Kapyegèle 11 - Cebaara Bible 2010

Pyɛri n joo n tɛ̀ɛn Zyerusalɛmi tágafɔbèle na

¹ Pìitunbèle ní senyɛnbèle be pye lè Zyude ni, a poro gi lóʔo syɛɛnfeleyaa n wɔ́ɔ̀ Kolocɔlɔɔ syɛ́ɛnri lóʔo níì di cò.

² Lǎli ni Pyɛri kári lè Zyerusalɛmi ma, a kɛ́nɛkpeʔelebèle sa ni fúlo wi na

³ níì jo: «Nyàʔá na mɔ sáà jée sìngɛnɛbèle kpaʔa ni n lìi ní be ní?»

⁴ Lǎli bee ni a Pyɛri séli kérigèle bee na ni ge nyuu be ma taʔalagèlē taʔalagèlē níì jo:

⁵ «Mii maa pye ni Kolocɔlɔɔ nyɛ́ɛri kěgi ni be yiri lè Zyɔpe. A mii kɔ́ɔ̀ yarigaa nyaa yanyaʔa ni, yárigi bee maa pye àmɛɛ fànikpɔʔɔ nyɛ lè, ki maa yìri nyɛ̀ʔɛni na ni tíri ni maa, á be gi cò ki nyɔ́ɔyi sicɛrɛ na n tìrige mii ma.

⁶ A mii mii nyapiigèle còolo gi na ni wéle, a mii tɔlɔyɔ sicɛrɛ-jɛrɛ yaweeri nyaa di lè tári na, ní yacobeeyi ní, ní dee ní di fulolo lè, n fàra féjɛɛnri na.

⁷ A mii wɔ́ɔ̀ yákpolo lóʔo a li gi joo mii ma níì jo: ‹Pyɛri, yìri mi tàa kpóo maa káa.›

⁸ A mii jo: ‹Eʔe, Kàfɔw, yárigee gi nyɛ lè yanɔnʔɔgɔ wàlá yafuungo, gi kàa ga kɔ́ɔ̀ jée mii nyɔ́ɔgi ni nyáana í.›

⁹ A mii níì yákpoli lóʔo nyɛ̀ʔɛni na tɔziin wógi na a li jo: ‹Yárigee Kolocɔlɔɔ sámaga lè a gi nyɔɔ, ki ga yɛlɛ mɔ í da gi wéle yanɔnʔɔgɔ í.›

¹⁰ A gee bee kpéʔele n taa tɔlɔyɔ taanri. Koro kàdoʔo ma a gi níì yìri ní yáriri bee myɛ ní n lúgu nyɛ̀ʔɛni na.

¹¹ Wéle, lǎli bee wonijanna ni a nànbēle taanri pan n baa yére kpáagi taana, gee ni mii pye lè, pe maa yìri Sezarikaʔa ma, wàa wi da be tun mii ma.

¹² A Pìicǎnni jo mii í da syée ní be ní, mii a kɔ́ ra niyɛɛ gábala í. A senyɛnbèle naa kɔrɔni wɔ́ɔ̀ pínɛ n kári ní mii ní, a wolo sáà jée nǎnw bee kpaʔa ni.

¹³ A wi gi joo n tɛ̀ɛn wolo na àmɛɛ woro da nyɛ̀ʔɛni tunduɔn nyaa lè woyéreo ní woro kpáagi ni, á wi woro pye: ‹Tun Zyɔpe ma pe sa Siimɔn yeri, wee be yiri lè Pyɛri.

¹⁴ Wi a ba syɛɛnraa joo mɔ ma, dee báriga ni mɔ a syɔɔ lè ní mɔ kpáagi wòolo myɛ ní.›

¹⁵ Lǎli ni mii baa syɛ́ɛnri séli ni nyuu lè, a Pìicǎnni tìgi be ma àmɛɛ li da wɔ́ɔ̀ tìgi wolo ma lè booma ni.

