Zyɔbi 35 - Cebaara Bible 2010

N yɛlɛ ní Elihu syɛ́ɛnri ní yatelege o Zyɔbi ma bi joo í

¹ A Elihu níì syɛ́ɛnri láa níì jo:

² «A mɔ tága lé miyɛɛ na n jo mɔ i nyɛ mɔ sínni ni? Mɔ a gbǎn jo lé mɔ n sín Kolocɔlɔɔ yɛ́ʔɛ ma?

³ Níì cán mɔ n jo: ‹Nyàʔá gi nyɛ mii ma gi kanyɔɔni? Mii ga pye mii ga kapeele pye í, nyàʔá gee bee a nyɔɔ mii na?›

⁴ Mii wi a syɛɛnlurugori kaan mɔ ní mɔ taannyɛnbèle ma làrinijanna ni.

⁵ Nyɛ̀ʔɛni kéele kɔ̀rɔsíi mí gi nyaa! Fàfaanyi wéle àmɛɛ yi léeli mɔ na lè.

⁶ Mɔ ga kapeele pye, nyàʔá mɔ kálagi Kolocɔlɔɔ ma? Kàa ga ni fàrá mɔ céemi na, nyàʔá koro a pye wi na?

⁷ Mɔ ga sín, nyàʔá mɔ kaangi wi ma? Ba nyàʔá wi taagi mɔ ma?

⁸ Mɔ syɛɛnnyɛnnɛ na mɔ péemi nangi, syɔɔn na mɔ sínni kanyɔɔnɔ nyɛ.

⁹ Pe i cɛ́ɛn fǎngi gbànna láara ni, pe i yákpogèle wáa wogbolobèle tètée kéele na.

¹⁰ Kàjáa syɔɔn faala o gi nyuu níì jo: ‹Sán mii faanfɔw Kolocɔlɔɔ nyɛ í, woro wee wi kpɔ̀ʔɔrɔli ŋúnuyo kaangi yébiligi ni lè,

¹¹ woro wee wi wolo tama n sɔ̀lɔ tári yaweere na lè, ni wolo cìligí n sɔ̀lɔ nyɛ̀ʔɛni féjɛɛngèlē na?›

¹² Lǎli ni pe ga ni yákpogèle wáa lè wi o syoo be ma í, syɛɛnpeebèle nɛ̀ɛnyɛnɛgɛ kéele na.

¹³ Kányɛʔɛ na pe i yákpogèle wáa gbanzan, Kolocɔlɔɔ o gi lúro í, Séew Myɛ Kàfɔlɔ o gi córo í.

¹⁴ Alí mɔ wíre i gi nyuu lè níì jo mɔ o wi nyaagi í, mɔ kútii kéeli i nyɛ wi yɛʔɛ̀ ma, da wi sige!

¹⁵ Tɔ́ɔliw ni àmɛɛ gi nyɛ lè wi fundanʔaratɔw ga kɔ́ɔ̀ nan syɔɔn na í, a gi kòro mɔ a jo wi ga kɔ́ɔ̀ syɔɔn céemi kéele cán í.

¹⁶ Zyɔbi i nyɔ́ɔgi múru gbanzan, wi i syɛ́ɛnri nɛʔɛgi dee di lè cánna o di ni í.»