʔa Kàfɔw ma, ní wɔ́ɔ̀ yele yaʔa wi kpɔ́ʔɔri syɛ́ɛnrɛ ma, dee ti a gbǎn ra kàa fàrá yele na lè, si kɔ́rigi kaan yele ma bi fàra bele myɛ na Kolocɔlɔɔ sámaga n yaʔa wiyɛɛ ma lè.

³³ Mii da ni nyabɛɛnnɛ kpéʔele syɔɔn faala yáriga na í, wáli yoo, tɛɛ̀ yoo, buroyo yoo.

³⁴ Yele tiimaa n gi cán dee màko wi da pye mii ní mii pínɛnyɛnbèle na lè, wolo maa ni ti myɛ taagi mii kɔ́yi naa báriga ni.

³⁵ Kanmaa mii da kpéʔele n tɛ̀ɛn yele na nya kérigèle bee myɛ ni àmɛɛ wolo yɛlɛ bàā báara lè bàā fànʔa-fùnvɔbèle dɛ̀ɛmɛ́, si wɔ́ɔ ra Kàfɔw Zyezu syɛ́ɛnri sɔ̀ngí da taagi dee wi da joo lè níì jo: ‹Dùba i nyɛ kaanni ni n sɔ̀lɔ taali na.› »

³⁶ A Pɔli ga dee bee joo n kwɔ́ɔ, a woro ní pe myɛ kpùmɔnɔ níì Kolocɔlɔɔ nyɛ́ɛri.

³⁷ A pe myɛ i nyaan gbanʔama, níì Pɔli mígi yátiigi ni, níì wi syɔɔnri syɔɔnri.

³⁸ Amɛɛ wi da jo lè pe a ní woro yɛ́ɛgi nyaa í, gee bee na pe yɛ́ɛyi da tanʔa n sɔ̀lɔ. Koro kàdoʔo ma a be sáà wi tórigo bàtow ma.