Zyɔbi 9 - Cebaara Bible 2010

Zyɔbi syɛɛnlurugori: Kolocɔlɔɔ fǎngi n kpɔ́ʔɔ n tóro mii na

¹ A Zyɔbi wi yari:

² «Kányɛʔɛ na, mii n tɔ̀nɔ n gi cán ànbée gi nyɛ. Mɛ̀ɛ́ si syɔɔn a gbǎn sín Kolocɔlɔɔ yɛ́ʔɛ ma?

³ Syɔɔn ga ni caa bi kàkabalaga pye ní wi ní, àlí pe ga joo yariya saala kagunɔ kéele na, wi a gbǎn syɛɛnlurugoro taa kaan ki kàa nibin kéele na í.

⁴ Woro má sícilimi, ní séew myɛ nyɛ. Wìí wi a soro yére wi sige si kòro sìnwɔʔɔ ni?

⁵ Wi i nyanbeleyi yìrigí yi tɛɛ̀tɛ́nɛyi ni yi dèére ni. Wi fundanʔaratɔw i yi wáa ni cíbele.

⁶ Wi i tári cúngu ni yìrigí di kàpɔɔnw na, a di gàángèle i cɛ̀lɛ́.

⁷ Wi i nyuu ni gbàngí cángi ma, cángi o yirigi í. Wi i ŋɔripiigèle tɔ́ngi.

⁸ Woro nibin wi nyɛ̀ʔɛgèle caragi, ní i táanri sólomi lɔ̀ʔɔ ǹjoʔo ni.

⁹ Woro wi Ursi ŋɔripiigèle, ní Ŋɔrisyɔɔnw, ní Gòkuruw sámaga, n fàra Wòrogulo kàbangi ŋɔripiigéle na.

¹⁰ Wi i kakpolo-kpèleye kpéʔele, yee yi lè yi a gbǎn tímana bi cán í, ní córomɔ fun bingaari kèlē.

¹¹ Wéle, wi i sɔ̀lɔ́ mii taana, mii si o wi nyaagi í, wi i syée, mii o yafyɛn cángi gi ni í.

¹² Wi ga yarigaa cò bi kári, wìí wi a gbǎn wi yérige? Wìí wi a wi pye: ‹Nyàʔá mɔ kpéʔele?›

¹³ Kolocɔlɔɔ o wi fundanʔari yaari í. Nɛ̀ɛnyɛnɛgi fɔ́lɔ tɛɛ̀sigiye i tuun wi yɛʔɛ̀ ma.

¹⁴ N náa kɔ́ɔ̀ yére mii na, mɛ̀ɛ́ mii a syɛɛnlurugoro kaan wi ma bi sɛ́ɛ? Syɛɛnrìí mii a nyɛ́nɛ wòlo wi yɛʔɛ̀ ma?

¹⁵ Mii ga maa caà pye syɛɛnsiɔn, mii a dée syɛɛnlurugoro kaan í, mii a dée mii kútiiceriw nyɛ́ɛri gbanʔama.

¹⁶ Mii ga maa yeri, á wi syɔɔ mii ma, mii mǎà dée sèʔé tága gi na bi jo wi n wi líiyi cáan n mii yákpoli lóʔo í,

¹⁷ woro wee wi mii tɔ́nʔɔnɔ káfalakpɔʔɔ ni lè, ní i mii kpàliyi nɛʔɛgi lè nyùngo fun,

¹⁸ woro wee wi lè wi o mii yaari mii i ŋɔ́ngi í, níì cán wi i mii tíngi yasorogi na.

¹⁹ Mii ga gi le fànʔa ni, woro wi nyɛ séew fɔ́lɔ, ki si ga pye kútii kéele, wìí wi a mii tɛ̀ɛn?

²⁰ Alí mii ga maa caà sín, mii nyɔ́ɔgi mǎà dée mii kolo, mii ga maa pye kajoolo fun, ki a dée kolomɔ kaan mii ma.

²¹ A mii si i nyɛ lé kajoolo fun? Mii a gbǎn koro cán niyɛɛ ma í. Mii sìíw láa n kwɔ́ɔ mii ni.

²² Níì cán koro myɛ i nyɛ mii ma nibin. Koro na mii gi joo níì jo: ‹Wi i kajoolo fun syɔ́ɔnw kálagi ni láari yaà àmɛɛ gi wɔ́ɔ̄ kpéʔele syɛɛnpeew na lè.›

²³ Kálagila ga pàla n pan ní kùu ní, wi n ni kajoolo fun syɛ́ɛnbèle kagbanga tɛ́ʔɛ.

²⁴ Tári n le syɛɛnpeebèle kɔ́yɔ ni. Wi i fàni tɔ́ngi kútiijoobèle yɛ́ɛyɛ na. Kapye woro ban í, wìí wii?

²⁵ Mii sìíw canya n wári n sɔ̀lɔ kàfyaavaɔn na. Yi i fé ni syée kacànna sìnnyaa ni.

²⁶ Yi i sɔ̀lɔ́ kelekele àmɛɛ nyɛ́nɛri kɔ́rɔbéle nyɛ lè, ní àmɛɛ nyɔɔ̀ nyɛ, wee wi tíri bi too yarigaa na, gee wi a cò lè.

²⁷ Mii ga jo: ‹Mii i caa bi fɛ̀ʔɛ mii káyaagi jóomɔ na, bi mii funbɛɛnri yaʔa, mii yɛ́ɛgi si pye fundaanra yɛ́ʔɛ,›

²⁸ mii fɔ̀rɔyi myɛ n fyáara lége mii ni. Mii n gi cán mɔ a mii córo tɛɛlɛ fun syɔɔn í.

²⁹ Mii wi a pye kolomi fɔ́lɔ! Nyàʔá na mii niyɛɛ fɔ̀rɔgí gbanzan?

³⁰ Alí mii ga wéli lànɛɛzyiw ni, àlí mii ga mii kɔ́yi jée ní yajeʔe ní,

³¹ mɔ a sèʔé mii wáa pútɛɛ-wéegi ni. Mii a pye mii yaleri ma yanɔnʔɔgɔ.

³² Wi o nyɛ syɔɔn àmɛɛ mii nyɛ lè í, koro ga pye mii í syɛɛnlurugoro kaan wi ma í, wàlá wo pínɛ kári kútii ma í.

³³ Láʔafɔlɔ o nyɛ wo níngi ni í, wee wi a dée wi kɔ́gi taʔa wo syɛ́ɛnbèle siin na lè í.

³⁴ Wi wi kàgbeeli láʔa nya mii na, wi fyáakpɔɔri a ní kɔ́ mii kaan mii í da fɛ̀ɛgí í.

³⁵ Mii si a dée ra nyuu sìnvyaa ni wi na lǎli bee ni, ki si o nyɛ nya mii ma í.