Kapyegèle 10 - Cebaara Bible 2010

Pyɛri ní Kɔrɔnɛ

¹ Nànwaa maa pye Sezarikaʔa ni pe i wi yiri Kɔrɔnɛ, wi maa pye sùlasiibéle dabata kàrigafɔlɔ, sùlasiibèle kabiga be yiri lè Italii ye wógi, gee bee ni wi da pye.

² Nǎnw bee maa ni Kolocɔlɔɔ kpɔ̀ʔɔrɔ́ ní wi kpáagi wòolo myɛ ní, ní i fɛ̀ɛgí Kolocɔlɔɔ na, ní wɔ́ɔ i foomɔfɔbèle dɛ̀ɛmɛ́ làrigēle saʔa ni, ní i nyɛ́ɛri Kolocɔlɔɔ ma làla o làla.

³ Cangaa cangàrigi na a Kɔrɔnɛ Kolocɔlɔɔ tundunwaa sámaga n nyaa yanyaʔa ni, a wi jée woro tɛ́ɛgi ni níì jo: «Kɔrɔnɛ.»

⁴ Amɛɛ fyáari Kɔrɔnɛ cò lè gbanʔama, a wi nyapiigèle le wi ni ni wéle níì wi pye: «Kàfɔw, mɛ̀ɛ́ gi nyɛ?» A tundunw wi yari: «Mɔ nyɛ́ɛrigi, ní mɔ kpɔ́ʔɔri myɛ n lúgu n nan Kolocɔlɔɔ na, a wi i sɔ̀ngí ni taagi ní di ní.

⁵ Ki n yɛlɛ mi nǎnbèle pèle tun Zyɔpe ma tɔ́ɔliw ni pe sa Siimɔn yeri, wee be yiri lè Pyɛri.

⁶ Wi n tìrige nànwaa na, pe i wi yiri Siimɔn, wi i nyɛ sali-fánʔariɔ, wi kpáagi i nyɛ sólomi lɔ̀ʔɔ taana.»

⁷ Tundunwee wi da ni nyuu lè ní Kɔrɔnɛ ní, a wi ga kári, a wi wi kpáagi falipyebèle pèle siin yeri n fàra sùlasiiwaa nibin na, wee bee maa ni fɛ̀ɛgí Kolocɔlɔɔ na, bele be kòró lè wi taana, wi maa pye poro wàa.

⁸ Gee myɛ ki da kpéʔele lè, a wi gi joo n tɛ̀ɛn be na, níì be tun Zyɔpe ma.

⁹ Ki nyǐndaligi na àmɛɛ be pye kólogi na n kɔ́ ni nùuní Zyɔpe na lè, a Pyɛri lúgu bíngi na sa Kolocɔlɔɔ nyɛ́ɛri, cángi si maa kɔ́ ni maa nyùngo ma.

¹⁰ Kateegi maa wi jáa, a wi i sɔ̀ngí bi lìi. Pe si maa sèʔê pye ni soori, a wi yarigaa nyaa yanyaʔa ni.

¹¹ A wi nyɛ̀ʔɛni nyaa a li múgu, níì yarigaa nyaa àmɛɛ fànikpɔʔɔ nyɛ lè, a be gi pwɔɔ ki nyɔ́ɔyi sicɛrɛ na. A gi i tíri ni maa n baa tɛ́ɛn tári na.

¹² Tɔ́lɔyi sicɛrɛ-jɛrɛ yaweere ti nyɛ lè tári na, ní dee ní di fulolo lè, n náà fàra féjɛɛnri na, dee bee féleye myɛ maa pye gi fúngi ni.

¹³ A wi yákpolo lóʔo a li jo: «Pyɛri, yìri mi tàa kpóo maa káa.»

¹⁴ A Pyɛri jo: «Eʔe, Kàfɔw, yárigee gi nyɛ lè yanɔnʔɔgɔ wàlá yafuungo, mii ga kɔ́ɔ̀ gi kàa káa n nyaa nyáana í.»

¹⁵ A wi níì yákpoli lóʔo tɔziin wógi na a li wi pye: «Gee Kolocɔlɔɔ sámaga lè a gi nyɔɔ, ki ga yɛlɛ mɔ í da gi wéle yanɔnʔɔgɔ í.»

¹⁶ Gee bee maa kpéʔele tɔlɔyɔ taanri. Koro kàdoʔo ma a yárigi bee lúru n kári nyɛ̀ʔɛni na terire.

