Kapyegèle 2 - Cebaara Bible 2010

Pìicǎnni panna kéele

¹ A Pantikɔtiw canʔa ga nan, a be myɛ pínɛ n pye tɛɛnijanga ni.

² Lǎli bee ni a kàfulogo fala n yìri terire nyɛ̀ʔɛni na, àmɛɛ káfalakpɔʔɔ kàfulogo nyɛ lè, a gi baa kpáagi myɛ nyìn, gee ni pe da pye lè wodɛ́ɛnbéle ní.

³ A be yariraa nyaa mɔ a jo naanyìnye yii. A yi wálagi n tɛ́ɛn be na nibin nibin.

⁴ A pe myɛ fúnyo nyìn Pìicǎnni na, a be fala ni syɛɛnfeleraa nikwɔɔ nyuu àmɛɛ Pìicǎnni di le lè be nyɔ́ɔyi ni.

⁵ Zyefunǎnbèle pèle si maa pye yaà lǎli bee ni wodɛ́ɛnbéle ní Zyerusalɛmi ni, bele be fɛ̀ɛgí lè Kolocɔlɔɔ na, pe maa yiri dulunyanw syɛɛnfeleye myɛ ni.

⁶ Lǎli ni kàfulogi yìri lè, a syɛ́ɛnmi piyɛɛ gbóʔoro yaà, a gi be fúnyi wɔ́ɔ, níì cán pe myɛ nibin nibin maa ni poro tiimaa syɛ́ɛnri lúro pìitunbèle nyɔ́ɔyɔ na.

⁷ A be i káama gi na, a gi pye be na bìngaara, a be i gi nyuu peyɛɛ ma níì jo: «Bele myɛ be nyuu lè bele, Galile tári wòolo ban ì?

⁸ Mɛ̀ɛ́ si gi pye n sɛ́ɛ á wolo myɛ nibin nibin ba ni wolo tiimaa syɛ́ɛnri joomɔ lúro be nyɔ́ɔyi na, dee ni be wolo see lè?

⁹ Bi gi taa wolo pèle i nyɛ Pariti ye, pèle si i nyɛ Mɛdi ye, á pèle wɔ́ɔ i nyɛ Elami ye wòolo, n náà fàra bele na be nyɛ lè Mezopotamii ye, ní Zyude, ní Kapadɔsi, ní Pɔnti, ní Azii ye wóbèle,

¹⁰ ní bele be nyɛ lè Firizii, ní Panfilii, ní Ezyipiti, ní Libii tári wòolo di lè Sirɛni kàbangi na, ní bele be yìri lè Wɔrɔmi ma.

¹¹ Wolo pèle i nyɛ Zyefubéle, á pèle jée Zyefubèle séri kólogo ni, pèle si i nyɛ Kirɛti ye, ní Arabii ye wòolo, kàjáa wolo myɛ nibin nibin i Kolocɔlɔɔ kakpoloyi lúro be ma wolo tiimaa syɛɛnfeleri ni!»

¹² A pe myɛ i káama gi na, a gi be fúnyi nyáʔami. A be i gi nyuu peyɛɛ ma níì jo: «Nyàʔá kéele li lee naa?»

¹³ Kàjáa pèle maa ni be tɛ́ʔɛ níì jo: «Sinmɛ be gbaa n tín.»

Pyɛri syɛɛnjóori

¹⁴ Lǎli bee ni a Pyɛri ní kɛɛ ní nibinw yìri n yére á Pyɛri yákpoli wáa níì jo: «Yele Zyefunǎnbèle, ní yele bele myɛ ye nyɛ naa lè wodɛ́ɛnbéle ní Zyerusalɛmi ni, ye líiyi cáan ye mii syɛ́ɛnri lóʔo!

¹⁵ Sinmɛ ban bele naa gbaa n tín àmɛɛ yele gi sɔ̀ngí lè í. Ye ga cángi nyaa a gi náà séli n nan dɔnwolomɔ na ì?

¹⁶ Kàjáa syɛ́ɛnree kanyaajoow Zyowɛli da joo lè, toro di foro dee naa, wi maa gi joo níì jo:

¹⁷ ‹Kolocɔlɔɔ n gi joo níì jo: Canzanyi ni mii a mii Pǐli yàli syɛ́ɛnbèle myɛ na. Yele nànbiigèle, ní yele calipiigèle a ba ra kérigèle nyaagi da nyuu, yele wojáribèle a ba ra yanyaayi nyaagi, yele wolɛɛbèle sáā ŋúnɔyi ŋúnɔ.

