Kapyegèle 16 - Cebaara Bible 2010

Timɔte n pínɛ ní Pɔli, ní Silasi ní

¹ Koro kàdoʔo ma a Pɔli kári Dɛribe ma, ní náà kári Liisitiri ma. Pìitamawaa si maa pye yaà pe i wi yiri Timɔte, wi nɔ́ɔw maa pye Zyefuo, ní i nyɛ tágafɔlɔ, wi tóow si i nyɛ Girɛkio.

² Liisitiri ní Ikonyɔmi ye senyɛnbèle maa ni wi mɛ́ɛtaangi yiri.

³ Pɔli maa ni caa wi kári ní woro ní. A wi wi kɔ́ri n sáà wi kɛ́nɛ Zyefubèle kéele na, bele pe da pye yaà lè tɛ́ɛyi bee ni, níì cán pe myɛ maa gi cán ncan wi tóow i nyɛ Girɛkio.

⁴ Lǎli ni be forogi kěyi ni lè, a be i kérigèle nyuu ni tèé tágafɔbèle na, gele na pìitunbèle ní yɛɛ̀kinibèle da joo n bɛ̀ɛ lè Zyerusalɛmi ni níì jo paa gi kpéʔele nya.

⁵ A egilizibèle i nìrí tágali ni, a pèle i taari be na, a be i nɛʔɛgi ni maa canʔa o canʔa.

Pɔli yanyaagi, n be yaʔa Turowasi ni

⁶ Amɛɛ Pìicǎnni be yérige lè níì jo pe a kɔ́ sa Kolocɔlɔɔ syɛ́ɛnri joo Azii ni lè í, a be lúru n kári n sáà foro Firizii, ní Galasii tári ni.

⁷ A pe ga nùuni Mizii tári na, a be i caa bi jée Bitinii tári ni. Kàjáa Zyezu Pǐli ga fɔ̀lɔ pe jée yaà í.

⁸ A be foro Mizii ni n tìgi n kári Turowasi ma.

⁹ A ki ga pye yébiligi ni, a Pɔli yanyaʔa nyaa, ki maa pye Maseduwani ye nànwaa, woyéreo ní, a wi jo: «Mii pɔʔɔ, mí jeli mi pan Maseduwani ma mi ba wolo dɛ̀ɛmɛ!»

¹⁰ Pɔli yanyaagi bee kàdoʔo ma a wolo fala ni kanmaa caa bi kári Maseduwani ma, níì cán wolo maa gi fílige n cán ncan Kolocɔlɔɔ wi wolo yeri yaà, wolo í kári sa Syɛɛnjóocǎnri joo be ma.

Lidii n tága Kàfɔw na, n be yaʔa Filipikaʔa ni

¹¹ A wolo jée bàtowaa ni Turowasi taana ni syée zìnmɛ na n lǒgi jeli n kári Samotirasi ma, ki nyǐndaligi na a wolo nan Neyapolisi na,

¹² níì yiri nɛɛ bee n kári Filipikaʔa ma, kěgi bee i nyɛ Maseduwani tɛ́nɛmi kèkpɔʔɔ, ní wɔ́ɔ i nyɛ Wɔrɔmi ye kèkòrogaa. A wolo canyaa kwɔ́ɔ yaà kěgi bee ni.

¹³ A Zyefubèle cândɛnɛgɛ canʔa ga nan, a wolo yiri kěgi ni n kári cábigi ma, ní i sɔ̀ngí dɔ̀ʔɔ́ pe a ra Kolocɔlɔɔ nyɛ́ɛri nɛɛ bee. A wolo zǐn sáà cébèle pèle nyaa a be i peyɛɛ gbóʔoro yaà, a wolo tɛ́ɛn ni nyuu ní be ní.