¹⁷ Lǎli ni Pyɛri pye ni wiyɛɛ yíbe yanyaagi bee kɔ́rɔ kéele na lè, wéle, koro n gi taa Kɔrɔnɛ tundunbèle maa ni Siimɔn kpáagi tɛ́ʔɛ yíbe ni maa n taa n baa nan kpàánweeli nyɔ́ɔ na,

¹⁸ níì yákpogèle wáa níì jo: «Siimɔn be yiri lè Pyɛri, nɛɛ naa lé wi nyɛ?»

¹⁹ Amɛɛ Pyɛri pye ni sɔ̀ngí lè yanyaagi bee kéele na, a Pìicǎnni gi joo wi ma níì jo: «Wéle, nànbēle taanri i mɔ wéle yaà.

²⁰ Yìri mi tìgi maa syée yaà be ma, mi sa kári ní be ní, mɔ a kɔ́ ra miyɛɛ gábala í, níì cán mii wi be tun.»

²¹ A Pyɛri tìgi n kári nǎnbèle bee ma n sáà be pye: «Wee yele caa lè, woro wi nyɛ mii. Gìí na yele pan?»

²² A be wi yari: «Kɔrɔnɛ wi lè sùlasiibèle dabata kàrigafɔlɔ, wi i nyɛ syɛɛnsiɔn ní wɔ́ɔ i fɛ̀ɛgí Kolocɔlɔɔ na, a Zyefubèle myɛ i wi mɛ́ɛtaangi yiri, nyɛ̀ʔɛni tundunjanwaa n wi sàmi níì jo wi mɔ yeri mɔ í kári wi kpaʔa ma wi sa syɛɛnraa lóʔo mɔ ma.»

²³ A Pyɛri be lége kpáagi ni a be syɔ́ɔn yaà. Ki nyǐndaligi na a wi yìri ni syée ní be ní. A Zyɔpe kěgi senyɛnbèle pèle pínɛ ní wi ní.

²⁴ Cángi bee nyǐndaliga na a be jée Sezarikaʔa ni. Kɔrɔnɛ si maa wi senyɛnbèle ní wi tàannyɛn-nidaanmabèle yeri n kpóʔoro ni be sige yaà.

²⁵ Lǎli ni Pyɛri jǐn lè, a Kɔrɔnɛ yìri n sáà wi fàra, níì kpùmɔnɔ wi taana n wi kpɔ̀ʔɔrɔ.

²⁶ A Pyɛri si wi cò n yìrige níì wi pye: «Yére, mii tiimaa wɔ́ɔ i nyɛ syɔɔn.»

²⁷ A wi i nyuu ni jǐn ní Kɔrɔnɛ ní kpáagi ni, a wi ga jée, a wi syɛ̀ɛnnɛ saʔa nyaa yaà wogboʔolobéle ní.

²⁸ A wi be pye: «Yele n gi cán Zyefuo ga yɛlɛ wi pínɛ ní syɛɛnfelegaa ní í, wàlá bi jée syɛɛnfelegaa kpaʔa ni í. Kàjáa Kolocɔlɔɔ n gi tɛ̀ɛn mii na níì jo, mii a kɔ́ ra syɔɔnwaa faala wéle yapeʔe wàlá wi n nɔ́nʔɔ í.

²⁹ Gee bee na àmɛɛ yele mii yeri lè, a mii wɔ́ɔ̀ pan kàkabalaga fun. Ki n yɛlɛ ye mii kayerili nyúngo joo mii ma.»

³⁰ A Kɔrɔnɛ jo: «Ki canya sicɛrɛ wi nyɛ níjanʔa, cángi bee níbeena nyɔʔɔmɔ na mii da ni Kolocɔlɔɔ nyɛ́ɛri mii kpáagi ni cangàrigi na, ní kɔ́ɔ̀ nànwaa foo n nyaa woyéreo ní niyɛɛ daana ní buroviige ní, a ki i fíligi kere kere.

³¹ A wi mii yari: ‹Kɔrɔnɛ, Kolocɔlɔɔ n mɔ nyɛ́ɛrigi lóʔo ní wɔ́ɔ̀ sɔ̀ngi n taa ní mɔ kpɔ́ʔɔri ní.

³² Koro na, tun Zyɔpe ma pe sa Siimɔn yeri, wee be yiri lè Pyɛri. Wi n tìrige nànwaa na, pe i wi yiri Siimɔn, wi i nyɛ sali-fánʔariɔ, wi kpáagi i nyɛ sólomi lòkpɔʔɔ taana.›

³³ A mii si wɔ́ɔ̀ fala n tun mɔ ma lǎli bee wonijanna ni, mɔ panganmi n tɔ̀nɔ n nyɔɔ. Gee Kàfɔw joo mɔ ma lè wolo myɛ i naa Kolocɔlɔɔ yɛ́ʔɛ ma bi gee bee lóʔo mɔ ma tɔ́ɔliw ni.»

