Kapyegèle 17 - Cebaara Bible 2010

Pɔli ní Silasi i nyɛ Tesaloniki ni

¹ A Pɔli ní Silasi foro Anfipolisi, ní Apolonii ni n sáà nan Tesaloniki na, Zyefubèle sérikpaagaa si maa pye nɛɛ bee.

² A Pɔli jée gi ni àmɛɛ wi tàli ni gi kpéʔele lè làla o làla. A wi cégboʔolo taanri kwɔ́ɔ yaà, ní i Kolocɔlɔɔ syɛɛnsɛbɛri kɔ́rɔ nyuu ni fíligi be ma be cândɛnɛgi ni.

³ Wi maa ni di kɔ́rɔw nyuu be ma ní i gi tèé be na àmɛɛ Kirisi da yɛlɛ lè bi wɔʔɔ kùu si náa nyán yiri kúbèle nínge ni. Wi maa ni gi nyuu be ma níì jo: «Zyezuwee kéele mii nyuu yele ma lè, woro wi nyɛ Kirisi.»

⁴ A Zyefubèle pèle tága níì tan Pɔli ní Silasi na, a Girɛkibèle saʔa wɔ́ɔ̀ tága, bele pe da ni Kolocɔlɔɔ kpɔ̀ʔɔrɔ́ lè n fàra mɛ́ɛkpoloyi càbala saʔa na.

⁵ Kàjáa a nyabɛɛnni tɔ̀nɔ n jée Zyefubèle ni, a be sáà nifaʔayaa caa n kɔ́ri kàlari-kóloyi ni n pínɛ ní peyɛɛ ní, yee yi tɔ̀nɔ n pee lè, ní baa syɛ́ɛnmi kpóʔoro n kěgi súrugu ní be yákpowáari ní. A be kári Zyasɔn kpáagi ma n sa ni Pɔli ní Silasi caa níì jo poro a be cò bi yirige syɛ́ɛnmi ma.

⁶ Pe si ga be nyaa í. A be Zyasɔn ní senyɛnbèle pèle cò n kílele n kári kěgi fànʔafɔɔlɔ ma ní i yákpogèle wáa níì jo: «Syɛ́ɛnbèle be dulunyanw súrugu ni máari lè, poro be wɔ́ɔ̀ pan nɛɛ naa,

⁷ a Zyasɔn baa be tìrige wi kpáagi ni. Bele bee myɛ n Sezari kajoogèle cée níì jo fànʔafɔwaa nikwɔɔ i yaà, woro wi nyɛ Zyezu.»

⁸ A syɛ́ɛnbèle ní kěgi fànʔafɔɔlɔ ga syɛ́ɛnri bee lóʔo, a di be fúnyi curugo be na.

⁹ A be yaʔali wáli syɔɔ Zyasɔn ní wi pínɛnyɛnbèle ma, ní náà be yaʔa.

Pɔli ní Silasi i nyɛ Bere ni

¹⁰ A senyɛnbèle fala n Pɔli ní Silasi yirige n tórigo Bere ma cángi bee yébilige ni. Lǎli ni be nan yaà lè, a be sáà jée Zyefubèle sérikpaʔa ni.

¹¹ Zyefubèle bee si maa pɔ́rɔ n sɔ̀lɔ Tesaloniki ye wóbèle na, níì cán pe maa syɛ́ɛnri cò ní fundaanra ní, ní i Kolocɔlɔɔ syɛɛnsɛbɛri sámagi ni wéle ní lòmaana ní canʔa o canʔa, jàngó bi gi cán kapye kérigèle Pɔli nyuu lè ke i nyɛ kányɛʔɛ.

¹² Gee bee na a poro pèle saʔa tága n fàra Girɛkibèle pèle saʔa na, be lè mɛ́ɛkpoloyi càbala ní nǎnbèle ní.

¹³ Kàjáa lǎli ni Tesaloniki ye Zyefubèle gi lóʔo lè Pɔli i yaà ni Kolocɔlɔɔ syɛ́ɛnri nyuu Bere ye ma wɔ́ɔgēle, a be kári yaà n ní sáà syɛ́ɛnbèle bee sɔ́ɔn be na.

¹⁴ Lǎli bee wonijanna ni a senyɛnbèle fala n Pɔli tórigo sólomi lɔ̀ʔɔ nyɔ́ɔ ma. A Silasi ní Timɔte kòro yaà Bere ni.

¹⁵ A Pɔli tórigofɔbèle kári ní wi ní fwɔɔ n sáà nan Atɛni na. A pe ga lúru ni syée, a Pɔli be tun yaà níì jo be sa Silasi ní Timɔte pye pe wári be kári yaà woro ma.

Pɔli i nyɛ Atɛni ni

¹⁶ Lǎli ni Pɔli pye ni be sige lè Atɛni ni, a wi fúngi tanʔa wi na, ncan wi maa gi nyaa a kěgi bee nyìn yasunyi na.

¹⁷ Koro na wi maa ni nyuu ní Zyefubèle ní be sérikpaagi ni, n fàra bele na pe da ni Kolocɔlɔɔ kpɔ̀ʔɔrɔ́ lè ní be ní, ní i syée n wɔ́ɔ sa ni nyuu ní cédaali wòolo ní canʔa o canʔa.

