Kapyegèle 18 - Cebaara Bible 2010

Pɔli i nyɛ Korɛnti ni

¹ Koro kàdoʔo ma a Pɔli yiri Atɛni ni n kári Korɛnti ma.

² A wi sáà Zyefunànwaa nyaa yaà pe i wi yiri Akilasi, wi maa pye Pɔnti ye wóo. Pe maa ni wi céw yiri Pirisii, pe maa yìri Italii tári ma n pan Korɛnti ma ki ga mɔn í, níì cán Kulodi maa joo Zyefubèle myɛ n yɛlɛ be yiri Wɔrɔmi ni. A Pɔli sáà tìrige bele bee ma n kòro yaà.

³ Amɛɛ pe myɛ da ni falinijaɔn kpéʔele lè, a be pínɛ ni báara, níì cán fànikpaaya pe da ni sámagi.

⁴ Pɔli maa ni nyuu Zyefubèle sérikpaʔa ni pe cândɛnɛgi canʔa ni cégbolo o cégbolo, ní i ŋàʔaná bi Zyefubèle ní Girɛkibèle fúnyo kàriga.

⁵ Lǎli ni Silasi ní Timɔte yìri Maseduwani ma n pan Pɔli ma lè, a wi i syɛ́ɛnri nyuu ní lòmaana ní, ní tɔ̀nɔ́ i séeraw kpéʔele Zyefubèle ma níì jo: «Zyezu wi nyɛ Kirisi.»

⁶ Amɛɛ si Zyefubèle yìri ni Pɔli kábala lè ní i wi teeri, a wi wi búroyi nyàʔara n wáa be na níì be pye: «Yele sìsyaanw yàkɛɛ i nyɛ yele na! Kolomɔ o mii na gi kéeli na í, nlaʔa níjanʔa na, mii a kári syɛɛnfeleyi ma.»

⁷ A wi yiri n sáà jée Kolocɔlɔɔ kpɔ̀ʔɔrɔfɔwaa kpaʔa ni pe i wi yiri Tityusi Zyusitusi, wi kpáagi maa pye Zyefubèle sérikpaʔa taana.

⁸ Kirisipusi wi lè sérikpaagi kàfɔlɔ, a woro baa tága Kàfɔw na ní wi kpáagi wòolo myɛ ní. A Korɛnti ye ga ni Pɔli syɛ́ɛnri lúro, a poro pèle saʔa tága, níì batɛmiw kpéʔele.

⁹ Yébiligaa ni a Kàfɔw joo ní Pɔli ní yanyaʔa ni, níì wi pye: «Ki ga yɛlɛ mɔ í da fɛ̀ɛgí í, da nyuu, mɔ a kɔ́ pyèri í,

¹⁰ níì cán mii i nyɛ ní mɔ ní, syɔɔn faala a tée too mɔ na bi mɔ wɔʔɔ í, níì cán syɛ̀ɛnnɛ saʔa i naa mii ma kěgi naa ni.»

¹¹ A Pɔli kòro yaà Korɛnti ni n taa yɛɛlɛ nibin ní yeye kɔrɔni, ni be tama Kolocɔlɔɔ syɛ́ɛnri na.

¹² Lǎlee ni Galiyɔn da pye lè Akayi tári fànʔafɔlɔ, lǎli bee ni a Zyefubèle pínɛ n yìri Pɔli kurugo n wi kɔ́ri n kári kútiijoo-tɛ́ɛgi ma,

¹³ ní sáà jo: «Nǎnw naa i syɛ́ɛnbèle nyúnyo kàragí níì jo paa Kolocɔlɔɔ kpɔ̀ʔɔrɔ́ kanmaa nikwɔɔ na, bee bi lè pi ga yɛlɛ ní Mowizi làlwaw ní í.»

¹⁴ Lǎli ni Pɔli caa bi joo lè, a Galiyɔn fala n Zyefubèle pye: «Yele Zyefubèle, ki ga maa pye kolomɔ kéele, koro ga jáa kapeetèele kéele, mii mǎà dée gee bee lóʔo yele ma kányɛʔɛ ni.

¹⁵ Kàjáa yele ga ni yeyɛɛ gábala syɛ́ɛnri kɔ́rɔ na, wàlá mɛ́ɛyi kɔ́rɔ, ní yele làlwaw kéele na, gee bee i nyɛ yele tiimaa kéele. Mii o caa bi pye kérigèle bee kútiijooo í.»

