Zyɔbi 34 - Cebaara Bible 2010

Elihu n Zyɔbi télege kolomi kòlo na

¹ A Elihu níì syɛ́ɛnri láa níì jo:

² «Sícilibèle, ye mii syɛ́ɛnri lóʔo! Yele bele má cánna nyɛ lè, ye líiyi cáan ye lóʔo mii ma!

³ Níì cán líiweeli i syɛ́ɛnri sɛʔɛ ni cángi àmɛɛ nyínni yaliiri tàanma cángi lè.

⁴ Koro na wo pínɛ wo wozingi nyɛ́nɛ wo wòlo, gee gi nyɔɔ lè, ki n yɛlɛ wo koro pínɛ wo cán.

⁵ Zyɔbi n jo: ‹Mii n sín, á Kolocɔlɔɔ mii sínni yaʔa kɔlɔ̀ na.

⁶ Mii sínni ní ki myɛ ní, mii n córo jànvaafɔlɔ. Mii kpàligi n kpɔ́ʔɔ n sɔ̀lɔ bi gi taa mii ga kapeele pye í.›

⁷ Syɔɔnwìí wi nyɛ àmɛɛ Zyɔbi nyɛ lè, wee wi nɛ̀ɛnyɛnɛgi gbo àmɛɛ lɔ̀ʔɔ nyɛ lè,

⁸ wee wi pínɛ ni táanri kakolobyebèle gboolo ni lè, wee wi pínɛ ni syée ní syɛɛnpeebèle ní lè?

⁹ Níì cán wi n jo: ‹Bàā fundaanra kpéʔele Kolocɔlɔɔ ni, gee bee i nyɛ syɔɔn ma tɔ̀nɔ fun.›

¹⁰ Koro na ye lóʔo mii ma, yele kacánbèle! Péemi n tɔ̀nɔ n léeli Kolocɔlɔɔ na, sìnzinmi n tɔ̀nɔ n léeli Séew Myɛ Kàfɔlɔ na!

¹¹ Wi i syɔɔn kapyegèle sìndɛʔɛ lúrugu wi ma, wi i syɛ́ɛnbèle myɛ nibin nibin sàrá ni yɛlɛgi ní be tánʔaganmi ní.

¹² Kányɛʔɛ na, Kolocɔlɔɔ o kapeʔe kpéʔele nyáana í. Séew Myɛ Kàfɔlɔ o wozingi kologi í.

¹³ Wìí syɔ́ɔn wi tári kakarigara kaan wi ma? Wìí syɔ́ɔn wi dulunyanw myɛ le wi kɔ́gi ni?

¹⁴ Wi ga maa pye wi o sɔ̀ngí yarigaa nikwɔɔ na kapye wiyɛɛ kéeli ban í, wi ga maa wi Pǐli ní wi nyɔ́ɔgi káfalaga cò n lúrugo wiyɛɛ ma,

¹⁵ cere yáriri myɛ a dée kùu làla nibin ni, syɔɔn a dée lúru jée támiigi ni.

¹⁶ Kapye sícilimɛ i nyɛ mɔ ma, mi dee naa lóʔo, líiyi cáan mi mii syɛ́ɛnri jóomɔ lóʔo!

¹⁷ A sínni nigoò a gbǎn tɛ́ɛn lé fǎngi na? Wee wi sín lè ní i nyɛ Séew Kàfɔlɔ, a mɔ a kolomɔ kaan lé wi ma?

¹⁸ Woro wee wi gi nyuu lè fànʔafɔlɔ ma si wi pye: ‹Nifaʔaga,› ní i gi nyuu mɛ́ɛkpoloyi fɔ̀ɔlɔ ma níì jo: ‹Syɛɛnpeebéle,›

¹⁹ wi o fànʔafɔbiigèle kpɔ́ʔɔgi ni sɔ̀lɔ́ wozanbèle na í, wi o lɔrɔfɔlɔ córo n sɔ̀lɔ foomɔfɔlɔ na í, níì cán pe myɛ i nyɛ wi kɔ́yi yakpéʔelere.