¹⁸ Alí cányi bee ni mii a mii Pǐli yàli mii falipyenǎnbèle, ní mii falipyecebèle na paa nyɛ̀ʔɛna kérigèle nyaagi bàā nyuu.

¹⁹ Mii a kakpoloyi tɛ̀ɛn syɛ́ɛnbèle na, yee yi a pye lè ǹjoʔo ma nyɛ̀ʔɛni na, si wɔ́ɔ fɛ̀ɛ́bèle kpéʔele táàma tári na, pe a pye sìsyaan, ní naà, ní wírifiile.

²⁰ Cángi a ba kàri yébilimɛ, yégi si kàri sìsyaan, sáni Kàfɔw cângbɔʔɔ í nan lè ki lè nìjangbɔɔri canʔa.

²¹ Lǎli bee ni syɔ́ɔnwee faala wi ga Kàfɔw mɛ́ʔɛ yeri lè, wee bee a syɔɔ.›

²² Yele Isirayɛli ye nǎnbèle, ye syɛ́ɛnri naa lóʔo! Kolocɔlɔɔ maa Zyezu tɛ̀ɛn yele na wi lè Nazarɛti ye wów, kakpoloyi, ní bìngaari kèlē, ní fɛ̀ɛ́bèle báriga ni bele wi da kaan wi ma a wi i kpéʔele yele níngi ni lè, àmɛɛ yele tiimaa gi cán lè, koro ga pye yele í gi cán wi i nyɛ woro wóo kányɛʔɛ ni.

²³ Pe si maa baa nǎnw bee le yele kɔ́yi ni n yɛlɛ ní Kolocɔlɔɔ fúngi kakɔrirɔlɔ, ní wi cánni ní, a yele wi kpóo kakolobyebèle báriga ni, bele be wi kóri lè.

²⁴ Kàjáa Kolocɔlɔɔ n wi syɔɔ kùúw yáama ma àmɛɛ wi wi nyán n yirige lè. Níì cán kùúw da pye bi gbǎn fànʔa taa wi na í.

²⁵ Níì cán Davidi maa gi joo wi kéeli na níì jo: ‹Mii maa ni Kàfɔw nyaagi mii yɛ́ʔɛ ma làla o làla. Níì cán wi i nyɛ mii kàliige ma, koro ga pye yafyɛn a kɔ́ mii fúngi curugo í.

²⁶ Gee bee na mii fúngi mii dɛ́nɛ, a mii i nyuu ní fundaangbɔɔrɔ ní. Alí mii n sɔ̀ngumɔ tɛɛtaʔaga taa mii céri kéele na.

²⁷ Níì cán mɔ a mii pǐli yaʔa kúbèle tɛɛkòrogo ni í, mɔ a fɔ̀lɔ bi mɔ Wojanw yaʔa wi fɔ́nʔɔ í.

²⁸ Mɔ n sìíw kóloyo tɛ̀ɛn mii na, mii ga pye mɔ taana mɔ a mii fúngi nyìn fundaanri na.›

²⁹ Ni senyɛ̀nnɛ, ye tíi mii í wolo tóolɛɛw Davidi kéeli fílige joo yele ma wi n kùu, a be wi tɔ́n, wi nyángi si i beè wolo taana, fwɔɔ n baa nan níjanʔa na.

³⁰ Amɛɛ wi da pye lè kanyaajooo níì gi cán Kolocɔlɔɔ maa gi joo woro ma, fwɔɔ n kàli gi na níì jo, wi a ba woro yòdaʔagaa télege woro fàngoli na,

³¹ gee bee wi da wɔ́ɔ̀ joo Kirisi nyán-yirili kéele na sáni ki ba kpéʔele lè, àmɛɛ gi nyɛ lè Kirisi ga kòro kúbèle tɛɛkòrogo ni í, wi céri si ga wɔ́ɔ̀ fɔ́nʔɔ í.

³² Kolocɔlɔɔ n Zyezuw bee nyán. Wolo myɛ i nyɛ gee bee séerabéle.

