Zyɔbi 4 - Cebaara Bible 2010

Elifazi jooli: Syɔ́ɔnwee Kolocɔlɔɔ kpúmɔn ni kàragí lè wi i nyɛ dùba pyà

¹ Elifazi wi lè Teman ye wów, a woro syɛ́ɛnri láa n gi joo níì jo:

² «Syɔɔn ga jo bi syɛɛnrɛ joo mɔ ma a ti a mɔ bárigaw kwɔ́ɔ lé? Kàjáa wìí si wi a gbǎn wi syɛɛnrɛ yaʔa sìnjoo ni?

³ Wéle, mɔ n syɛ̀ɛnnɛ saʔa tama. Mɔ n fànʔa le báriga fun kɔ́yi ni.

⁴ Wee wi da ni kpírigi lè, mɔ syɛ́ɛnri n wi yérige, mɔ maa ni fànʔa nii yégunyee ni yi pegi lè.

⁵ Tɔ́ɔliw ni ki n nan mɔ na, a mɔ kparacogi kwɔ́ɔ! Tɔ́ɔliw ni mɔ na gi sígi wee, á mɔ fúngi myɛ curugo!

⁶ Mɔ Kolocɔlɔw yɛ́ʔɛ fyáara ban di nyɛ mɔ tɛɛ̀sigi-mí-yéreli ì? Mɔ kajoolo-funmi nàʔaganma ban bi nyɛ mɔ sɔngumi tɛɛtaʔaga ì?

⁷ Sɔ̀ngi gi na mi wéle, tɛɛlɛ fun syɔ́ɔnwìí wi kɔ́ɔ̀ kùu? Sán mɔ kɔ́ɔ̀ syɛɛnsinbéle nyaa a be kwɔ́ɔ gi ni?

⁸ Gee mii nyaa lè koro gi nyɛ: Bele be sìnzinmi fála lè, ní i péemi lùguro lúru, yasanri bee be coo.

⁹ Kolocɔlɔɔ nyɔ́ɔgi káfalaga i be kúu, wi fundanʔari káfalaga i be sórogi mɛnɛ mɛnɛ.

¹⁰ Càaraw kaanana, ní càarajogi yákpowáara i kwóo, càarabiiyi gànʔana i kabagi.

¹¹ Káari fɔ̀ngɔ i càaraɔ kúu. Càarajew pìibēle si i caragi.

¹² Syɛɛnrɛ n baa làra n joo mii ma, a mii líiweeli ti tára-nyɔ́ɔ-na joomi lóʔo.

¹³ Lǎli ni yébiligi ŋúnɔyɔ sɔ̀nguri nyáʔami lè, lǎli ni ŋúnɔgbɔɔmi pye syɔɔn ye na lè,

¹⁴ a cɛ̀lɛlɛ ní fyáara mii cò. A mii kaceleyi myɛ cúngo.

¹⁵ A pìle saanri n sɔ̀lɔ mii yɛ́ɛgi na, a mii césaligi síire i táanri mii na.

¹⁶ A wàa baa yére beè, mii ga wi kánmi wéle n cán í. Kànyinnɛ maa pye mii yɛ́ʔɛ ma, a mii tára nyɔ́ɔ jóomɔ lóʔo, a bi jo:

¹⁷ ‹Syɔɔn wi nyɛ lè yakuugo, a wi a gbǎn sín lé Kolocɔlɔɔ yɛ́ʔɛ ma? A syɔɔn a gbǎn pye lé fɔɔnrɔ fun, wee yɛ́ʔɛ ma wi wi sámaga lè?

¹⁸ Alí Kolocɔlɔɔ ga caà tága wi falipyebèle na í, wi n tɛɛpùunugēle nyaa wi nyɛ̀ʔɛni tundunbéle na,

¹⁹ n náa kɔ́ɔ̀ yére bele kéele na pe nyɛ lè wodɛ́ɛnbéle ní cóori kpaaya ni, poro bele kàpɔɔn wi nyɛ lè támiigi na, poro bele be purugu àmɛɛ fyɛnʔɛ nyɛ lè.

²⁰ Pe i kálagi bi séli nyǐngi nyɔ́ɔ na bi sa nan cângwɔɔgi nyɔɔ na, pe i kúu ki i kòró nya, syɔɔn sɔngumɔ a ní kòro be na í.

²¹ Be sìíw mɛ́ɛnnɛ n ceri. Pe i kúu sícilimɛ fun ni.›