²⁰ Cɛɛri na, pe n kùu. Nyǐnlɛɛgi na, syɛɛnfelegi n fúugo si kùu. Pe i fànnɛʔɛgɛfɔlɔ láari yaà sìnvɔrɔ ni.

²¹ Níì cán Kolocɔlɔɔ nyɛ́nɛ i nyɛ syɔɔn kóloyi na, wi i wi nyɔ̌ngèle myɛ wéle.

²² Yébilimɛ wàlá kùu nyínmɛ o yaà beè lè sìnzinmi falipyebèlē a gbǎn làra lè í.

²³ Níì cán Kolocɔlɔɔ màko o nyɛ bi náa syɔɔn wéle bi mɔn koro ga pye woro í náa gbǎn kútiiw ceri wi na í.

²⁴ Wi i syɛɛnniribèle jabagi yíbege singbeʔele ni, ní i pèle télegi pe sìndɛɛgi ni.

²⁵ Níì cán woro wi be kapyegèle cángi ni wɛ̀ɛ́, ní i be ŋɔrɔgi ni cáan yébiligi ni, pe n tɔ́nʔɔnɔ.

²⁶ Wi i be kpúmɔn syɛ́ɛnbèle nyɛ́nɛ na, àmɛɛ syɛɛnpeebéle nyɛ lè.

²⁷ Amɛɛ pe wàli n láʔa wi na lè, pe si ga wi kóloyi myɛ cán n láʔala í.

²⁸ Pe n foomɔfɔw yákpolo kaan li i lúru ni nangi wi na, wi i fɔ̀rɔgɔfɔbèle sùpiiwáara lúro.

²⁹ Wi ga pyèri, wìí wi a kolomɔ kaan wi ma? Wi ga wi yɛ́ɛgi làriga, wìí wi a gbǎn wi nyaa? A gi náà pye syɛɛnfelege kéele yoo, syɔɔn nibin yoo,

³⁰ jàngó Kolocɔlɔɔ yɛ́ʔɛnaa-sìnvyaaɔ a tɛ́nɛ kɔ́ tɛ́ɛn fǎngi na í, si pye karinyanga syɛ́ɛnbèle na í.

³¹ A wàa gi joo lé Kolocɔlɔɔ ma níì jo: ‹Mii n mii wɔʔɔgi túgoro tugo, mii a ní kapeʔe pye í,

³² gee gi lè mii ga kɔ́ ni gi nyaagi í, gi tɛ̀ɛn mii na, kapye mii n sìnzinmɛ kpéʔele, mii a ní bi kpéʔele í.›

³³ A ki i lé mɔ sɔnguri na ki n yɛlɛ wi mɔ wɔʔɔ, àmɛɛ mɔ wi kakɔrirɔgèle cée lè? Mi mɔ nyɛ́nɛ-wòloli kpéʔele, mii ban í. Koro na gee mɔ cán lè, da gi nyuu.

³⁴ Yákirifɔbèle a gi joo mii ma, n fàra síciliwee na wi lúro mii ma lè si jo:

³⁵ ‹Zyɔbi i nyuu cánna fun. Sícilimɛ n fɔ̀n wi syɛ́ɛnri ni.›

³⁶ Koro na Zyɔbi n sèʔê yɛlɛ paa wi sɛʔɛ da wéle bàā syée yaà, ncan wi i syɛɛnlurugori kaangi àmɛɛ syɛɛnnaa-sìnzinbèle nyɛ lè!

³⁷ Níì cán wi i céemɛ fàrá wi kapeeli na, wi i kadaagèle kóri wolo níngi ni, wi i wi syɛ́ɛnri nɛʔɛgi Kolocɔlɔɔ kánmi na.»