Kapyegèle 15 - Cebaara Bible 2010

Kpóʔoroli kéele Zyerusalɛmi ma

¹ Nǎnbèle pèle maa yìri Zyude ma n ba ni senyɛnbèle tama níì jo: «Kapye yele ga kɛ́nɛw kpéʔele n yɛlɛ ní Mowizi kalɛɛli ní í, yele a gbǎn syɔɔ í.»

² Amɛɛ kàfulogi ní kàkabalagi yìri lè poro ní Pɔli ní Barinabasi níngi ni, a Egiliziw gi tímana n gi nyaa fwɔɔ Pɔli ní Barinabasi, ní poro pèle í kári Zyerusalɛmi ma bi sa pìitunbèle ní yɛɛ̀kinibèle yíbe kàkabalagi bee kéele na.

³ A Egiliziw ga be tórigo, a be sa ni forogi Fenisii, ní Samarii ni, ní i gi nyuu ni syée bele ma àmɛɛ syɛɛnfeleyaa tága lè. A gi pye fundaangbɔɔrɔ senyɛnbèle myɛ ma.

⁴ A pe ga sáà nan Zyerusalɛmi na, a Egiliziw ní pìitunbèle, ní yɛɛ̀kinibèle be sámaga n cò, gee myɛ poro gbàn n kpéʔele Kolocɔlɔɔ bárigaw ni lè, a be gee bee joo n tɛ̀ɛn be na.

⁵ Farisibèle bele pe da tága lè, a poro pèle yìri n yére níì jo, ki n yɛlɛ paa gi nyuu syɛɛnfeleyi ma si yi pye, yaa kɛ́nɛw kpéʔele yáā Mowizi làlwaw kólogo táanri.

⁶ A pìitunbèle ní yɛɛ̀kinibèle peyɛɛ gbóʔoro bi kéeli bee cɔɔnri.

⁷ Lǎli ni kàkabagi baa kpɔ́ʔɔ be níngi ni lè, a Pyɛri yìri n yére níì jo: «Ni senyɛ̀nnɛ, yele n gi cán ncan Kolocɔlɔɔ wi mii nyɛ́nɛ n wòlo yele níngi ni booma ni, koro ga pye syɛɛnfeleyi í Syɛɛnjóocǎnri lóʔo mii nyɔ́ɔgi na si tága.

⁸ Kolocɔlɔɔ wi lè syɔɔn fúngi cánvɔlɔ, wi n Pìicǎnni kaan be ma séera, àmɛɛ wi da wɔ́ɔ̀ li kaan wolo ma lè.

⁹ Wi ga wolo wàli syɛɛnfeleyi na kanmaa faala na í, níì cán wi n be fúnyi jée n mùnu tágali báriga ni.

¹⁰ Nyàʔá si na yele Kolocɔlɔɔ pingi ni wéle tɔ́ɔliw ni, ní i caa bi tugoliberi tugo pìitamabèle na, dee di lè wolo tóolɛɛbèle ní wolo tiimaa fánʔa da pye di na bi gbǎn di tugo í?

¹¹ Wolo si n tága gi na àmɛɛ wolo syɔɔ Kàfɔw Zyezu kpɔ́ʔɔri báriga ni lè, kánmi bee na be wɔ́ɔ̀ syɔɔ.»

¹² A syɛ́ɛnmi myɛ pyèri ní i lúro Barinabasi ní Pɔli ma, fɛ̀ɛ́bèle ní kakpoloyi poro gbàn n kpéʔele lè syɛɛnfeleyi nínge ni Kolocɔlɔɔ bárigaw ni, a be gee bee myɛ joo n tɛ̀ɛn be na.

¹³ Lǎli ni poro joo n kwɔ́ɔ lè, a Zyaki syɛ́ɛnri láa n gi joo níì jo:

¹⁴ «Ni senyɛ̀nnɛ, ye mii syɛ́ɛnri lóʔo! Siimɔn n gi joo wolo ma kánmee na Kolocɔlɔɔ baa gi séli ni syɛɛnfeleyi yiri lè, koro ga pye si pèle nyɛ́nɛ wòlo be níngi ni be pye woro tiimaa wòolo.

¹⁵ Kanyaajoobèle syɛ́ɛnrɛ n pínɛ ní dee bee ní, àmɛɛ gi sɛ́bɛ lè níì jo:

¹⁶ ‹Kérigèle bee kàdoʔo ma mii a lúru pan, si ba Davidi fànikpaagi yìrige kavɔn àmɛɛ gi too lè, mii a gi tɛɛ̀kalagiyi sámaga, si ní gi yìrige yérige,

¹⁷ Koro ga pye wozanbèle í da Kàfɔw caa, n fàra syɛɛnfeleyi myɛ na yee mii yeri lè yi pye mii wóyi,› gee bee Kàfɔw joo, woro wee wi kérigèle bee kpéʔele lè,

¹⁸ ní i ge tèé nlaa yaà booma ni.

¹⁹ Gee bee na bele be be fúnyi kàriga lè Kolocɔlɔɔ ma syɛɛnfeleyi nínge ni, mii nyɛ́nɛ na ki ga yɛlɛ wo bele bee fɔ̀rɔ í.

²⁰ Kàjáa wo sɛ́bɛ tórigo be ma, wó be pye paa còʔoró yasunyi nɔ́nʔɔrɔ kele na, n fàra kanɔnʔɔri, ní yacorigboori káara, ní sìsyaanw na.

²¹ Níì cán nlaa yaà làridɔɔnnɔ ni pèle i yaà kěyi myɛ ni ni syɛ́ɛnbèle tama Mowizi syɛ́ɛnri na, pe i di wéle ni nyuu Zyefubèle sérikpaaya ni cândɛnɛgi canʔa ni, cégbolo o cégbolo.»

