Zyɔbi 33 - Cebaara Bible 2010

Dee Elihu taa bi joo lè: Kolocɔlɔɔ i syɔɔn sàmí

¹ «Tɔ́ɔliw ni doò, Zyɔbi, ki n yɛlɛ mi mii jóomi lóʔo. Líiyi cáan mi mii syɛ́ɛnri myɛ lóʔo.

² Mii wi nyɔ́ɔgi múru wee, mii nyínni a ra nyuu mii nyɔ́ɔgi ni.

³ Ní fûnzinge ní mii a mii syɛ́ɛnri joo, mii nyɔɔwari a kányɛɛfiigi joo.

⁴ Kolocɔlɔɔ Pǐli li mii sámaga, Séew Myɛ Kàfɔlɔ nyɔ́ɔ káfalaga n mii pye sìi na.

⁵ Mɔ fánʔa ga pye gi na, mi syɛɛnlurugori kaan mii ma. Kpóʔoro mi yaʔa, mí ba yére mii yɛ́ʔɛ ma.

⁶ Kolocɔlɔɔ yɛ́ʔɛ ma, mii i nyɛ àmɛɛ mɔ nyɛ lè, mii n wɔ́ɔ̀ sámaga ní cóoro ní àmɛɛ mɔ nyɛ lè.

⁷ Mii fyáakpɔɔri a wɔ́ɔ fyáara wáa mɔ na í, mii kɔ́gi a gbàn mɔ na í.

⁸ Mɔ si n joo, a mii líiweeli gi lóʔo. Mii n mɔ joomi yákpolo lóʔo, a li jo:

⁹ ‹Mii i nyɛ dìgire fun, mii i nyɛ kapeele fun, mii i nyɛ féw, kolomɔ o nyɛ mii na í.

¹⁰ Kàjáa Kolocɔlɔɔ n sèʔê dìgire tɛ́ɛlɛ nyaa mii na. Wi i mii córo àmɛɛ wi nigoò nyɛ lè.

¹¹ Wi i kpɛ̀ʔɛlɛyɛ nii mii tɔ́lɔyi na. Wi i mii tɛɛsɔ̀lɔgèle myɛ kɔ̀rɔsíi.›

¹² Mii a syɛɛnlurugori kaan mɔ ma si mɔ pye tànʔa o nyɛ mɔ ma kéeli bee ni í. Níì cán Kolocɔlɔɔ n kpɔ́ʔɔ n sɔ̀lɔ syɔɔn na.

¹³ Nyàʔá na mɔ caa bàā kakabaga kpéʔele ní wi ní, àmɛɛ gi lè wi o mɔ syɛ́ɛnraa faala syɛɛnlurugoro kaangi í?

¹⁴ Bi gi taa Kolocɔlɔɔ i nyuu kanmaa na, bi wɔ́ɔ ní joo kanmaa na, syɔɔn yákiriw si o nyɛ gee bee na í.

¹⁵ Wi i nyuu ŋúnɔyi ni, ní yébiligi yanyaaya ni, lǎli ni ŋúnɔgbɔɔmɔ ga too syɛ́ɛnbèle na lè, lǎli ni pe ga ŋúnɔ pe yasinɛyi na lè.

¹⁶ Lǎli bee ni wi n ni kérigèle tèé syɛ́ɛnbèle na, ní i fɛ̀ɛ taari sàmini syɛ́ɛnrɛ na wi nyuu be ma lè.

¹⁷ Koro ga pye bi syɔɔn láʔa wi kapyeri na, si wi syɔɔ nɛ̀ɛnyɛnɛgi ma.

¹⁸ Koro ga pye bi wi pǐli syɔɔ weecurugi jéele ma, bi wi sìíw syɔɔ kúbèle tɛɛkòrogo ma.

¹⁹ Wi wɔ́ɔ i wi kóro wɔʔɔgɔ báriga ni wi yasinɛgi na, lǎli ni wi kaceleyi cɛ̀lɛ́ lè sìnyére ni.

²⁰ Lǎli bee ni wi n ni yaliiri córo yapɛnʔɛ, àlí yaliiri láa di nyɛ syɔɔn na n sɔ̀lɔ lè.

²¹ Wi céri si n ni sóori ni syée ní i kwóo nyaaganmi na, wi kaceleyi yi lè yi da ni nyaagi í, yi n yiri kàfugo na.

²² Wi pǐli n si ni nùuní weecurugi na, wi sìíw n si wɔ́ɔ ni nùuní kúbèle tɛɛkòrogo na.

²³ Nyɛ̀ʔɛni tundunwaa si ga pye yaà wi ma, kùsuluo, wàa nibin pée, saala kagunɔw nínge ni, wee wi gi tèé syɔɔn na, gee wi yɛlɛ waa kpéʔele lè,

²⁴ lǎli bee ni wi a nyinimɛ taa wi na, si jo: ‹Wi syɔɔ, koro ga pye wi a kɔ́ tìgi bi jée weecurugi ni í! Mii n nyunzyɔɔrɔ kánma taa.›

²⁵ Lǎli bee ni wi céri a lúru pye wobunro ní àmɛɛ wi cárimi làla wóro da pye lè, wi a lúru pye àmɛɛ wi da pye lè wi pìími canya ni.

²⁶ Wi i Kolocɔlɔɔ nyɛ́ɛri, woro wee wi nyɔɔ wi na lè, wi i wi yɛ́ɛgi nyaagi ní fundaanra yákpowáara ní. Kolocɔlɔɔ wi syɔɔn sínni kaangi wi ma.

²⁷ Wi i ŋúu syɛ́ɛnbèle nyɛ́nɛ na níì jo: ‹Mii n kapeele pye, mii n námara pye kútiisinw kéele na, Kolocɔlɔɔ si ga gi kpéʔele mii na n yɛlɛ ní mii kolomi ní í.

²⁸ Wi n mii pǐli syɔɔ, koro ga pye li a kɔ́ jée weecurugi ni í. Mii sìíw si a gbɛ̀ɛ́nmi nyaa.›

²⁹ Wéle, gee myɛ Kolocɔlɔɔ kpéʔele lè tɔlɔyɔ siin, wàlá tɔlɔyɔ taanri, syɔɔn ma.

³⁰ Koro ga pye bi wi pǐli lúrugo yirige weecurugi ni, koro ga pye bi niweebèle gbɛ̀ɛnmɛ yirige wi ma.

³¹ Líiyi cáan Zyɔbi, mí lóʔo mii ma! Pyèri, mii wi a joo.

³² Yarigaa ga pye mɔ ma bi joo syɛɛnlurugori kaan mii ma! Da nyuu, níì cán mii i caa bi tànʔa kaan mɔ ma.

³³ Kapye koro ban í, lóʔo mii ma! Pyèri, mii a mɔ tama sícilimi na.»