¹⁸ Kérigèle sɛʔɛfɔɔlɔ, bele be yiri lè Epikuribèle, ní i bele yiri Sitoyisibèle, bele bee pèle maa ni syɛ́ɛnri syoo Pɔli nyɔ́ɔgi na. A pèle jo: «Nyàʔá gbanzan syɛ́ɛnrɛ wee naa nyuu nya?» A pèle jo: «Wi i di nyuu mɔ a jo syɛɛnfeleyaa nikwɔɔ màdebēle syɛ́ɛnrɛ dii.» Amɛɛ wi da ni Zyezu kéeli, ní kúbèle nyán-yirile kéele nyuu lè, koro na pe da ni dee bee nyuu.

¹⁹ Lǎli bee ni a be wi kɔ́ri n kári be kútiijoo-tɛ́ɛgi ma be yiri lè Aropazyi, ní sáà wi pye: «Tamavɔnni bee syɛ́ɛnrɛ mɔ nyuu lè, a wolo a gbǎn kàa cán lé li ni?

²⁰ Kérigèle wolo lóʔo mɔ ma lè, ke n wolo fúnyi wɔ́ɔ. Koro na wolo caa bi ge kɔ́rɔw cán.»

²¹ Ncan Atɛni ye myɛ, ní nibɔnbèle ní pe baa tɛ́ɛn ní be ní lè, pe o yafyɛn kpéʔele í kapye kafɔngèle lóʔolo ní ge jooli ban í.

²² A Pɔli yìri n yére kútiijoo-tɛ́ɛgi bee nínge ni níì jo: «Yele Atɛni ye, mii n gi nyaa yele tɔ̀nɔ i fɛ̀ɛgí yele kolocɔlɔbèle na gbanʔama, poro bele yele kpɔ̀ʔɔrɔ́ lè.

²³ Amɛɛ mii sɔ̀lɔ́ lè ní i yele yasunyi wéle, a mii gi nyaa a be gi sɛ́bɛ sáriga-wòlo-yafaangaa na a gi jo: ‹Gee naa n kpéʔele kolocɔlɔwaa mɛ́ʔɛ na, wee wi lè wolo ga wi cán í.› Koro na wee yele kpɔ̀ʔɔrɔ́ lè sìnján ni, wee bee kéele mii a joo yele ma.

²⁴ Kolocɔlɔwee wi dulunyanw ní wi fúngi yárira myɛ faan lè, wi lè nyɛ̀ʔɛni ní tári Kàfɔlɔ, wi o tɛ̀ɛ́n kpɔ̀ʔɔrɔlɔ kpáayi ni yee syɛ́ɛnbèle faanri lè ní be kɔ́yi ní í.

²⁵ Wi màko o nyɛ syɔɔn kɔ́lɔ yakpéʔelege na í, níì cán woro wi sìíw, ní ŋɔ́ngari, ní yáriri myɛ kaangi syɛ́ɛnbèle myɛ ma.

²⁶ Wi n syɛɛnfeleyi myɛ yirige nàɔn nibin ni, níì be télege télege tári tɛ́ɛyɛ myɛ ni, níì gi kɔ̀rirɔ n be làrigèle ní be tɛɛ̀tɛ́nɛyi láʔagéle wòlo,

²⁷ ní i caa paa woro Kolocɔlɔɔ caa. Bele si be tala ni máari lè, dɔ̀ʔɔ́ poro a gbǎn wi taa, bi gi taa wi ga léeli wolo wàa faala na í.

²⁸ Níì cán woro bárigaw ni wolo myɛ sìi taa n pye syɛ̀ɛnnɛ, ni táanri ni máari. Anbée yele ŋùuvɔbèle pèle wɔ́ɔ̀ gi joo níì jo: ‹Wolo wɔ́ɔ i nyɛ Kolocɔlɔɔ yòdaʔaya.›

²⁹ Amɛɛ si wolo nyɛ lè Kolocɔlɔɔ yòdaʔaya, ki ga yɛlɛ wolo í da sɔ̀ngí si jo Kolocɔlɔɔ n yasungo wíri í, tɛɛ̀ wóʔo yoo, wálifiio wóʔo yoo, kàdɛnɛgɛ wóʔo yoo, toro dee syɛ́ɛnbèle sámagi lè ní be sícilimi ní, be funzɔngumi na.

³⁰ Kolocɔlɔɔ ga níì córo syɛ́ɛnbèle kanaa-sìnjánma larigéle na í, kàjáa tɔ́ɔliw ni wi i gi nyuu syɛ́ɛnbèle myɛ ma tɛ́ɛyi myɛ ni níì jo be kàdoʔo wáa be kapeegèle ma.

³¹ Níì cán wi n cangaa tɛ́ʔɛ gee ni wi a ba kútiisinw kúun lè dulunyanw syɛ̀ɛnnɛ na woro syɛɛntelegew báriga ni, wi n gi fɛ̀ɛ́w fílige n tɛ̀ɛn syɛ́ɛnbèle myɛ na àmɛɛ wi wi nyán n yirige lè kúbèle nínge ni.»

³² Lǎli ni be kúbèle nyán-yirile syɛ́ɛnrɛ lóʔo Pɔli ma lè, a pèle i wi tɛ́ʔɛ, á pèle jo: «Wolo a ní ba kéeli bee lóʔo mɔ ma cangaa.»

³³ Lǎli bee ni a Pɔli yiri be níngi ni.

³⁴ Koro ní ki myɛ ní a nǎnbèle pèle tan wi na níì tága. Wàa maa pye bele bee ni pe i wi yiri Denisi, Aropazyi tɛ́ɛgi kútiijoowaa wii, a cewaa wɔ́ɔ̀ tága, pe i wi yiri Damarisi, n fàra pèle nikwɔɔlɔ na.