¹⁴ Cewaa maa pye yaà be ni Tyatiiri ye wóo, wi maa ni fɛ̀ɛgí Kolocɔlɔɔ na pe i wi yiri Lidii. Wi maa pye fàninyɛɛɔn párafɔlɔ. Woro maa wi líiyi cáan ni Pɔli syɛ́ɛnri lúro, a Kàfɔw wi fúngi múgu, koro ga pye wi tága di na si di cò.

¹⁵ A woro ní wi kpáagi wòolo batɛmiw kpéʔele, a wi náà wolo nyɛ́ɛri níì jo: «Yele ga ni mii córo tágafɔlɔ Kàfɔw ni, ye mii pɔʔɔ, yé sa tìrige mii kpaʔa ma.» A wi joo n wári wolo na, a wolo fɔ̀lɔ.

Pɔli ye leli kéele kàsow ni Filipikaʔa ni

¹⁶ Cangaa wolo maa ni syée Kolocɔlɔɔ tɛɛ̀nyɛɛrigi ni, a wolo sáà fàra ní pulocewaa ní, màdeo maa pye wi ni a wi i kérigèle nyaagi ni nyuu màdew bee báriga ni, a wi kàfɔbèle i lɔrɔ saʔa taagi nyaani bee báriga ni.

¹⁷ A wee bee taʔa wolo na, wolo ní Pɔli ní, ní i yákpoli wáa níì jo: «Nǎnbèle naa i nyɛ Kolocɔlɔw falipyebèlē wi lè Pe Myɛ Nyúngo na, poro be nyɛ syɔɔli kólogo syɛ́ɛnrɛ joofɔɔlɔ yele ma.»

¹⁸ Wi maa ni koro kpéʔele canya saʔa ni. A gi tɔ̀nɔ n kɔ́ baa Pɔli fɔ̀rɔ fúngi ni, a wi fíige wi ma níì joo ní màdew ní níì jo: «Mii a gi joo gbàn mɔ ma Zyezu Kirisi mɛ́ɛgi na, yiri céw ni.» A màdew fala n yiri wi ni lǎli bee wonijanna ni.

¹⁹ A pulocew kàfɔɔlɔ ga gi nyaa poro a ní wáli taa wi ma í, a be Pɔli ní Silasi cò n kílele n kári fànʔafɔbèle ma, beè syɛ́ɛnmi piyɛɛ gbóʔoro lè.

²⁰ Ní sáà be yérige fànʔafɔbèle yɛ́ʔɛ ma níì jo: «Nǎnbèle naa tɔ̀nɔ i wolo kěgi súrugu ni caanri. Pe i nyɛ Zyefubéle.

²¹ Pe i kalɛɛgèle kèle nyuu, gele ge lè ki ga yɛlɛ wolo í fɔ̀lɔ ge na í, pé náa kɔ́ jo wolo a ra ge kpéʔele wii í. Ncan wolo i nyɛ Wɔrɔmi ye wòolo.»

²² A syɛ́ɛnmi yìri be kurugo. A fànʔafɔbèle be búroyi kíle n wòlo be na níì pèle pye paa be kpúmɔn ní kàgbeegèle ní.

²³ A be tɔ̀nɔ n be sámaga n kpúmɔn gbanʔama ní náà be le kàsow ni níì gi joo n gbàn kàsolebèle kɔ̀rɔsiifɔlɔ ma níì jo waa be kɔ̀rɔsíi gbanʔama.

²⁴ Amɛɛ wi syɛ́ɛnri bee lóʔo lè, a wi be lége kàsokpaagi fúngo kpaagaa ni, níì be tɔ́lɔyi le le tiitangaa félege ni níì gi sɔ̀ʔɔ.

²⁵ Lǎli ni nyǐngi lɛɛ lè, a Pɔli ní Silasi i Kolocɔlɔɔ nyɛ́ɛri, ní i ŋúu ni Kolocɔlɔɔ sòoló, a kàsolebèle i gee bee lúro be ma.

