Zyɔbi 40 - Cebaara Bible 2010

Zyɔbi má gi kòro wi syɛɛnlurugori kaan

¹ A Yawe níì syɛ́ɛnri láa n gi joo Zyɔbi ma níì jo:

² «A kàkaba-nɛʔɛgɛfɔw i caa lé bi pye kútii na ní Séew Myɛ Kàfɔlɔ ní? Wee wi kàbá ní Kolocɔlɔɔ ní lè, a syɛɛnlurugoro i nyɛ lé wi ma gee bee na?»

³ A Zyɔbi Yawe yari:

⁴ «Wéle, mii i nyɛ yapiipiile, nyàʔá mii a gbǎn joo mɔ ma? Mii a kɔ́gi tɔ́n mii nyɔ́ɔgi na.

⁵ Mii n joo tɔlɔgɔ nibin, mii a ní syɛɛnlurugoro kaan í. Alí tɔlɔyɔ siin, mii a ní tàa taʔa di na í.»

A Zyɔbi i wiyɛɛ zɔ̀ngí lé Kolocɔlɔɔ?

⁶ A Yawe syɛɛnlurugori kaan Zyɔbi ma káfalakpɔɔgi nínge ni níì jo:

⁷ «Sɛntiiri pwɔɔ mɔ sárigèle ni àmɛɛ sànbalipɔlɔ nyɛ lè, mii a mɔ yíbe, mɔ si syɛɛnlurugori kaan mii ma.

⁸ A mɔ i caa lé bi tɔ̀nɔ́ mii kútiiw kéele sàa? Ba mɔ i caa lé bi mii kolo si miyɛɛ zín?

⁹ A mɔ kɔ́gi i nyɛ lé móō Kolocɔlɔɔ wógi gii? Mɔ yákpoli kàfulogo i nyɛ lé móō wi nyɛ̀ʔɛvōloli lii?

¹⁰ Miyɛɛ vère ní fǎngi, ní kpɔ́ɔmi ní, mí darigali, ní nìjanri le burogo!

¹¹ Mɔ fundanʔari kùnguruyo yàli. Nɛ̀ɛnyɛnɛgi fɔ̀ɔlɔ myɛ wéle mí be cɛ́rɛ.

¹² Nɛ̀ɛnyɛnɛgi fɔ̀ɔlɔ myɛ wéle, be kùru. Syɛɛnpeebèle myɛ tɔ́nʔɔnɔ tɛɛnijanga ni.

¹³ Pe pínɛ mi làriga támiigi ni, be tɔ́n kàsow fúngo ni.

¹⁴ Lǎli bee ni mii tiimaa a mɔ kpɔ́ʔɔ, níì cán mɔ kaliige kɔ́gi a pye mɔ syɔɔli.

Kundiriw

¹⁵ Lǒgi yaweepeʔe wéle, gee mii sámaga ní wɔ́ɔ̀ mɔ sámaga lè. Ki i nyàági káa àmɛɛ náapɛɛlɛ nyɛ lè.

¹⁶ Ki wéle! Ki bárigaw i nyɛ ki sárigèle ni, ki fǎngi i nyɛ ki fícɛnni kápanra ni.

¹⁷ Ki i gi nángi yéregi àmɛɛ sɛdiri tíige nyɛ lè. Ki céegèle kápanra n pala pala tiyɛɛ na.

¹⁸ Ki kaceleyi i nyɛ àmɛɛ kanyɛɛnrɛ kàgbeleye nyɛ lè, ki kótiiri si i nyɛ àmɛɛ tunmɔgbeleye nyɛ lè.

¹⁹ Ki i nyɛ Kolocɔlɔɔ kapyegèle yaselige. Wee wi gi sámaga lè woro n ŋɔsée kaan gi ma.

²⁰ Ki i yaliiri taagi nyanbeleyi na, beè sìnbirigi yaweere myɛ kɔ̀nʔɔ́ lè.

²¹ Ki i sìnɛ́ lotusi tíiyi láara ni, ni làrá nyɛnɛgbooyi nínge ni, fàduluyi nyɔ́ɔ na.

²² Lotusi tíiyi i yi nyínmi tɔ́ngi gi na, lòcooloyi sɔli tíiye n gi màʔa.

²³ Cábigi ga ni fóo ní fànʔa ní, koro o gáà wári gi na í. Alí Zyuridɛnw ga fóo n nan gi nyɔ́ɔgi na, ki n soro.

²⁴ Bi gi nyapiigèle yaʔa womúgugéle ní, a syɔɔn a gbǎn gi cò lé? A pe a gbǎn gi cò lé karinyanga na si gi fínaagi fùru?

Wocɔɔnw wàla diragɔnkpɔɔgi

²⁵ A mɔ a gbǎn mɛ̀ʔɛnɛ tɛ́ʔɛ lé bi wócɔɔn cò? Mɔ a gbǎn mɛɛnnɛ tɛ́ʔɛ lé bi wi nyínni pwɔɔ?

²⁶ A mɔ a gbǎn fójoò le lé wi fínaani na? Mɔ a gbǎn mɛ̀ʔɛgbɔʔɔ tɛ́ʔɛ lé bi wi kpàcɔʔɔlɔgi fùru?

²⁷ A wi a mɔ nyɛ́ɛri lé saʔa? A wi a syɛɛntaanra joo lé mɔ ma?

²⁸ A wi a joogaanna kpéʔele lé ní mɔ ní bi jo woro a pye mɔ púlo woro sìíw myɛ ni?

²⁹ Mɔ a ra kɔ̀nʔɔ́ lé ní wi ní àmɛɛ be kɔ̀nʔɔ́ ní féjɛɛnnɛ ní lè? Mɔ a wi pwɔɔ lé bi kaan mɔ calipiigèle ma kaa kɔ̀nʔɔ́?

³⁰ A pèle a gbǎn pínɛ bɛ̀ɛ lé si wi cò bi sa ra pára? A pe a gbǎn wi tíla tíla lé jàgiwáabéle na?

³¹ Mɔ a gbǎn wi césaligi tɔ́n lé ní ŋaaya ní, wàlá bi fáco kóri wi nyúngi ni?

³² Mɔ kɔ́gi taʔa mi wéle wi na. Bi mɔ sɔngumi yaʔa gbɛ̀ɛcaanri bee na, mɔ a ní li tɔziin pye í!