Zyɔbi 42 - Cebaara Bible 2010

Zyɔbi n wi fànjɛrɛri kéele fílige n joo

¹ A Zyɔbi syɛɛnlurugori kaan Yawe ma níì jo:

² «Mii n gi cán mɔ fánʔa i nyɛ ki myɛ na, gee mɔ ga tímana lè, ki a gbǎn mɔ jáa í.

³ Mɔ n jo: ‹Wee wi mii kakɔrirɔgèle kàragí lè yébilimɛ kanaa-sìnjánmi báriga ni, wìí syɔ́ɔn wii?› Ee kányɛʔɛ gii, mii n jée gi ni ki sìnján ni, bìngaara kele gɛɛ, gele ge kpólo n sɔ̀lɔ mii na lè, mii ga ge cán í.

⁴ Mɔ n jo: ‹Lóʔo mii ma, mii si joo. Mii a mɔ yíbe, mɔ si syɛɛnlurugori kaan mii ma.›

⁵ Mii líiweeli maa mɔ kéeli lóʔo, kàjáa tɔ́ɔliw ni mii nyapiigèle n mɔ nyaa.

⁶ Koro na mii n kolomɔ kaan niyɛɛ ma, níì kàdoʔo wáa mii kapeegèle ma, níì tɛ́ɛn támiigi, ní cɔ́ɔngi ni.»

YAWE N NII ZYƆBI KPƆʔƆ

⁷ Lǎli ni Yawe syɛ́ɛnri bee joo n kwɔ́ɔ Zyɔbi ma lè, a Yawe gi joo Elifazi ma, wi lè Teman ye wów, níì wi pye: «Mii fúngi n tanʔa mɔ ní mɔ taannyɛnbèle bele siin kurugo gbanʔama, níì cán yele ga sín n joo mii kéeli na àmɛɛ mii falipyew Zyɔbi gi kpéʔele lè í.

⁸ Ye náapɛʔɛlɛ kɔrɔsiin ní bàpɔɔlɔ kɔrɔsiin cò tɔ́ɔliw ni ye kári mii falipyew Zyɔbi ma ye sa wòlo yeyɛɛ kéeli na sáriga-sórigoo. Mii falipyew Zyɔbi a nyɛ́ɛri yele kéeli na, woro mii a wéle mii si a yele cò bi yɛlɛ ní yele cúromi kapyele ní í, yele bele ye nyɛ lè ye ga sín n joo mii kéeli na àmɛɛ mii falipyew Zyɔbi gi kpéʔele lè í.»

⁹ A Teman ye Elifazi, ní Syuwa ye Bilidadi ní Naama ye Sofari kári n sáà gi kpéʔele àmɛɛ Yawe da gi joo lè. A Yawe sɔ̀ngi Zyɔbi kéeli na.

¹⁰ Lǎli ni Zyɔbi nyɛ́ɛri wi tàannyɛnbèle kéele na lè, a Yawe Zyɔbi lúrugo n pye wi kanlɛɛmi na: Yáriree myɛ ti da pye wi ma lè, a Yawe di tɛɛyɛ siin-ziin kaan wi ma.

¹¹ A wi senyɛnnǎnbèle myɛ, ní wi senyɛnjebèle myɛ, ní wi cánvɔlɛɛbèle myɛ pan wi ma n baa lìi ní wi ní wi kpáagi ni. A be wi kéeli yáa, ní wɔ́ɔ̀ wi kpɛʔɛlɛ wɔʔɔyi myɛ kéele na, yee Yawe da yaʔa a yi too wi na lè, koro kàdoʔo ma, a pe myɛ nibin nibin wálifiio támabéle nibin nibin kaan wi ma, ní tɛɛ̀ vèʔebēle nibin nibin.

¹² A Yawe dùba taʔa Zyɔbi sìíw wozaɔn na n sɔ̀lɔ wozeliw na. A wi bàala selebingéle kɔrɔsiin taa, ní fàlibaaya selebingéle taanri, ní nìpɛ́ɛribéle saala kagunɔ, ní jòfanicaaya saala kagunɔ.

¹³ A wi wɔ́ɔ̀ nànbiigéle kɔrɔsiin ní calipiigèlē taanri see.

¹⁴ A wi i calipiilɛɛli mɛ́ʔɛ yiri Yemima, ní i siin wóli mɛ́ʔɛ yiri Kesya, ní i taanri wóli mɛ́ʔɛ yiri Kɛrɛn-Hapuki.

¹⁵ Cecànbēle ga pye yaà tári myɛ ni, bele be nyɔɔ n Zyɔbi calipiigèle kwɔ́ɔ lè í. A be tóow kɔrigɔ lɛɛlɛ kaan be ma pe senyɛnnǎnbèle nínge ni.

¹⁶ Koro kàdoʔo ma a Zyɔbi níì taa yɛ̀ʔɛlɛ togoye kɔrɔsiin. Wi n wi pìíbèle ní wi pìíbèle pìibēle nyaa n baa nan yìrigēle sicɛrɛ wóli na.

¹⁷ A Zyɔbi náà kùu wolɛɛgwɔʔɔ ní, wi maa tɔ̀nɔ n lɛɛ n tín.