Kapyegèle 19 - Cebaara Bible 2010

Pɔli i nyɛ Efɛzi ni

¹ Lǎli ni Apolɔsi pye lè Korɛnti ni, a Pɔli sɔ̀lɔ nyanbeleyi kólogo ni n Azii tári foro n kári Efɛzi ma. A wi sáà pìitamabèle pèle nyaa yaà.

² A wi be pye: «Lǎlee ni yele tága lè, a yele da Pìicǎnni taa lé?» A be wi yari: «Wolo ga caa kɔ́ɔ̀ gi lóʔo syɔɔn ma ncan Pìicànna i yaà í.»

³ A wi be pye: «Batɛmi félegìí yele kpéʔele?» A be wi yari: «Zyan batɛmiw wii.»

⁴ A Pɔli be pye: «Zyan maa ni syɛ́ɛnbèle batize àmɛɛ be kàdoʔo wáa lè be kapeegèle ma. Wi si maa ni gi nyuu be ma níì jo wee wi maa woro kàdoʔo ma lè pe tága wee bee na, gee bee n jo Zyezu na.»

⁵ A pe ga dee bee lóʔo, a be batize Kàfɔw Zyezu mɛ́ɛgi na.

⁶ A Pɔli wi kɔ́yi taʔa be na, a Pìicǎnni tìgi be ma. A be séli ni nyuu syɛɛnfeleraa ni, ní i kérigèle nyaagi ni nyuu.

⁷ Pe myɛ bìnɛw maa nànbēle kɛɛ ní siin félege kwɔ́ɔ.

⁸ A Pɔli sáà jée Zyefubèle sérikpaʔa ni ni nyuu ní nànzorodo ní n baa taa yeye taanri, ní i Kolocɔlɔɔ fǎngi kèlē tèé be na, ní i caa bi be fúnyi kàriga.

⁹ Kàjáa pèle maa be zɔ̌nbèle nìri níì kòro be sìndagali ni, ní i Kàfɔw kólogo mɛ́ʔɛ kálagi syɛ́ɛnmi ma, a Pɔli yiri pe níngi ni, níì pìitamabèle cɔɔnri n kári Tiranusi làkɔliw tɛ́ʔɛ ma n sa ni syɛ́ɛnbèle tama nɛɛ bee canʔa o canʔa.

¹⁰ Wi n gee bee kpéʔele n taa yɛ̀ʔɛlɛ siin, Zyefubèle myɛ be pye lè Azii tári ni, n fàra Girɛkibèle na, a poro Kàfɔw syɛɛncanra lóʔo.

Seva jáabèle kéele

¹¹ Kàfɔw si maa ni kakpolo-kpèleye kpéʔele Pɔli kɔ́yi ni.

¹² Alí nyùnbwɔɔgèle ní fànipiigèle ge pye lè Pɔli na, a be i gele bee lée n sa ni taari yáabèle na, a yáami i láari be na, á màdebèle wɔ́ɔ i yirigi be ni.

¹³ Zyefubèle bele pe da ni nyaari ni máari lè ni màdebèle yirigi syɛ́ɛnbèle ni, a poro pèle gi pye n wéle kapye poro a gbǎn ra màdebèle yirigi syɛ́ɛnbèle ni Kàfɔw Zyezu mɛ́ɛgi yerile báriga ni, a pe gi joo níì jo: «Zyezuwee kéele Pɔli nyuu lè mii a gi joo gbàn yele ma woro mɛ́ɛgi na ye yiri.»

¹⁴ Zyefubèle sáriga-wòlobēle kafɔwaa maa pye pe i wi yiri Seva, jaafɔɔlɔ kɔrɔsiin maa pye wi ma, poro pe da ni gi kpéʔele ànbée.

¹⁵ A màdew be yari: «Mii n Zyezu cán, ní wɔ́ɔ̀ Pɔli cán, yele si i nyɛ bɛ̀lɛ́?»

¹⁶ A màdew fɔ́lɔ fala n too be na n fànʔa taa be na fwɔɔ n be kpàli kpàli, a be fàn n yiri kpáagi ni níboribéle.