³³ Amɛɛ wi yìri n lúgu n sáà tɛ́ɛn Tofɔw Kolocɔlɔɔ kàliige kɔ́lɔ ma lè, a wi Pìicǎnni taa Tofɔw ma, lee nyɔ́ɔ wi da fàli lè, níì li tìrige wolo ma àmɛɛ yele gi nyaa ní wɔ́ɔ̀ gi lóʔo lè.

³⁴ Davidi ban wi da lúgu nyɛ̀ʔɛni na í, kàjáa wi tiimaa maa gi joo níì jo: ‹Kàfɔw n gi joo mii Kàfɔw ma níì jo: Mi tɛ́ɛn mii kàliige kɔ́lɔ ma

³⁵ bi taa mii í mɔ nigoobèle pye mɔ tɔ́lɔyi yataʔaga.›

³⁶ Koro na yele Isirayɛli narigbaagi syɛ̀ɛnnɛ myɛ n yɛlɛ bi gi fílige cán bi cán Zyezuwee yele da kóri lè tiiparigi na, Kolocɔlɔɔ n wi kpéʔele Kàfɔw, ní wɔ́ɔ̀ wi kpéʔele Kirisi.»

³⁷ Lǎli ni pe dee bee lóʔo lè, a di wári be na be fúnyi ni gbanʔama, a be gi joo Pyɛri ma ní pìitunzanbèle ní níì jo: «Wolo senyɛnbèle, nyàʔá wolo yɛlɛ bi kpéʔele?»

³⁸ A Pyɛri be yari: «Ye kàdoʔo wáa yele kapeegèle ma, yele myɛ nibin nibin si batɛmiw kpéʔele Zyezu Kirisi mɛ́ɛgi na, koro ga pye Kolocɔlɔɔ í yele kapeegèle kùsulugo syɔɔ, si yakaangi kaan yele ma gi nyɛ lè Pìicǎnni.

³⁹ Níì cán Kolocɔlɔɔ maa li nyɔ́ɔgi fàli yele ní yele pìíbèle ma n fàra bele myɛ na be nyɛ lè léelige, poro bele kánma wolo Kàfɔw Kolocɔlɔɔ a yeri lè.»

⁴⁰ Pyɛri maa níì syɛɛnrɛ saʔa joo n fílige be ma, ní wɔ́ɔ̀ be kɛɛlɛ níì jo: «Ki n yɛlɛ ye yeyɛɛ zyɔɔ lǎli naa kakolobyebèlē ma.»

⁴¹ Bele be fɔ̀lɔ wi syɛ́ɛnri na lè, a poro batɛmiw kpéʔele. Bele be fàra be na lè cángi bee. Pe maa pye syɛ̀ɛnnɛ selebinnɛ ní saala kagunɔ félege.

⁴² A be kòro ni pìitunbèle tamana lúro, níì pye pínɛnyɛnnɛgɛ na ní tágafɔzanbèle ní, ní wɔ́ɔ i búruw kabagi peyɛɛ na, ní i nyɛ́ɛri Kolocɔlɔɔ ma.

Tágafɔbèle nàʔaganma kéele

⁴³ A fyáari syɛ́ɛnbèle myɛ cò àmɛɛ pìitunbèle da ni kakpoloyi ní fɛ̀ɛ́bèle saʔa kpéʔele lè.

⁴⁴ Bele myɛ be tága lè, a be pínɛ ni kòró ní peyɛɛ ní, níì pe yáriri myɛ kpéʔele peyɛɛ wóro.

⁴⁵ A be i be tári ní be kɔlɔ̀ yáriri pára ni lee peyɛɛ na ni yɛlɛgi ní pe myɛ nibin nibin màkonyɔɔrɔ ní.

⁴⁶ Pe maa kòro ni syée kpɔ̀ʔɔrɔli kpaʔa ma canʔa o canʔa ní fungo nibin ní, ní i búruw kabagi peyɛɛ na be kpáayi ni, ní i líi ní fundaanra ní, ní funjànya ní,

⁴⁷ ní i Kolocɔlɔɔ kpɔ̀ʔɔrɔ́, a be kéeli syɛ́ɛnbèle myɛ dɛ́nɛ. Bele be syoo lè, a Kàfɔw i bele bee fàrá Egiliziw na canʔa o canʔa.