Kapyegèle 14 - Cebaara Bible 2010

Pɔli ní Barinabasi i nyɛ Ikonyɔmi ni

¹ A pe ga nan Ikonyɔmi na, a Pɔli ní Barinabasi ní sáà jée Zyefubèle sérikpaʔa ni n joo be ma, fwɔɔ a Zyefubèle pèle ní Girɛkibèle pèle saʔa tága.

² Kàjáa Zyefubèle be lè pe ga fɔ̀lɔ n tága í, a poro syɛɛnfeleyi sɔ́ɔn n wáa senyɛnbèle na.

³ A be sèʔê làla saʔa kwɔ́ɔ Ikonyɔmi ni, níì soro n yére ni nyuu yaà, ncan pe maa be sɔ̀ngumi yaʔa Kàfɔw na, woro wee wi da ni wi kpɔ́ʔɔri syɛ́ɛnrɛ séera kpéʔele lè, níì fǎngi kaan be ma a be gbàn ni fɛ̀ɛ́bèle ní kakpoloyi kpéʔele lè.

⁴ A kěgi syɛ̀ɛnnɛ tíla, pèle n pye ní Zyefubèle ní, á bele pye ní pìitunbèle ní.

⁵ A syɛɛnfeleyi, ní Zyefubèle, ní be kùndigibèle peyɛɛ gbóʔoro níì jo poro a pìitunbèle wɔʔɔ, si be wábagi kpóo ní kàdɛnɛrɛ ní.

⁶ A Pɔli ní Barinabasi ga gee bee cán, a be fàn n kári Likawonii tári kèyaa ma be yiri lè Liisitiri ní Dɛribe, n fàra yi taana kěyi na

⁷ n sa ni Syɛɛnjóocǎnri nyuu yaà.

Pɔli ní Barinabasi i nyɛ Liisitiri ni

⁸ Nànwaa maa pye Liisitiri ni, a be wi see nya womɔngɔɔ ní, wi da kɔ́ɔ̀ tánʔa n nyaa nyáana í.

⁹ Wi maa líiyi cáan ni Pɔli syɛ́ɛnri lúro, a Pɔli yɛ́ɛgi le wi ni ni wi wéle níì gi nyaa tágala i nyɛ wi ma bi gbǎn pɔʔɔ,

¹⁰ a wi gi joo wi ma ní yákpogbɔɔlɔ ní níì wi pye: «Yìri mi yére céri mɔ tɔ́lɔyi na.» A wi ye n yìri ni táanri.

¹¹ A syɛ́ɛnmi ga kéeli bee nyaa lee Pɔli kpéʔele lè, a pi i gi nyuu ni yákpogèle wáa Likawonii ye syɛ́ɛnri ni níì jo: «Kolocɔlɔbèle pèle n tìgi naa wolo ma àmɛɛ syɛ̀ɛnnɛ nyɛ lè.»

¹² A be mɛ́ɛyɛ le be na ni Barinabasi yiri Zusi, ní i Pɔli yiri Hɛrimɛsi, níì cán woro wi da ni nyuu be ma.

¹³ Zusi tɛɛkpɔʔɔrɔgi maa pye kěgi kpàánweele nyɔ́ɔ na, a tɛ́ɛgi bee sáriga-wòlowaa i maa ní náapɛʔɛlɛ, ní fílɛɛri ní kpàánweeli kɔ̀riyɔ ma, níì cán wee bee ní syɛ́ɛnmi maa ni caa bi sáriga wòlo.

¹⁴ A pìitunbèle ga gee bee lóʔo pe lè Barinabasi ní Pɔli, a pe be búroyi sulugu, níì fàn n sáà jée syɛ́ɛnmi nínge ni, níì yákpogèle wáa gbanʔama

¹⁵ níì jo: «A syɛ̀ɛnnɛ, nyàʔá na yele gee naa kpéʔele? Wolo wɔ́ɔ i nyɛ syɛ̀ɛnnɛ àmɛɛ yele nyɛ lè, wolo n pan ba Syɛɛnjóocǎnri joo yele ma koro ga pye yele í láʔa tɔ̀nɔ fun kérigèle naa na, si kàri Kolocɔlɔɔ woweew ma, woro wee wi nyɛ̀ʔɛni faan lè, n fàra tári, ní sólomi lɔ̀ʔɔ, ní di fúnyi yárira myɛ na.