¹⁷ Zyefubèle ní Girɛkibèle myɛ be pye lè Efɛzi ni níì kéeli bee cán, a poro myɛ i fɛ̀ɛgí. A Kàfɔw Zyezu mɛ́ɛgi yiri nɛɛ bee.

¹⁸ Bele pe da tága lè, a poro pèle saʔa i maa n ba ni yèré be kakolobyeri ni syɛ́ɛnbèle nyɛ́nɛ na.

¹⁹ A sàndoobèle saʔa wɔ́ɔ i maa ní be sɛ́bɛbèle ní n ba ni be sórogi syɛ́ɛnbèle myɛ nyɛ́nɛ na. Pe maa sɛ́bɛbèle bee lɔ́rɔ córo n di nyaa wálifiio sirakamayɛ toko ní kagunɔ.

²⁰ Kánmi bee na Kàfɔw syɛ́ɛnrɛ da ni syée yɛʔɛ̀ ma ní séew, ní fànʔa ní.

Syɛɛnkpoʔolomi yákpowáara kéele Efɛzi ni

²¹ Kérigèle bee pyele kadoʔo ma a Pɔli gi kɔ̀rirɔ n tímana wi fúngi ni n jo woro a Maseduwani tári ní Akayi tári foro bi kári Zyerusalɛmi ma, ní níì jo: «Mii ga nan yaà, ŋàʔanaga gii fwɔɔ mii í wɔ́ɔ sa Wɔrɔmi kěgi nyaa.»

²² A wi wi dɛ̀ɛmɛfɔbèle pèle siin tun Maseduwani ma, pe i wàa yiri Timɔte ní i wee yiri Erasiti, á woro tiimaa níì kòro yaà Azii ni n làlaa kwɔ́ɔ.

²³ Lǎli bee ni a kagbanna yìri Kàfɔw kólogo kéele na.

²⁴ Nànwaa maa pye yaà pe i wi yiri Demɛtiriyusi, wi maa pye kanyɛɛnfaaɔn ní i Aritemisi kpɔ̀ʔɔrɔli kpaʔa félege faanri kpaapiigéle ní wálifiiw ní, wi falipyebèle maa ni tɔ̀nɔ saʔa taagi fáliw bee báriga ni, wee wi kaangi be ma lè.

²⁵ A wi poro kpóʔoro n fàra fáliw bee félege pyefɔɔlɔ myɛ na ní baa be pye: «Syɛ̀ɛnnɛ, yele n gi cán fáliw naa ni wolo tɔ̀nɔw tɛɛtaala nyɛ.

²⁶ Yele si n gi nyaa ní wɔ́ɔ̀ gi lóʔo, àmɛɛ Pɔliw bee syɛ̀ɛnnɛ saʔa nyúnyo kàriga Efɛzi ni lè a be pùuni, ní wɔ́ɔ̀ gi kpéʔele ànbée Azii tɛ́ɛyi myɛ ni, níì cán wi n jo, yakpɔʔɔrɔyee syɛ́ɛnbèle sámagi lè ní be kɔ́yi ní, yi o nyɛ kolocɔlɔbèlē í.

²⁷ Ki n yɛlɛ waa fɛ̀ɛgí níì cán wolo fáliw yagana ban pe a kɔ́ faʔa í, kolocɔlɔkpɔɔw wi lè cɔlɔɔ be yiri lè Aritemisi, pe a wɔ́ɔ kɔ́ wi kpɔ̀ʔɔrɔli kpaʔa córo yafyɛn í, si wɔ́ɔ wi tiimaa mɛ́ɛgi faʔa, woro wee Azii ye myɛ kpɔ̀ʔɔrɔ́ lè, n náà fàra dulunyanw syɛ̀ɛnnɛ myɛ na.»

²⁸ Amɛɛ be syɛ́ɛnri bee lóʔo lè, a be fúnyi tɔ̀nɔ n tanʔa be na fwɔɔ n baa sɔ̀lɔ ki dǎnw myɛ na, a be yìri ni yákpogèle wáa níì jo: «Efɛzi ye Aritemisi n tɔ̀nɔ n kpɔ́ʔɔ!»

