Zyɔbi 37 - Cebaara Bible 2010

¹ Koro na mii zɔ̌nw myɛ i cɛ̀lɛ́, wi i yegi ni yìrigí wi tɛ́ɛgi ni.

² Ye lóʔo, ye wi yákpoli kàfulogo lóʔo, kàfulogbɔɔgi gi yirigi wi nyɔ́ɔgi ni lè!

³ Wi i wi nyɛ̀ʔɛni nyɛ́ʔɛnɛmɛ gbɛɛnmɛ yìrigí ni tórogi nyɛ̀ʔɛni láara tɛ́ɛyɛ myɛ ni, pi i syée fwɔɔ n sa ni nangi tári láʔagéle myɛ na.

⁴ Koro kàdoʔo ma wi kaanami n ni yirigi, níì cán wi i nyɛ̀ʔɛni tìnmɛ kpéʔele wi fǎngi yákpolo báriga ni. Wi o wi nyɛ̀ʔɛvōloli gbɛ̀ɛnmɛ có ni yéregi í, lǎli ni wi yákpoli wáama ga tɛ́nɛ̀ lóʔo lè.

⁵ Kolocɔlɔɔ i nyɛ̀ʔɛni tìnmɛ kpéʔele ní wi yákpoli ní, gee bee i nyɛ bìngaara. Wi i kakpoloyo kpéʔele, yee yi lè wolo ga yi cán í.

⁶ Wi i gi nyuu lànɛɛzyiw ma níì jo: ‹Da tuun tári na!› Ni gi nyuu zěgi ma, àlí zěkpoloyi ma.

⁷ Kánmi bee na wi syɔɔn ye kɔ́yi fáli yéregi, koro ga pye pe myɛ í cán woro kapyele lii.

⁸ Sìnbirigi yaweere i jǐn di tɛɛlarayi ni, ti i sìnɛ́ di wéeyi ni.

⁹ Káfalakpɔɔgi i yìrigí wòrogulo kàbangi na, solomɔkulo kàbangi káfalaga si i maa ní wéeri ní.

¹⁰ Kolocɔlɔɔ nyɔ́ɔgi káfalaga i gilasew sámagi, a lǒgi ǹjoʔo ma i nìrí.

¹¹ Wi i fàfaanyi nyìngí lǒgi na, fàfaangi gi nyɛ́ʔɛnɛ lè wi i gi caragi.

¹² Woro tiimaa si i yi céregi ni máari, ni yɛlɛgi ní wi kakɔrirɔgèle ní, jàngó yaa wi tundunri myɛ forogi syɛ̀ɛnnɛ tára ni.

¹³ Ki i nyɛ àmɛɛ kàgbeele nyɛ, lee wi téeri ni wi tári kpúmɔn lè, wàlá àmɛɛ wi funjǎngi kapyele nyɛ, lee wi tèé be na lè.

¹⁴ Zyɔbi, mɔ líiyi cáan mi gee naa lóʔo, yére, mí Kolocɔlɔɔ bìngaari kèlē córo!

¹⁵ Kánmee na Kolocɔlɔɔ yi kàragí lè, ní wɔ́ɔ i wi fàfaangi gbɛ̀ɛnmɛ yirigi lè, a mɔ gee bee cán lé?

¹⁶ Kánmee na fàfaanyi sámaga n yére dàʔafaliw na lè, a mɔ gee bee cán lé? Wee cánna li foro lè, a mɔ wi bìngaari kèlē cán lé?

¹⁷ Mɔ wee búroyo yi káfugi cáan mɔ na lè, lǎli ni wòrogulo kàbangi káfalaga ga pan ní táfunaaw ní lè,

¹⁸ a mɔ a gbǎn nyɛ̀ʔɛni tɔ́n lé àmɛɛ wi gi kpéʔele lè, li nìri bi pye àmɛɛ tunmɔrɔ dùbale nyɛ lè?

¹⁹ Gee wolo yɛlɛ bi joo wi ma lè, gi tɛ̀ɛn wolo na. Wolo a gbǎn yarigaa cán joo í wolo kanaa-sìnjánmi yébilimɛ kéele na.

²⁰ Mii ga naà joo, a pe a gi joo lé wi ma? Syɔɔnwaa si a gbǎn gi joo lé si jo woro i wiyɛɛ kùúw caa?

²¹ Làlaa ni fàfaanyi n gbɛ̀ɛ́nmi tɔ́n, pi a ní nyaa í, káfalaga n si pan n baa yi pɛ́ɛ n láʔa yaà.

²² Tɛɛ̀ nìjanra si i yìrigí solomɔkulo ma. Ee, Kolocɔlɔɔ nìjanri tɔ̀nɔ́ i nyɛ fyáara wóro ní!

²³ Wolo a gbǎn nan Séew Myɛ Kàfɔlɔ na í, wi n kpɔ́ʔɔ séew kabaan na, ní kútiisinw kàbaan na, ní sínni fànʔa kàbaan na. Wi o sínni faari í.

²⁴ Koro na syɛ́ɛnbèle yɛlɛ bàā fɛ̀ɛgí wi na, wi o sícilimɛfɔlɔ faala wéle í.»