Zyɔbi 7 - Cebaara Bible 2010

Zyɔbi syɛɛnlurugori i syée: Wi kayaagi jóomɔ Kolocɔlɔɔ ma

¹ «Bi syɔɔn yaʔa naa tári na, sùlasiifali na ban wi nyɛ ì? Wi cányi o nyɛ àmɛɛ sàra-na-falipyeo wóyo nyɛ lè ì?

² Amɛɛ puloo ŋɔ́ngi ni fɔ̀ngí nyínmɛ kurugo lè, àmɛɛ sàra-na-falipyeo wi sàraw sige lè,

³ kánmi bee na mii kɔ́rigi baa pye wɔʔɔlɔ yéye, wɔʔɔgɔ yébiliye yi nyɛ mii lɛɛli.

⁴ Mii ga tɛ́nɛ̀ sínɛ, mii n jo: ‹Làlìí ni mii a yìri?› Nyǐngi si ga para, lǎli bee ni mii n tín wáa-mí-kàrigali na bi taa nyǐngi í ba tali.

⁵ Fyɛ́ɛnri ní támiigi i mii céri tɔ́ngi, mii césaligi i kɔ́nɔgi, ki i fɔ́ɔnri.

⁶ Mii sìíw canya n wári n sɔ̀lɔ kpɛ̀ɛratiiɔn lóora wáaganma na, yi i kwóo, sɔ̀ngumɔ tɛɛtaʔaga ní o yi na í.

⁷ Sɔ̀ngi mi taa gi na mi cán mii sìíw i nyɛ nyɔɔ káfalaga, mii nyapiigèle a ní kacànna nyaa í!

⁸ Nyapilee li mii wéle lè, li a ní mii nyaa í. Mɔ nyapiigèle a pye mii ni, mii si ba fɔ̀n beè.

⁹ Amɛɛ fàfanʔa caragi ni sɔ̀lɔ́ lè, kánmi bee na wee wi tíri kúbèle tɛɛkòrogo ni lè, wi a ní lúru yiri í.

¹⁰ Wi a ní lúru pan wi kpaʔa ma í, wi tɛɛkòrogi a ní wi cán í.

¹¹ Koro na mii a mii nyɔ́ɔgi tɔ́n í, n mii yaʔa mii pǐli wɔʔɔgɔ ni mii a ra nyuu, n mii yaʔa mii fúngi nyɛnigɛ ni, mii a ra mii káyaagi nyuu.

¹² A mii i nyɛ lé solomɔ lɔ́ʔɔ, wàlá sólomi lɔ̀ʔɔ yacobeegaa, á mɔ kɔ̀rɔsiifɔɔlɔ cáan mii na?

¹³ Mii ga jo: ‹Mii yasinɛgi a mii kpɛʔɛlɛ, mii kpàsaaw a mii káyaagi jóomɔ fɔlɔ,›

¹⁴ lǎli bee ni mɔ n ŋúnɔyɔ tɛ́ʔɛ n fyáakpɔɔrɔ wáa mii na, mɔ n mii fígiri ní yanyaaya ní.

¹⁵ Koro na mii caa pe mii còri yákpoli ni. Kùúw n pɔ́rɔ mii ma n sɔ̀lɔ kaceleyi naa nyáana na.

¹⁶ Mii n yɛlɛ nya! Mii a kòro beè sìi na làla o làla í. Láʔa mii na, níì cán mii sìíw canya i nyɛ nyɔɔ káfalaga.

¹⁷ Syɔɔn wi nyɛ nyàʔá, koro ga pye mɔ í wi kpɔ́ʔɔ nya? Koro ga pye mɔ fúngi í pye wi na kánmi naa na?

¹⁸ Koro ga pye mɔ í da maa bi ba ra wi wéle nyɛ̀ʔɛ nyɔ́ɔ o nyɛ̀ʔɛ nyɔ́ɔ, bàā wi sɛʔɛ da wéle làrigèle myɛ ni?

¹⁹ Làlìí ni mɔ a mɔ nyapiigèle yirige mii ni? Làlìí ni mɔ a làla yaʔa mii ma mii í mii tɛ́ɛri jɔ́ɔ?

²⁰ Ee, syɔɔn ye kɔ̀rɔsiifɔw, kapye mii n kapeele pye, nyàʔá mii pye mɔ na? Nyàʔá na mɔ mii láa n tɛ́ʔɛ ni ŋɔɔn? Nyàʔá na mii baa pye tugoro niyɛɛ na?

²¹ Nyàʔá na mɔ ga mii kapeeli kpàraco í? Nyàʔá na mɔ ga fɛ̀ʔɛ mii kolomi na í? Níì cán cɛɛri ga pye mii a sínɛ támiigi ni. Mɔ a ra mii caa, mii si a ní pye beè í.»