Zyɔbi 6 - Cebaara Bible 2010

Zyɔbi syɛɛnlurugori: Wi kayaagi jóomɔ wi tàannyɛnbèle ma

¹ A Zyɔbi wi yari:

² «Ee! Kapye pe a dée gbǎn mii funjurugori kèlē cáan cúlo na, kapye mii bɔ̀nɔw kèlē myɛ a dée gbǎn pínɛ taʔa cúlo na,

³ ti a dée líbe bi sɔ̀lɔ sólomi lɔ̀ʔɔ táminyɔɔ na. Koro na mii syɛ́ɛnri o tímana í.

⁴ Níì cán Séew Myɛ Kàfɔlɔ ŋáaya n mii fùru, mii pǐli i yi sɔ́ɔnri gbo. Kolocɔlɔɔ fyáakpɔɔri kèlē n taani n yére kapɛɛnnɛ na mii kánmi na.

⁵ A seʔe jofani i nyaan lé nyàápungo taana? A nɔ̀ɔ i fúlo lé wi nyàáliigi taana?

⁶ Yárigee gi lè tàanma fun ni, a ki a gbǎn lìi lé solomɔ fun ni? A tàanma i nyɛ lé gòcɛnnɛ pìreviimɛ ni?

⁷ Yáriri di lè mii da fɔ̀lɔ ni tángi di na í, dee ti da pye lè mii yanibɛɛnmɛri, toro ti baa pye mii yaliiri.

⁸ Ee! Ki maa yɛlɛ gee mii nyɛ́ɛri lè mii í gi taa. Kolocɔlɔɔ si mii sɔ̀ngumi tɛɛtaʔaga foro.

⁹ Ki n yɛlɛ Kolocɔlɔɔ í fɔ̀lɔ bi mii tɔ́nʔɔnɔ, wi wi kɔ́gi sánʔa wi ba mii kwɔ́ɔ wi foro.

¹⁰ Kéeli naa a dée tɔ́ɔ mii kpɛʔɛlɛ mii í ra yegi fundaanri báriga ni, àlí bi mii yaʔa wɔʔɔnaa-sìngwɔɔgi ni, loro li nyɛ àmɛɛ gi nyɛ lè mii ga Wojanw kajoolo cée í.

¹¹ Gìí gi nyɛ mii fǎngi, mii si ní da sigi? Ní mii kwɔ́ɔmi, mii si ní kòro beè sìi na?

¹² A mii fǎngi i nyɛ lé kàdɛnɛgɛ fànʔa? Ba mii céri i nyɛ lé kanyɛɛnrɛ?

¹³ Mii o nyɛ tɛɛ̀sigile fun ì? Dɛ̀ɛmɛni myɛ ga nɛnɛ n léeli mii na ì?

¹⁴ Wee wi wɔʔɔ lè, wi n yɛlɛ ní wi tàannyɛnnɛ funjànga ní, àlí ki ga wírè pye wi n Séew Myɛ Kàfɔlɔ yɛ́ʔɛ fyáara yaʔa.

¹⁵ Mii senyɛnbèle si n mii jànváa àmɛɛ lòcoologo nyɛ lè, àmɛɛ lómɛɛgèlē lóyo nyɛ, yee yi kwóo lè.

¹⁶ Yi lǒyi i nɔ́ʔɔrɔ làgilasiw kéele na, lànɛɛzyiw si i nyɛ yi ni.

¹⁷ Yi i syɔɔnri ni jǐn káfugi làla ni, yi i waari làrinijanna ni, cángi naagbanga báriga ni.

¹⁸ Kùsɛɛbèle taaniya i wɛ̀ɛ́ ni be kóloyi yaari, pe i jǐn ni syée fìími tára ni ni kúu yaà.

¹⁹ Tema kùsɛɛbèle n nyapiigèle còolo n le yi ni, Saba ye be lè be kôdanʔanyɛnbèle, poro n be sɔ̀ngumi taʔa yi na.

²⁰ Fɛ̀ɛrɛ n be taa àmɛɛ pe be sɔ̀ngumi taʔa yi na lè, pe nan yaà lè, a be curugo.

²¹ Anbée yele nyɛ mii ma lǎli naa ni. Yele mii kálagigbɔɔli nyaa lè, a fyáari yele cò.

²² A mii yele pye lé. ‹Ye mii kaan yarigaa na, ye kpɔʔɔrɔ wòlo yele lɔ́ri ni ye kaan mii ma,

²³ ye mii syɔɔ mii kàsiitun-nyɛ́nw ma, ye mii yirige syɛɛntanʔabèle kɔ́yɔ ni?›

²⁴ Ye mii tama mii a pyèri. Ye gi tɛ̀ɛn mii na, gee ni mii pùuni lè.

²⁵ Kányɛɛgi syɛ́ɛnrɛ i syɔɔn kàragí, kàjáa nyàʔá yele fúloli tèé?

²⁶ A yele sɔ̀ngí lé bi mii faʔa mii syɛ́ɛnri joomɔ na wii? Wee sɔ̀ngumɔ tɛɛtaʔaga gi kwɔ́ɔ lè bi woro syɛ́ɛnri córo lé káfalaga?

²⁷ Yele n fɔ̀lɔ bi gɔ̌nw wáa círio kéeli na, àlí bi yele tàannyɛnw pára lɔdaanra na.

²⁸ Awá, yaa mii wéle. Mii a tée finɛ yele yɛ́ʔɛ ma nyáana í.

²⁹ Koro na ye kàri, yele a kɔ́ pye syɛɛnnaa-sìnzinbéle í. Ye ní ye kàri, ye gi cán mii sínni sèʔé i naa!

³⁰ A sìnzinmɛ i nyɛ lé mii nyínni na? Mii nyɔ́ɔgi ga gbàn ni kapeʔe cángi ni wɛ̀ɛ́ ì?