¹⁶ A mii fala n Kàfɔw syɛɛnjóoro sɔ̀ngi n taa dee wi da joo lè níì jo: ‹Zyan maa tɔ̀nɔ ni syɛ́ɛnbèle batize lǒgi ni, kàjáa Kolocɔlɔɔ a ba ra yele batize ní Pìicǎnni ní.›

¹⁷ Wolo bele wo tága lè Kàfɔw Zyezu Kirisi na, á Kolocɔlɔɔ yakaangi kaan wolo ma, kapye wi n wɔ́ɔ̀ wolo wógi félege kaan bele bee ma, mii si wi nyɛ wìí, mii í Kolocɔlɔɔ yérige?»

¹⁸ Lǎli ni pe syɛ́ɛnri bee lóʔo lè, a be fúnyi nyíngi be na, a be i Kolocɔlɔɔ kpɔ̀ʔɔrɔ́ níì jo: «Jàʔá Kolocɔlɔɔ n gi yaʔa syɛɛnfeleyi í wɔ́ɔ ra kàdoʔo wáa yi kapeegèle ma koro ga pye yi sìíw taa.»

Antyɔsyi Egiliziw kéele

¹⁹ Wɔʔɔli li da too lè tágafɔbèle na Etyɛni kpóoli kàdoʔo ma, bele pe da cariga lè wɔʔɔli bee kéele na, a be kári fwɔɔ n sáà nan Fenisii, ní Syipiri, ní Antyɔsyi na. Pe si da ni Kolocɔlɔɔ syɛ́ɛnri nyuu syɔɔn faala ma í, kapye Zyefubèle yagwɔɔlɔ ma ban í.

²⁰ Nǎnbèle pèle si maa pye be ni Syipiri ye, ní Sirɛni ye wòolo, a bele bee ga nan Antyɔsyi na, a be wɔ́ɔ sa ni Kàfɔw Zyezu Syɛɛnjóocǎnri nyuu Girɛkibèle ma.

²¹ Kàfɔw si maa ni be dɛ̀ɛmɛ́ ní wi séew ní, a syɛ̀ɛnnɛ saʔa tága níì kàri n taʔa Kàfɔw na.

²² A syɛ́ɛnri bee ga nan Zyerusalɛmi Egiliziw na, a be Barinabasi tórigo yaà Antyɔsyi ma.

²³ Lǎli ni wi nan yaà lè, níì gi nyaa àmɛɛ Kolocɔlɔɔ kpɔ́ʔɔri kpéʔele be ma lè, a fundaanra pye wi ni, a wi pe myɛ kɛɛlɛ níì be pye be tan Kàfɔw na ní be fúnyi myɛ ní.

²⁴ Níì cán wi maa tɔ̀nɔ n pye syɛɛncaɔn, a wi fúngi nyìn Pìicǎnni na, á wi tágali wɔ́ɔ̀ kpɔ́ʔɔ. A syɛ́ɛnbèle pèle saʔa níì fàra Kàfɔw wòolo na.

²⁵ Koro kàdoʔo ma a Barinabasi kári Tarisi ma sa Sɔli caa.

²⁶ Lǎli ni wi sáà wi nyaa lè, a wi wi kɔ́ri n kári Antyɔsyi ma, a be sa ni peyɛɛ gbóʔoro ní Egiliziw ní, ní i syɛ̀ɛnnɛ saʔa tama n yɛɛlɛ nibin kwɔ́ɔ yaà. Antyɔsyi ni gi séli a be i pìitamabèle yiri Kiretyɛnbèle.

²⁷ Cányi bee ni a kanyaajoobèle pèle yìri Zyerusalɛmi ma n kári Antyɔsyi ma.

²⁸ Pe maa ni bele bee wàa yiri Agabusi, a wee bee yìri n yére níì gi joo n tɛ̀ɛn Pìicǎnni báriga ni níì jo, kateekpɔʔɔ a kɔ́ ba too dulunyanw myɛ na. A gi wɔ́ɔ baa foro Kulodi lǎli ni.

²⁹ A pìitamabèle bɛ̀ɛ gi na bi yarigaa tórigo Zyude tári senyɛnnɛgɛ ma bi gi dɛ̀ɛmɛ, syɔɔn o syɔɔn bi yɛlɛ ní wi taaganmi ní.

³⁰ A be koro kpéʔele, níì gi le Barinabasi ní Sɔli kɔ́yi ni níì jo pe sa gi kaan yɛɛ̀kinibèle ma.