¹⁶ Booma ni wi maa syɛɛnfeleyi yaʔa a yi i yi nyɛnɛ kóloyi táanri.

¹⁷ Koro ní ki myɛ ní wi ga wi séeraw kpéʔelele yaʔa í, wi i kacǎngèle kpéʔele, àmɛɛ wi zěgi yaari ki i yìrigí nyɛ̀ʔɛni na ni tuun yele ma lè, ní wɔ́ɔ i yaliiri làrilaala kaangi yele ma, koro ga pye yele í da yaliire saʔa taagi, fundaanra si pye yele ni.»

¹⁸ Alí syɛ́ɛnri bee joolo ní ki myɛ ní, ki maa kòro cɛɛri Pɔli ye si a dée fanʔa taa syɛ́ɛnmi na bi bi yérige sárigaw bee wòlolo na poro ma í.

¹⁹ Lǎli bee ni a Zyefubèle pèle yìri Antyɔsyi, ní Ikonyɔmi ma n pan n baa syɛ́ɛnbèle nyúnyo kàriga, a be Pɔli wábagi ní kàdɛnɛri ní, níì wi cò n fulolo n yirige kàjegi ni, ní i sɔ̀ngí wi n kùu.

²⁰ A pìitamabèle sáà yére n wi màʔa. Lǎli bee ni a wi yìri n jée kěgi ni. Ki nyǐndaligi na a woro ní Barinabasi kári Dɛribe ma.

Pe lúrugarili Antyɔsyi ma ki lè Sirii wógi

²¹ A be sáà Syɛɛnjóocǎnri joo kěgi bee ni n pìitamabéle saʔa taa, koro kàdoʔo ma a be lúru n kári Liisitiri, ní Ikonyɔmi, ní Antyɔsyi ma

²² n sa ni pìitamabèle zɔ̀nbēle nìrí, ní i be kɛɛlɛ níì jo be tágali cò kányɛʔɛ ni, ní wɔ́ɔ i gi nyuu be ma níì jo: «Wɔʔɔyɔ féleye saʔa a wo taa, wó náa jée Kolocɔlɔɔ fǎngi ni.»

²³ A be yɛɛ̀kinibèle pèle nyɛ́nɛ n wòlo n télege télege egilizibèle nyúnyo na, níì súnw le níì nyɛ́ɛri Kolocɔlɔɔ ma, ní náà be yaʔa Kàfɔw kɔ́yɔ ni, woro wee na be tága lè.

²⁴ Koro kàdoʔo ma a be foro Pisidii ni n kári Panfilii ma

²⁵ n sa ni Kolocɔlɔɔ syɛ́ɛnri nyuu Pɛrizyi ni, níì yiri nɛɛ bee n kári Atalii ma.

²⁶ A be sáà jée bàtowaa ni nɛɛ bee n kári Antyɔsyi ma, kěgee ni pe da bɛ̀ɛ be na lè níì be tórigo fáliw ma Kolocɔlɔɔ kpɔ́ʔɔri kéele na, wee be sáà kpéʔele n kwɔ́ɔ lè.

²⁷ Lǎli ni be nan yaà lè, a be Egiliziw kpóʔoro, kérigèle gele Kolocɔlɔɔ kpéʔele lè poro ma, ní àmɛɛ wi tágali kólogo múgu syɛɛnfeleyi ma lè, a be gee bee myɛ joo n tɛ̀ɛn be na.

²⁸ A be kòro yaà n canya saʔa kwɔ́ɔ ní pìitamabèle ní.