Kapyegèle 1 - Cebaara Bible 2010

Pe n Pìicǎnni nyɔ́ɔ fàli pìitunbèle ma

^1-2 Teofiili, fáliw myɛ ní tamani myɛ Zyezu da ni kpéʔele lè nlaa gi sélimi na fwɔɔ n taa n baa nan wi làrilúguli na, mii n dee bee sɛ́bɛ mii sɛ́bɛseliw ni. Sáni wi lúgu nyɛ̀ʔɛni na lè, wi maa wi tundunri kaan pìitunbèle ma Pìicǎnni báriga ni, poro bele wi da nyɛ́nɛ n wòlo lè.

³ Poro na wi wɔ́ɔ̀ wiyɛɛ dɛ̀ɛn wi wɔʔɔguuli kàdoʔo ma woweeo ní fɛ̀ɛbēle saʔa báriga ni. Pe maa ni wi nyaagi canya togoye siin fúngo ni, a wi i Kolocɔlɔɔ fǎngi kéele nyuu be ma.

⁴ Cangaa pe maa peyɛɛ gbóʔoro ni líi, Zyezu si i nyɛ ní be ní, a wi be pye: «Yele a kɔ́ yiri Zyerusalɛmi ni í, Tofɔw nyɔɔfaliga kéele mii da ni nyuu yele ma lè, fwɔɔ ye kòro yaa gee bee sige.

⁵ Níì cán Zyan maa ni syɛ́ɛnbèle batize lǒgi ni, kàjáa canya cɛɛri ga kwɔ́ɔ, Kolocɔlɔɔ a ba yele batize ní Pìicǎnni ní.»

Zyezu lúguli kéele nyɛ̀ʔɛni na

⁶ Pe maa níì peyɛɛ gbóʔoro tɛɛgaa ni, a be wi yíbe níì jo: «Kàfɔw, lǎli naa ni lé mɔ a ní Isirayɛli ye fǎngi télege be ma láà ba mɛ̀ɛ́?»

⁷ A wi be yari: «Yele má ban gi nyɛ yele í làrigèle cán í, gele Tofɔw kɔ̀rirɔ n tímana wi tiimaa séew báriga ni lè í.

⁸ Kàjáa Pìicǎnni ga pan yele ma lǎlee ni lè, yele a fànʔa taa bi pye mii séerabéle Zyerusalɛmi ni, ní Zyude tári myɛ, ní Samarii tári ní, bi taa sa nan tári láʔala na.»

⁹ Kérigèle bee joolo kadoʔo ma a Kolocɔlɔɔ wi yìrige n lúrugo ǹjogi ni, a be i wi wéle n taa a fàfaangaa sáà wi làriga be na.

¹⁰ Amɛɛ pe da yére n kòro ni wéle nyɛ̀ʔɛni na lè wí i lúru, a be kɔ́ɔ̀ nànbēle siin foo n nyaa peyɛɛ daana woyérebéle ní, ní buroviiye ní.

¹¹ A bele bee be pye: «Yele Galile ye nǎnbèle, nyàʔá na yele yére ni wéle nyɛ̀ʔɛni na nya? Zyezuwee Kolocɔlɔɔ yirige lè yele níngi ni n lúrugo nyɛ̀ʔɛni na, àmɛɛ yele wi nyaa a wi i lúru nyɛ̀ʔɛni na lè, ànbée wi a ní kɔ́ lúru pan.»

Wee be láa Zyudasi sìndɛɛgi ni lè

¹² Lǎli bee ni a be tìgi nyanbelegi na gee be yiri lè Olivye tíiri nyanbelege n lúru n kári Zyerusalɛmi ma, nyanbelegi bee da léeli Zyerusalɛmi na í, ki maa pye Zyefubèle cândɛnɛgɛ canʔa tɛɛ̀tanʔa-láʔala.

