Zyɔbi 41 - Cebaara Bible 2010

¹ Wéle, syɔɔn ga wi sɔ̀ngumi taʔa gi na n jo woro a wi jáa, wi i wiyɛɛ váana. Wi nyaani yagana i fyáara wáa syɔɔn na.

² Syɔɔn faala a gbǎn soro yére bi wi ŋɔ́n í. Wìí syɔ́ɔn si wi a gbǎn yére bi mii sige?

³ Wìí syɔ́ɔn wi yarigaa kaan mii ma koro ga pye mii í gi sìndɛɛgi lúrugo woro ma? Nyɛ̀ʔɛgèle myɛ láara ni, yáriri myɛ i nyɛ mii wóro.

⁴ Mii a joo gi yasɛɛyi, ní gi fǎngi, ní gi céri soʔologanma nìjanra kéele na.

⁵ Wìí wi gi búrogi paʔala n wòlo gi na yɛʔɛ̀ ma? Wìí wi a jée gi kpàcɔʔɔlɔyi lariga ni?

⁶ Wìí wi gi nyɔ́ɔgi kɔ̀riyɔ múgu? Fyáakpɔɔrɔ n gi gǎnyi màʔa n kpàra.

⁷ Ki nɛ̀ɛnyɛnɛgɛ séekpɔɔw tunmɔzige-yariya n sámaga n tára yiyɛɛ na àmɛɛ fɛ̀ɛ yáriga nyɛ lè.

⁸ Yi n tára yiyɛɛ na n pye fwɔɔ káfalaga a gbǎn jée yi larigi ni í.

⁹ Yi n soʔolo soʔolo yiyɛɛ na, yi n yiyɛɛ cò, yi a gbǎn láʔa yiyɛɛ na í.

¹⁰ Ki cìregèle i gbɛ̀ɛnmɛ yirigi. Ki nyapiigèle n nyǐnjerigi nyapiikoriyo wíri.

¹¹ Naanyìnye i yirigi gi nyɔ́ɔgi ni, naànijemubéle i yirigi gi ni ni syée.

¹² Wírige i yirigi gi fínaaweegèle ni àmɛɛ káfugo yirigi kòdokanna ni li nyɛ lè naagbanga na.

¹³ Ki nyɔ́ɔgi káfalaga i naà nii kànʔana na, naanyìnge i yirigi gi nyɔ́ɔgi ni.

¹⁴ Fǎngi i nyɛ wodɛ́nʔɛ ní ki yátiigi ni, fyáara si i yegi gi yɛʔɛ̀ ma.

¹⁵ Ki céri tɛ́ɛyɛ myɛ n pínɛ n sogi tiyɛɛ na, ti n fàan tiyɛɛ na, ti a gbǎn cúngo í.

¹⁶ Ki zɔ̌nw n waʔa àmɛɛ kàdɛnɛgɛ nyɛ lè, níì nìri àmɛɛ tírege nyɛ lè.

¹⁷ Ki ga ni yìrigí lǎli ni lè, nànniriyi n ni fɛ̀ɛgí, yi n ni fé ní zɔ̀nviikɔnirɔ ní.

¹⁸ Ŋɔséew i nangi gi na, wi si o tɛɛ̀jeʔe taagi í, tàbaa, ní wɛ̀ɛlɛ, ní tunmɔrɔ búrogo a yafyɛn nyɔɔ í.

¹⁹ Túnmɔri i nyɛ gi má àmɛɛ nyàásige nyɛ lè, kanyɛɛnri i nyɛ gi má àmɛɛ tiifɔnʔɔgɔ nyɛ lè.

²⁰ Ŋaʔa o gi kaangi ki i fé í, kàvɔrɔdɛnɛyi i nyɛ gi má àmɛɛ nyàásige nyɛ lè.

²¹ Kotinnige i nyɛ gi má àmɛɛ nyàákanga nyɛ lè, ki i wɛ̀ɛ́li nyɛnimɛ tɛ́ʔɛ.

²² Sísala-fìrigeye i nyɛ ki láagi na àmɛɛ nìtege nyɛ lè, ki i sɔ̀lɔ́ fariga na.

²³ Koro ki gi yaʔa lòcurugi i kángi àmɛɛ nɛ̀ʔɛdaʔaga nyɛ lè, ki i sólomi lɔ̀ʔɔ nɔ́nʔɔma kàragí àmɛɛ kòdɔɔlɔ nyɛ, lee ni nùndanʔa yáriga sóori lè.

²⁴ Ki i gbɛ̀ɛnmɛ kóbile wóo ni yaari kiyɛɛ kàdoʔo ma. Lòcurugi ǹjoʔo n kàri àmɛɛ wolɛɛɔ ǹjoofiire nyɛ lè.

²⁵ Wàa o nyɛ gi kàfɔlɔ tári na í. Ki n sámaga nya koro ga pye ki a kɔ́ ra fɛ̀ɛgí yarigaa na í.

²⁶ Ki i yakpoloyi myɛ wéle ní nɛ̀ɛgbɔʔɔgɔ ní, ki i nyɛ kpɔ́ɔmi yaweeye myɛ fànʔafɔlɔ.»