Zyɔbi 8 - Cebaara Bible 2010

Bilidadi jooli: Kolomi i sàrá terire wàlá kàdoʔo ma

¹ Bilidadi wi lè Syuwa ye wów, a woro syɛ́ɛnri láa n gi joo níì jo:

² «Làlìí ni mɔ a syɛ́ɛnri bee yérige nya, mɔ nyɔ́ɔgi syɛɛnjóoro di nyɛ lè káfalakpɔʔɔ?

³ A Kolocɔlɔɔ i pùuní lé kútiisinw kàbaan na? Ba Séew Myɛ Kàfɔlɔ i pùuní lé sínni kàbaan na?

⁴ Ki a pye mɔ piibèle n kapeele pye wi na wii, koro na wi be kaan be kapeegèle ma.

⁵ Mɔ si na, mɔ ga ni Kolocɔlɔɔ caa, mɔ ga ni Séew Myɛ Kàfɔlɔ nyɛ́ɛri,

⁶ mɔ ga pye dìgire fun, níì sín, lǎli bee ni wi a tɔ̀nɔ́ ra mɔ kpáaw wéle si mɔ télege ŋɔ́ndaala na, sínni ni.

⁷ Mɔ kanzelimi a córo yapiipiile, pi ga tímana ní kanvɔnmee ní mɔ a ba taa lè.

⁸ Booma wóbèle yíbe, gee be tóolɛɛbèle sɛʔɛ n cán lè, mɔ sɔngumi yaʔa gi na.

⁹ Wolo i nyɛ bele cànʔaniw wòolo, wolo ga yafyɛn cán í, wolo sìíw canya i nyɛ nɛɛ naa tári na àmɛɛ kànyinnɛ nyɛ lè.

¹⁰ Bele bee a mɔ tama ì? Pe a ra be sɔ̀nguri naa nyuu da tèé, si jo:

¹¹ ‹Lònyɔɔw nyàā a gbǎn fìin lé kapye fariga o yaà í? Fǎgi nyàā a gbǎn ra yìrigí lé lɔ̀ʔɔ fun ni?

¹² Ki a pye wobungo ní, si pye sìngɔni ni, si waʔa kelekele nyàá-sangee myɛ yɛ́ʔɛ na.›

¹³ Bele myɛ be fɛ̀ʔɛ Kolocɔlɔɔ na lè, koro gi kpéʔele be na. Kánmi bee na Kolocɔlɔɔ yɛ́ʔɛnaa-sìnvyaabèle sɔ̀ngumɔ tɛɛtaʔaga a kálagi.

¹⁴ Gee na wi tága lè, ki a ceri. Wi sɔ̀ngumi tɛɛtaʔaga i nyɛ bèémaara.

¹⁵ Wi i wiyɛɛ zígi wi kpáagi na, ki si a yére í. Wi n gi cò gbanʔama, kàjáa ki a yére kòro beè í.

¹⁶ Wi n nyìn tǔnmi na cânvulɛɛli na, ní i wi káganyi cabara ni syée wi nángwɔɔw ǹjoʔo ni.

¹⁷ Wi nǐnri i jǐn ni syée kàdɛnɛ-gboolo ni. Wi i syòorí fálayi lariga ni.

¹⁸ Pe ga wi kɔ́n n yirige wi tɛ́ɛgi ni, gee bee n wi cée si jo: ‹Mii ga kɔ́ɔ̀ mɔ nyaa nyáana í!›

¹⁹ Wéle, koro gi nyɛ wi fundaanri kèlē kadoʔo. Pèle nikwɔɔlɔ si a ní fìin támiigi bee wonijanga ni.

²⁰ Wéle, Kolocɔlɔɔ a tée kajoolo fun syɔ́ɔn cée í, wi si a tée kɔlɔ̀ wáa syɛɛnpeebèle ma í.

²¹ Cɛɛri na wi a mɔ nyɔ́ɔgi nyìn fundaanri yákpowáara na. Wi a mɔ nyɔɔwari nyìn fundaanri ŋúnuyo na.

²² Fɛ̀ɛ́ri a pye mɔ parafɔbèle na burogo. Syɛɛnpeebèle fànikpaʔa si kwɔ́ɔ láʔa yaà.»