¹³ Lǎli ni be sáà nan Zyerusalɛmi na lè, a be lúgu n jée kpaataʔagi ni, beè pe da ni kòró lè. Syɛ́ɛnbèle bee pe da pye Pyɛri, ní Zyan, ní Zyaki, ní Andire, ní Filipi, ní Toma, ní Baritelemii, ní Matye, ní Zyaki wi lè Alife jáaw, ní Siimɔn Zelɔti, ní Zyudi wi lè Zyaki jáaw.

¹⁴ A pe myɛ bɛ̀ɛ nibin na níì kòro ni Kolocɔlɔɔ nyɛ́ɛri ní cébèle ní, n fàra Zyezu nɔ́ɔw Marii, ní Zyezu cɔnɔbèle na, bele be lè nǎnbèle.

¹⁵ Cányi bee ni a Pyɛri kɔ́ɔ̀ yìri n yére senyɛnbèle nínge ni. (Bele pe da peyɛɛ gbóʔoro yaà lè, pe maa togoye kɔrɔni félege kwɔ́ɔ.) A wi be pye:

¹⁶ «Ni senyɛ̀nnɛ, Kolocɔlɔɔ syɛɛnsɛbɛri Pìicǎnni da lége lè Davidi nyɔ́ɔgi ni booma ni a wi di joo Zyudasi kéeli na lè, woro wee wi da kíni lè Zyezu còvɔbèle yɛ́ʔɛ na, ŋàʔanaga ki da pye fwɔɔ syɛ́ɛnri bee í dée foro.

¹⁷ Wi maa ni córo wolo ni, á wi wɔ́ɔ̀ pínɛ ni báara ní wolo ní fáliw naa ni.

¹⁸ A wee bee si sáà tára syɔɔ ní wi kapeebyeri sàra ní. Koro kàdoʔo ma a wi too n yɛ́ɛgi cíbele, a fícɛnni folo, a wi láari myɛ yiri n cariga.

¹⁹ A Zyerusalɛmi syɛ́ɛnbèle myɛ baa kéeli bee cán, ní i tɛ́ɛgi bee yiri be syɛ́ɛnri ni Akɛlidama, ki kɔ́rɔw wi nyɛ Sìsyaanw Tára.

²⁰ Ki maa sɛ́bɛ Ŋúnuyi Sɛ́bɛ ni níì jo: ‹Ki n yɛlɛ wi kàcooli í kàri gurubɛɛrɛ. Ki ga yɛlɛ wàa faala í ní kòro li ni í.› ní níì jo: ‹Fáliwee pe da kàlifáa wi ma lè, Ki n yɛlɛ wàa nikwɔɔ í wi láa.›

^21-22 Koro na gi yɛlɛ wolo í wàa nyɛ́nɛ wòlo wi pye wolo séerafɔ-nyɛ́nnɛ Zyezu nyán-yirili kéele na, bele si pe da pínɛ n pye ní wolo ní lè lǎli ni Kàfɔw Zyezu pye wolo níngi ni lè nlaa Zyan da ni syɛ́ɛnbèle batize lè n taa n baa nan Zyezu cânlúgugi na, ki n yɛlɛ gi pye bele bee wàa.»

²³ A be syɛ̀ɛnnɛ siin tɛ̀ɛn, poro be nyɛ Zyozɛfu be yiri lè Barisabasi ní wɔ́ɔ i wi yiri Zyusitusi, ní i wee yiri Matyasi.

²⁴ A be nyɛ́ɛri be kéeli na níì jo: «Kàfɔw, mɔ wi nyɛ lè syɛ́ɛnbèle myɛ fúnyo cánvɔlɔ, wee mɔ nyɛ́nɛ n wòlo lè syɛ́ɛnbèle naa siin ni, mi wee bee tɛ̀ɛn wolo na,

²⁵ koro ga pye wi pye fáliw naa kpéʔelefɔlɔ, si wɔ́ɔ pye pìituɔn Zyudasi sìndɛɛgi ni, woro wee wi fáliw naa cée lè níì kári wi nyɛnɛ tɛ́ɛgi ma.»

²⁶ A be gɔ̌nw wáa be kéeli na a gɔ̌nw Matyasi tɛ̀ɛn, a be wi fàra pìitunbèle kɛɛ ní nibin na.