²⁶ A cɛɛri ga pye, a tári fala n cúngo gbanʔama, àlí kàsokpaagi kàpɔɔn maa wɔ́ɔ̀ cúngo, a kɔ̀riyi myɛ múgu, a kàsolebèle yapwɔɔrɔ myɛ sánʔana làrinijanni ni.

²⁷ A kàsolebèle kɔ̀rɔsiifɔlɔ ga yìri níì kàsokpaagi kɔ̀riyɔ nyaa womúguyo ní, a wi wi ŋɔséew kɔ́n. Wi mǎà dée wiyɛɛ gbóo ní i sɔ̀ngí kàsolebèle n yiri n fàn.

²⁸ Kàjáa a Pɔli yákpoli wáa gbanʔama níì jo: «Mɔ a kɔ́ yafyɛn kpéʔele miyɛɛ na í, wolo myɛ i naa.»

²⁹ Lǎli bee ni a kàsolebèle kɔ̀rɔsiifɔlɔ jo paa maa ní fètinnɛ ní, níì tìn n jée n sáà kpùmɔnɔ Pɔli ní Silasi taana, ní i cɛ̀lɛ́,

³⁰ níì be kɔ́ri n yirige kàfugi na ní baa be yíbe níì jo: «Ni kàfɔɔlɔ, nyàʔá gi yɛlɛ mii í kpéʔele si syɔɔ?»

³¹ A be wi pye: «Mi tága Kàfɔw Zyezu na, mɔ a syɔɔ ní mɔ kpáagi wòolo ní.»

³² A be Kàfɔw syɛ́ɛnrɛ joo wi ma, woro ní bele myɛ ní be pye yaà lè wi kpáagi ni.

³³ A wi be kɔ́ri lǎli bee wonijanna ni yébiligi ni n sáà be kpumɔnnamiyi jée be na, níì fala n wi batɛmiw kpéʔele ní wi wóbèle myɛ ní.

³⁴ Koro kàdoʔo ma a wi kári ní be ní wi kpaʔa ma n sáà be kaan a be lìi, ní i fundaanra kpéʔele gbanʔama n fàra wi kpáagi wòolo myɛ na, àmɛɛ poro taa n tága lè Kolocɔlɔɔ na.

³⁵ A nyǐngi ga tali, a fànʔafɔbèle sùlasiibèle pèle tun kàsolebèle kɔ̀rɔsiifɔlɔ ma a be sáà wi pye: «Nǎnbèle bee yaʔa.»

³⁶ A kàsolebèle kɔ̀rɔsiifɔlɔ syɛ́ɛnri bee joo Pɔli ma níì jo: «Fànʔafɔbèle n tun naa níì jo mii í yele yaʔa. Gee bee na yele a gbǎn yiri tɔ́ɔliw ni bàā syée fûnnyinge na.»

³⁷ Kàjáa a Pɔli sùlasiibèle pye: «Amɛɛ be wolo kpúmɔn lè syɛ́ɛnbèle nyɛ́nɛ na kútii-sìnjoo ni, wolo bele wo nyɛ lè Wɔrɔmi ye wɔ́rɔbiigéle, ní níì wolo le kàsow ni, si kɔ́ wolo yirige lé làrama ni? Eʔe dɛ! Fwɔɔ poro tiimaa í ba wolo yirige.»

³⁸ A sùlasiibèle sáà syɛ́ɛnri bee joo fànʔafɔbèle ma, àmɛɛ be lóʔo lè pe i nyɛ Wɔrɔmi ye wɔ́rɔbiigèle kèle, a be fyáa,

³⁹ níì kári n sáà be sùlu, níì be yirige kàsow ni, ní wɔ́ɔ̀ be nyɛ́ɛri níì jo: «Ye wolo pɔʔɔ yé yiri kěgi ni.»

⁴⁰ A pe ga yiri kàsow ni, a be sáà jée Lidii kpáagi ni, àmɛɛ be senyɛnbèle nyaa lè, a be be kɛɛlɛ, ní náà kári.