Zyɔbi 36 - Cebaara Bible 2010

Elihu i gi tèé kánmee na Kolocɔlɔɔ syɔɔn ye tama lè

¹ A Elihu taʔa n fala n gi joo níì jo:

² «Fúngi nyíngi cɛɛri, mii a mɔ tama, níì cán syɛɛnraa ní i nyɛ mii ma bi joo Kolocɔlɔɔ kéeli na.

³ Mii a mii cánni kíle yirige yaà tɛɛ̀leelige ni, si tànʔa kaan wee má wi mii sámaga lè.

⁴ Kányɛʔɛ na, mii syɛ́ɛnri o nyɛ jànvaa í, syɔ́ɔnwee wi nyɛ lè kajoolo fun wi kérigèle cánna ni, woro wi nyɛ ní mɔ ní.

⁵ Kolocɔlɔɔ séew n kpɔ́ʔɔ, wi o syɔɔn faala cèʔé í. Wi séew n kpɔ́ʔɔ wi cánni báriga ni.

⁶ Wi o syɛɛnpeeo yaari wi kòro sìi na í, wi i tànʔa kaangi foomɔfɔbèle ma.

⁷ Wi o wi nyapiigèle yirigi syɛɛnsinw ni í, wi i fànʔafɔɔlɔ télegi fàngoli na, wi i be télegi li na be kòro yaà làla o làla. Kàjáa pe ga peyɛɛ gbɔ́ʔɔ,

⁸ lǎli bee ni wi n be pwɔɔ ní nyɔ̀ʔɔdiriye ní, pe n cò wɔʔɔgi yapwɔɔrɔ na.

⁹ Wi i be kapyegèle fíligi ni tèé be na, n fàra be céemi na, lǎli ni pe ga ni nɛ̀ɛnyɛnɛgi kpéʔele lè.

¹⁰ Wi i be líiweegèle múru jàngó paa sàmini lúro, níì be pye pe be sìnzinmi yaʔa.

¹¹ Pe ga fɔ̀lɔ ni lúro níì peyɛɛ jɛ́rɛ, pe cányi a foro fundaanri ni, pe yɛ́ɛgèle a foro pe kanidaangèle ni.

¹² Pe si ga pye pe o lúro í, pe a be kpóo ní tàbaa ní, pe a kùu be kanaa-sìnjánmi ni.

¹³ Kolocɔlɔɔ yɛ́ʔɛnaa-sìnvyaabèle i peyɛɛ gaangi fundanʔari ma, pe si o yákpogèle wáa wi kurugo wi poro dɛ̀ɛmɛ lǎli ni wi be le nyɔ̀ʔɔmɔ na lè í.

¹⁴ Pe i kúu be cárimi làla ni, pe sìíw i kwóo kanɔnʔɔbyebèle wóo kwɔ́ɔganma na.

¹⁵ Kàjáa Kolocɔlɔɔ i wɔʔɔgɔfɔw wɔʔɔgɔ tiimaa téeri ni wi syoo ní i fɔ̀rɔgi téeri ni wi sàmí.

¹⁶ Wi wɔ́ɔ i caa bi mɔ yirige wɔʔɔgi ni. Booma ni mɔ maa ni yanɛʔɛri fundaanra pingi cɔ̀ɔnrimɔ fun, mɔ tabaliw maa ni nyìngí sǐnmi yaliire na.

¹⁷ A kolomɔ si baa too mɔ na, a kútiiw wɔʔɔgɔ baa mɔ nɛnɛ n taa.

¹⁸ Ki ga yɛlɛ fundanʔagbɔɔri í kɔ́ mɔ lége nɛ̀ɛnyɛnɛgɛ ni í, cánnɛʔɛni si mɔ pùuni bi yirige kólogi ni í.

¹⁹ Mɔ yákpowáari a gbǎn mɔ syɔɔ lé wɔʔɔgi ma, àlí mɔ ga gi kpéʔele ní mɔ bárigaw myɛ ní?

²⁰ Mɔ a kɔ́ ra yébiligi yèʔerí í, gee ni be syɛ́ɛnbèle yirigi be tɛ́ɛyi ni lè.

²¹ Da miyɛɛ kɔ̀rɔsíi, mɔ a kɔ́ jàari bi kári sìnzinmi kàbaan na í, níì cán koro mɔ nyɛ́nɛ n wòlo mɔ wɔʔɔgi kéele na.

Kolocɔlɔɔ fǎngi kéele

²² «Kolocɔlɔɔ tɔ̀nɔ́ i nyɛ fànʔafɔlɔ wi séew báriga ni, wìí wi a gbǎn syɔɔn tama àmɛɛ woro nyɛ lè?

²³ Wìí syɔ́ɔn wi wi kôlaayi tɛ̀ɛn wi na? Wìí wi a gbǎn wi pye: ‹Mɔ n kakologo pye?›

²⁴ Sɔ̀ngi mi taa maa wi kapyeli sòoló, loro lee syɛ́ɛnbèle ŋúu be kpɔ̀ʔɔrɔli ŋúnuyo ni lè.

²⁵ Syɔɔn ye myɛ i li sámagi ni wéle, syɔɔn o syɔɔn i li nyaagi léelige.

²⁶ Kolocɔlɔɔ n tɔ̀nɔ n kpɔ́ʔɔ n sɔ̀lɔ wolo cánni na. Wi yɛ́ɛgèle nyɔ́ɔ a gbǎn córo í.

²⁷ Wi i lǒgi kíle cɛɛri cɛɛri ni lúrugu ǹjogi ni, a gee bee i kàragí ni lúrugu ni tuun naa zàʔá.

²⁸ Fàfaanyi i gi yaari ki i ŋuu, ki i syɔɔn ye saʔa kúru.

²⁹ Syɔɔnwìí wi a gbǎn fàfaanyi tɔ́nganma cán, bi wi fànikpaagi nyɛ̀ʔɛvōlogéle kánma cán?

³⁰ Wéle, wi i wi gbɛ̀ɛ́nmi caragi ni wiyɛɛ máari, wi i sólomi lɔ̀ʔɔ tɛɛcùruyo tɔ́ngi.

³¹ Kérigèle bee wi téeri ni syɛɛnfeleyi náari, ní i yaliiri kaangi wonɛʔɛrɛ ní.

³² Wi i nyɛ̀ʔɛni nyɛ́ʔɛnɛmɛ có kɔ́yi ni ni tórogi nigoow kurugo.

³³ Wi nyɛ̀ʔɛni tìnmɛ i wi panni kéele jáari. Alí yaweeri tiimaa i gi tèé wi i nùuní naa.