Zyɔbi 39 - Cebaara Bible 2010

¹ A mɔ seʔe sikebèle pìibēle larizeele cán lé? A mɔ i sɔ̀ɔ́bèle nyaagi lé lǎli ni be sii lè?

² A mɔ i yéyi córo lé, yee be kwóo ní seriyi ní lè? A mɔ i be pìíbèle làrizeele cángi lé?

³ Pe i sumɔnɔ ní i be pìíbèle sii, ní i syoo pe wɔʔɔli ma.

⁴ Pe pìíbèle n ni nìrí ní i leegi peyɛɛ ma fáa, pe i léeli, pe si a ní lúru pan be nɔ́ɔbèle ma í.

⁵ Wìí wi seʔe jofaniw yaʔa wiyɛɛ ma? Wìí wi wi yapwɔɔri sánʔana wi na n yaʔa wiyɛɛ ma?

⁶ Mii wi fìími tára pye wi kpáagi, mii wi sólomi tára pye wi tɛɛkòrogi.

⁷ Wi i kěgi kafulonɛʔɛgɛ tɛ́ʔɛ, wi o nàʔafɔlɔ yákpowáara lúro í.

⁸ Wi i nyanbeleyi fé ni sɔ̀lɔ́ jàngó bàā wi yaliiri taagi, yariga o yariga gi nyɛ lè nyàápirige cére na, gee bee wi caa.

⁹ Seʔe náapeli a fɔ̀lɔ́ da báara lé mɔ ma? Li a fɔ̀lɔ́ da syɔ̀ɔ́n lé mɔ ma, mɔ yaweeri tɛɛkòrogo nyɔ́ɔ na?

¹⁰ A mɔ a gbǎn senɔ́ɔw pwɔɔ lé mɛɛnnɛ na waa sɔ̀nyɔ fála mɔ ma? A wi fála lé ní nìtege ní mɔ kurugo jǐnlɔyi ni?

¹¹ A mɔ a mɔ sɔngumi taʔa lé wi na àmɛɛ wi fǎngi nɛʔɛ lè? Mɔ a mɔ faligbanw yaʔa lé wi ma?

¹² Mɔ a miyɛɛ daʔa lé wi na bi jo wi a mɔ yaliiri láa pan, si ba di kpóʔoro mɔ kasyɔɔgi na?

¹³ Sòʔolow fókaanya i fíigi fundaanra na mɔ a jo karakpáa fókaanya síire dii.

¹⁴ Kàjáa sòʔolow i wi cárigèle yaari tári ni, ke i wáragi támiigi ni,

¹⁵ si fɛ̀ʔɛ àmɛɛ yarigaa tɔ́lɔgɔ a gbǎn ge jabagi lè, àmɛɛ sìnbirigi yaweegaa a gbǎn ge tánʔana lè.

¹⁶ Wi i gi gbàngí wi pìíbèle ma mɔ a cán wi wòolo bɛɛ í. Wi ga fyáa wɔʔɔgi na woro taa lè gbanzan í.

¹⁷ Níì cán Kolocɔlɔɔ n wi kún sícilimi na. Wi ga wi lɛɛ cánni na í.

¹⁸ Wi si ga yìri n yére bi fàn, wi n ni syɔ́ɔngi, ní syɔɔnfǎnw tɛ́ʔɛ.

¹⁹ Mɔ lé wi fǎngi kaangi syɔ́ɔngi ma, ní wɔ́ɔ i fàligi tɔ́ngi ki yátiigi ni, gee gi yìrigí lè?

²⁰ Mɔ lé wi gi pye ki i yegi àmɛɛ kúdo nyɛ lè? Ki nɛ̀ɛnyɛnɛgi kàfulogo i fyáakpɔɔrɔ wáa.

²¹ Ki i fèriyi fologi jǐnlɔgi ni ní i fundaanra kpéʔele gi fǎngi kéele na. Ki i fùurí ni kapɛɛnkpumɔnbèle fàrá.

²² Ki i fyáari kèlē tɛ́ʔɛ, ki o fɛ̀ɛgí ní i lúrugu kàdoʔo ma ŋɔséew yɛ́ʔɛ ma í.

²³ Segbogi, ní tàbaaw wi nyɛ́ʔɛnɛ lè, ní wɛ̀ɛ́li i tìngí ki lɛ̀ʔɛli ni.

²⁴ Amɛɛ gi cɛ̀lɛ́ lè nǎnmi báriga ni, ki i lariga kúunri ni yaari. Ki ga búruw wìimɛ lóʔo ki a ní gbǎn kiyɛɛ jò í.

²⁵ Tòmaagi ga tɛ́nɛ̀ wìi, ki n ni fúlo: ‹Hěè!› Ki i kapɛɛnni nùngo taagi bi gi yaʔa léelige, ki i kùndigibèle yákpogéle, ní kapɛɛnni yákpowáara lúro.

²⁶ Mɔ kacánni báriga ni lé kàgbɛɛnni yìrigí ni li fókaanyi sánʔana ni syée wòrogulo kàbangi na?

²⁷ Mɔ lé wi nyɔ́ɔw kɔ́ri a wi i yìrigí ǹjogi ni, ní sa ni wi zyàári téeri ǹjogi ni?

²⁸ Fálayi yi nyɛ wi tɛɛkòrogi, beè wi syɔ̀ɔ́n lè, fálafirigege si i nyɛ wi ma tɛɛnirige.

²⁹ Bi wi yaʔa beè, yárigi wi a cò lè, wi n ni gi kɔ̀rɔsíi, wi nyapiigèle n ni gi nyaagi bi wi yaʔa léelige.

³⁰ Wi pìíbèle i sìsyaanw gbo. Yakuuro ga pye tɛ́ɛgee ni lè, wi i yaà.»