Pyɛri jooli kéele Kɔrɔnɛ kpáagi ni

³⁴ Lǎli bee ni a Pyɛri fala n séli ni nyuu be ma níì jo: «Kányɛʔɛ na mii n náà gi cán ncan Kolocɔlɔɔ o syɔɔnwaa yirigi wàa ni í.

³⁵ Níì cán syɛɛnfelege o syɛɛnfelege ni, syɔ́ɔnwee wi ga ni fɛ̀ɛgí lè Kolocɔlɔɔ na ní i táanri ni síngi, wee bee kéele n wi dɛ́nɛ.

³⁶ Wi n wi syɛ́ɛnri tórigo Isirayɛli ye yòdaʔayi ma, di lè yɛɛ̀nyingi syɛɛnjóocànra dee wi joo lè wo ma Zyezu Kirisi bárigaw ni, woro wee wi nyɛ lè syɛ́ɛnbèle myɛ Kàfɔlɔ.

³⁷ Kéelee li kpéʔele Zyude tári myɛ ni lè, yele n li cán, kéeli bee n séli Galile tári ni Zyan jooli kàdoʔo ma batɛmiw kéele na.

³⁸ Kolocɔlɔɔ maa Pìicǎnni ní séew tìrige Zyezu ma, wi lè Nazarɛti ye wów, wi maa ni nyaari ni kacǎngèle kpéʔele ni máari, bele be fɔ̀rɔgí lè Dàzɔɔnw kɔ́yɔ ni, ní wɔ́ɔ i bele bee myɛ poori. Níì cán Kolocɔlɔɔ maa pye ní wi ní.

³⁹ Gee myɛ wi kpéʔele lè Zyefubèle tára ni ní Zyerusalɛmi ni, wolo wo nyɛ gee bee séerabéle. Pe maa baa wi kóri tiiparigi na, a wi kùu.

⁴⁰ Kàjáa Kolocɔlɔɔ n wi nyán n yirige candaanri wógi na, níì wi yaʔa a wi wiyɛɛ dɛ̀ɛn syɛ́ɛnbèle pèle na.

⁴¹ Pe myɛ si tɔ́ɔ ban í, fwɔɔ bele Kolocɔlɔɔ da nyɛ́nɛ n wòlo lè booma ni be pye séerabéle, poro be nyɛ wolo, wolo bele wo lìi níì gbaa ní wi ní lè wi nyán-yirili kàdoʔo ma kúbèle nínge ni.

⁴² Zyezu maa tundunri joo wolo ma níì jo, wolo í da di fíligi da nyuu syɛ́ɛnbèle ma si jo, wee Kolocɔlɔɔ télege lè wi pye niweebèle ní kúbèle kútiicerio, woro wi nyɛ wee bee.

⁴³ Kanyaajoobèle myɛ maa ni wi séeraw kpéʔele níì jo: ‹Syɔ́ɔnwee faala wi ga tága lè wi na, wee bee kapeegéle kusulugo a syɔɔ wi mɛ́ɛgi báriga ni.› »

Syɛɛnfeleyaa n Pìicǎnni taa

⁴⁴ N Pyɛri yaʔa syɛ́ɛnri bee joolo na, a Pìicǎnni tìgi wi syɛ́ɛnri lóʔofɔɔlɔ myɛ ma.

⁴⁵ Tágafɔbèle bele be pan lè ní Pyɛri ní, poro bele be kɛ́nɛw kpéʔele lè, a pe myɛ i káama gi na àmɛɛ pe gi nyaa lè a Kolocɔlɔɔ wɔ́ɔ̀ yakaangi tìrige syɛɛnfeleyaa ma gi nyɛ lè Pìicǎnni.

⁴⁶ Níì cán pe maa be nyaa a be gbàn ni syɛɛnfeleraa nyuu ní i Kolocɔlɔɔ kpɔ̀ʔɔrɔ́. Lǎli bee ni a Pyɛri jo:

⁴⁷ «Bele be Pìicǎnni taa àmɛɛ wolo nyɛ lè, a gi yɛlɛ lé syɔɔn í be yérige lǒgi batɛmi kpéʔelele na?»

⁴⁸ Ní náà be pye pe be batize Zyezu Kirisi mɛ́ɛgi na. Koro kàdoʔo ma a be wi nyɛ́ɛri níì jo wi canyaa kwɔ́ɔ yaà ní poro ní.