¹⁶ A wi be nɛnɛ n yirige kútiijoo-tɛ́ɛgi ni.

¹⁷ Lǎli bee ni a pe myɛ Sɔsitɛni cò, wi lè Zyefubèle sérikpaʔa kafɔlɔ, ni kpúmɔn kútiijoo-tɛ́ɛgi taana, kàjáa Galiyɔn ga gee bee kàa faala córo í.

Pɔli lúrugarili kéele Antyɔsyi ma

¹⁸ Pɔli maa níì làlaa saʔa kwɔ́ɔ yaà Korɛnti ni. Koro kàdoʔo ma a wi kólogi nyɛ́ɛri senyɛnbèle ma, ní sáà jée bàtowaa ni bi kári Sirii tári ma, a Pirisii ní Akilasi pínɛ ní wi ní. Wi si maa wi nyǔngi kùnu Sankire ni, níì cán wi maa wi nyɔ́ɔgi fàli Kolocɔlɔɔ ma.

¹⁹ A pe ga nan Efɛzi na, beè Pɔli a wi pínɛnyɛnbèle yaʔa lè, a wi jée Zyefubèle sérikpaʔa ni ni nyuu be ma.

²⁰ A be wi nyɛ́ɛri níì jo wi poro pɔʔɔ wí canyaa kwɔ́ɔ yaà ní poro ní. Wi si ga fɔ̀lɔ í,

²¹ níì kólogi nyɛ́ɛri be ma níì be pye: «Mii a kɔ́ lúru pan naa yele ma ní Kolocɔlɔɔ ga fɔ̀lɔ.» Koro kàdoʔo ma a wi yiri Efɛzi ni n sáà jée bàtow ni ni syée.

²² A wi ga sáà nan Sezarikaʔa na, a wi kári Zyerusalɛmi ma n sáà Egiliziw syáanri, ní náà kári Antyɔsyi ma.

²³ A wi ga sáà làlaa kwɔ́ɔ nɛɛ bee, koro kàdoʔo ma a wi kári n sa ni Galasii tári nyaari ní Firizii tári ní n taʔala tiyɛɛ na ni pìitamabèle myɛ dɛ̀ɛmɛ́ pe nìri.

Apolɔsi jéeli kéele Efɛzi, ní Korɛnti ni

²⁴ Zyefunànwaa si maa pan Efɛzi ma pe i wi yiri Apolɔsi, wi maa pye Alɛkisandirikaʔa ye wóo, wi maa Kolocɔlɔɔ syɛɛnsɛbɛri cán gbanʔama, níì tɔ̀nɔ n wɔ́ɔ̀ gbàn jooli na.

²⁵ Pe maa nǎnw bee tama Kàfɔw kólogo ni, a wi fúngi myɛ kòro gi na, a wi i Zyezu kéeli nyuu syɛ́ɛnbèle ma ní i be sámagi ni tama li na, kàjáa wi tɛɛ̀cánlaʔali li da pye Zyan batɛmiw.

²⁶ A wee bee baa soro n yére n gi séli ni nyuu Zyefubèle sérikpaʔa ni. A Pirisii ní Akilasi ga wi syɛ́ɛnri lóʔo, a be wi kɔ́ri n lége peyɛɛ gurugo n sáà Kolocɔlɔɔ kólogi fílige n tɛ̀ɛn wi na n sɔ̀lɔ.

²⁷ Lǎlee ni wi caa bi kári Akayi ma lè, a senyɛnbèle wi zɔ̌nw nìri níì sɛ́bɛ sɛ́bɛ n kaan wi ma waa syée, pe maa wi sɛ́bɛ pìitamabèle mɛ́ʔɛ na, níì be pye pe wi sámaga be cò cama. Amɛɛ wi sáà nan yaà lè, bele be tága lè Kolocɔlɔɔ kpɔ́ʔɔri báriga ni, a wi tɔ̀nɔ́ i be dɛ̀ɛmɛ́.

²⁸ Níì cán wi maa gbàn ni Zyefubèle cáan syɛ́ɛnbèle nyɛ́nɛ na ní wi syɛ́ɛnri ní, àmɛɛ wi da ni gi fíligi ni tèé be na lè Kolocɔlɔɔ syɛɛnsɛbɛri báriga ni níì jo: «Zyezu wi nyɛ Kirisi.»