Sɛ́bɛw be tórigo lè syɛɛnfeleyi ma yi tága lè

²² Lǎli bee ni ki maa pìitunbèle, ní yɛɛ̀kinibèle dɛ́nɛ, n fàra Egiliziw myɛ na, a be nǎnbèle pèle nyɛ́nɛ n wòlo peyɛɛ níngi ni n tun be pínɛ ní Pɔli, ní Barinabasi ní bi kári Antyɔsyi ma, Zyudi wee be yiri lè Barisabasi, woro ní Silasi ní, poro pe da nyɛ́nɛ n wòlo, pe maa pye mɛ́ɛkpoloyo fɔɔlɔ senyɛnnɛgi nínge ni.

²³ A be sɛ́bɛ kaan be ma, sɛ́bɛw bee syɛ́ɛnrɛ maa jo: «Wolo pìitunbèle, ní yɛɛ̀kinibèle, wolo wo nyɛ lè yele senyɛnbèle, wolo wo sɛ́bɛw naa tórigo yele ma, yele bele ye nyɛ lè wolo senyɛnbèle, ní si i nyɛ syɛɛnfeleyaa Antyɔsyi ni, Sirii tári, ní Silisii tári ni, wolo i yele syáanri!

²⁴ Wolo n gi lóʔo, wolo syɛ́ɛnbèle pèle n kári yaà yele ma n sáà yele sɔ̀nguri nyáʔami, níì yele fúnyi curugo yele na ní syɛɛnraa ní, bi gi taa wolo ga be tun í.

²⁵ A wolo si baa pínɛ n bɛ̀ɛ gi na bi nǎnbèle pèle nyɛ́nɛ wòlo bi tórigo yaà yele ma ní wolo syɛɛn-nidaanmabèle ní be nyɛ lè Barinabasi ní Pɔli,

²⁶ poro bele be nyɛ lè pe ga be kùúw cée í wolo Kàfɔw Zyezu Kirisi mɛ́ɛgi kéele na lè í.

²⁷ Koro na wolo Zyudi ní Silasi tun, poro tiimaa nyɔ́ɔyi a ní sa kérigèle naa wonijangéle joo yele ma.

²⁸ Níì cán ki n Pìicǎnni ní wolo myɛ dɛ́nɛ, a wo gi kɔ̀rirɔ n tímana n gi nyaa ki ga yɛlɛ wolo í kɔ́ yarigaa nikwɔɔ tugo yele na gee gi líbe n sɔ̀lɔ lè í, kapye ŋàʔanaga kérigèle naa ban í, koro ge nyɛ:

²⁹ Yasunyi káara, ní sìsyaanw, ní yacorigboori káara, ní kanɔnʔɔri ní, yaa còʔoró dee bee na. Yele ga yeyɛɛ kɔ̀rɔsíi kérigèle bee na, gee bee a nyɔɔ. Kolocɔlɔɔ í yele dɛ̀ɛmɛ.»

³⁰ Gee bee kàdoʔo ma a be náà be tórigo Antyɔsyi ma, a be sáà syɛ́ɛnmi kpóʔoro níì sɛ́bɛw kaan be ma.

³¹ Amɛɛ be sɛ́bɛw wéle lè níì kɛɛlɛli syɛ́ɛnrɛ nyaa wi ni, a gi pye be ma fundaanra.

³² Zyudi ní Silasi maa wɔ́ɔ̀ pye kanyaajoobèle pèle, a poro kɛɛlɛlɛ syɛ́ɛnrɛ saʔa joo senyɛnbèle ma n nìrimɛ le be ni.

³³ A canyaa ga kwɔ́ɔ, a senyɛnbèle be tórigo pe lúru paa syée yɛɛ̀nyinge na be tunvɔbèle ma.

³⁴ [Ki si maa Silasi dɛ́nɛ, a wi kòro yaà ní be ní.]

³⁵ Pɔli ní Barinabasi maa kòro yaà Antyɔsyi ni, a poro ní syɛ̀ɛnnɛ saʔa i syɛ́ɛnbèle tama, ní wɔ́ɔ i Kàfɔw syɛɛnjóocànra nyuu yaà.

Pɔli ní Barinabasi n láʔa peyɛɛ na

³⁶ A canyaa ga kwɔ́ɔ, a Pɔli gi joo Barinabasi ma níì jo: «Kěyee myɛ ni wolo Kàfɔw syɛ́ɛnrɛ joo n sɔ̀lɔ lè, ki n yɛlɛ wo lúru wo kári yaà wo sa senyɛnbèle wéle, wó gi cán àmɛɛ be nyɛ n sɛ́ɛ yaà lè.»

³⁷ Barinabasi si maa ni caa Zyan í kári ní poro ní, wee be wɔ́ɔ̄ yiri lè Mariki.

³⁸ Kàjáa Pɔli da ni caa pe ní wi kɔ́ri í, níì cán wi maa lúru poro kurugo Panfilii ni, wi ga fɔ̀lɔ n kári ní poro ní fáliw ma í.

³⁹ A kàkabalagi bee kpɔ́ʔɔ be níngi ni, fwɔɔ a gee bee pye sábabu á be láʔa peyɛɛ na. A Barinabasi Mariki kɔ́ri n sáà jée bàtowaa ni bi lǒgi jeli bi kári Syipiri ma,

⁴⁰ á Pɔli si Silasi nyɛ́nɛ n wòlo n kári, a senyɛnbèle be kàlifáa Kàfɔw kpɔ́ʔɔrɔ ma.

⁴¹ A be sa ni Sirii ní Silisii tári myɛ nyaari ni egilizibèle dɛ̀ɛmɛ́ pe nìri.