²⁹ A kěgi syɛ̀ɛnnɛ myɛ tìn n yìri ni fé ni syée peyɛɛ gurugo n sáà jée tɛɛ̀kpoʔorogi ni. Pe si maa Gayusi ní Arisitaki cò n kári ní be ní yaà. Pe maa pye Pɔli kôdanʔanyɛnbèle pèle, á be yìri Maseduwani ma.

³⁰ Pɔli maa ni caa bi kári sa jée syɛ́ɛnmi nínge ni, pìitamabèle si ga fɔ̀lɔ í.

³¹ Azii wóbèle pèle maa wɔ́ɔ̀ pye wi tàannyɛ̀nnɛ, a poro tun wi ma n wi nyɛ́ɛri níì jo wi a kɔ́ kári yaà tɛɛ̀kpoʔorogi ma í.

³² A syɛ́ɛnbèle i yákpogèle wáa, pe syɛ́ɛnri si da pínɛ í, pèle maa ni nyuu kanmaa na, á pèle wɔ́ɔ i nyuu kanmaa nikwɔɔ na, níì cán syɛɛnkpoʔolomi bee fúnyo maa tɔ̀nɔ n nyáʔami be na, àlí pe pèle saʔa da be kakpoʔoroli nyúngo cán í.

³³ Lǎli bee ni a be Alɛkisandiri yirige syɛ́ɛnmi nínge ni, Zyefubèle pe da wi ŋɔrigɔ n tórigo yɛʔɛ̀ ma. A wi wi kɔ́gi yìrige syɛ́ɛnmi ma jàngó bi peyɛɛ joo yirige.

³⁴ Amɛɛ si be gi cán lè wi i nyɛ Zyefuo, a be i yákpogèle wáa, a be yákpogèle pínɛ n pye àmɛɛ yákpolo nibin nyɛ lè n lɛ́ɛribéle siin kwɔ́ɔ yákpowáari bee na, ní i gi nyuu níì jo: «Efɛzi ye Aritemisi n tɔ̀nɔ n kpɔ́ʔɔ!»

³⁵ Lǎli bee ni a kěgi sekiretɛɛri syɛ́ɛnmi pye pi pyèri níì jo: «Yele Efɛzi ye, wìí wi nyɛ wi ga gi cán yele i nyɛ Aritemisikpɔɔw kpɔ̀ʔɔrɔlɔ kpaʔa kɔ̀rɔsiifɔɔlɔ í, n fàra wi fòtow na wi yìri lè nyɛ̀ʔɛni na màdegbɔɔɔ n baa too nɛɛ naa í?

³⁶ Syɔɔn faala a gbǎn gee bee kábala í, koro na gi yɛlɛ ye pyèri. Yele a kɔ́ keelaa faala kpéʔele funvuugo na í.

³⁷ Yele n pan ní nǎnbèle naa ní, bi gi taa pe ga kpɔ̀ʔɔrɔli kpaaya yárira yùu í, pe si ga wɔ́ɔ̀ wolo kolocɔlɔw mɛ́ʔɛ kálagi í.

³⁸ Kapye Demɛtiriyusi ní wi falipyebèle n gi nyaa wàa n keelaa kpéʔele poro na, ki n yɛlɛ pe gi cán kútiijoo-cányi i yaà, kútiijoobèle wɔ́ɔ i yaà, ki n yɛlɛ paa syée yaà bele bee ma.

³⁹ Keelaa nikwɔɔ si ga pye yele ma, yele a gbǎn lee bee cɔɔnri kěgi syɛ̀ɛnnɛ kpóʔorolo canʔa ni.

⁴⁰ Kányɛʔɛ ni mii i fɛ̀ɛgí níjanʔa kéeli na jàngó fànʔafɔbèle a kɔ́ jo wolo n nyɔɔ kúun poro na í. Níì cán nyùngo o nyɛ wolo ma gee wolo a gbǎn joo lè syɛ́ɛnmi naa kpóʔorolo kéele na í.»

⁴¹ Syɛ́ɛnri bee joolo kadoʔo ma, a wi syɛ́ɛnmi pye bi cariga.