Zyɔbi 32 - Cebaara Bible 2010

ELIHU JOOLI KEELE ( 3—37 ) Elihu n kàa joo gi ni

¹ A nǎnbèle bee taanri láʔa syɛɛnlurugori kaanna na Zyɔbi ma, níì cán wi maa ni wiyɛɛ córo syɛɛnsiɔn.

² Lǎli bee ni a Elihu fúngi tanʔa gbanʔama, wi lè Buzi ye Barakeyɛli jáaw, ní i nyɛ Arami túlugi wówaa. Wi fúngi maa tanʔa gbanʔama Zyɔbi kurugo, níì cán wi maa ni gi nyuu níì jo woro n sín Kolocɔlɔɔ yɛ́ʔɛ ma.

³ Wi fúngi maa wɔ́ɔ̀ tanʔa gbanʔama Zyɔbi tàannyɛnbèle taanri kurugo, níì cán pe ga syɛɛnlurugoro taa bi joo í, fwɔɔ a be kòro ni kolomɔ kaangi Zyɔbi ma.

⁴ Amɛɛ pe da lɛɛ n sɔ̀lɔ Elihu na lè, koro na wi da sige gbɛnʔɛnɛ, wi ga joo ní Zyɔbi ní í.

⁵ Lǎli ni si Elihu gi nyaa lè nǎnbèle bee taanri ni, syɛɛnlurugoro ní o nyɛ pe wàa nyɔ́ɔ na í, a wi fúngi tanʔa gbanʔama.

Elihu n gi fílige n tɛ̀ɛn gee na woro yɛlɛ bi kàa joo gi ni lè

⁶ Elihu wi lè Buzi ye Barakeyɛli jáaw, a woro syɛ́ɛnri láa n gi joo níì jo: «Mii i nyɛ wojáriɔ, yele si i nyɛ wolɛɛbèlē. Koro na mii da ni cɛ̀lɛ́ ní i fɛ̀ɛgí bi mii kacánni joo tɛ̀ɛn yele na.

⁷ Mii maa ni gi nyuu níì jo: ‹Cannɛʔɛyi fɔ̀ɔlɔ a joo, yɛɛnɛʔɛgèle fɔ̀ɔlɔ a sícilimi tɛ̀ɛn.›

⁸ Kàjáa kányɛʔɛ na, pìle li nyɛ syɔɔn ni, Séew Myɛ Kàfɔlɔ nyɔ́ɔ káfalaga gi cánni kaangi wi ma.

⁹ Sìinɛʔɛw ban wi syɔɔn kpéʔele sícilio í. Lɛ́ɛgi báriga ni ban kasingèle cángi ni wɛ̀ɛ́ í.

¹⁰ Koro na mii jo: ‹Ye lóʔo mii ma, mii a wɔ́ɔ mii kacánni joo tɛ̀ɛn.›

¹¹ Mii maa tɔ̀nɔ ni yele syɛ́ɛnri sige mii maa líiyi cáan ni yele tàángi jóomɔ lúro, bi taa yele í wi syɛ́ɛnri sámaga sɛʔɛ.

¹² Mii maa tɔ̀nɔ n mii sɔ̀ngumi myɛ yaʔa yele na, wéle, yele wàa faala si ga syɛ́ɛnri kwɔ́ɔ Zyɔbi nyɔ́ɔgi na í, yele wàa faala ga syɛɛnlurugoro kaan wi ma wi syɛɛnjóori na í.

¹³ Koro na yele a kɔ́ gi joo í si jo: ‹Wolo n sícilimi nyaa wi ni. Kolocɔlɔɔ nibin wi a gbǎn fànʔa taa wi na, syɔɔn fánʔa o nyɛ í.›

¹⁴ Wi ga wi syɛ́ɛnri joo n kaan mii tiimaa ma í. Yele syɛ́ɛnri ban mii a wɔ́ɔ tɛ́ʔɛ bi syɛɛnlurugori kaan wi ma í.

¹⁵ Pe n fyáa, pe ní o syɛɛnlurugoro kaangi í! Syɛ́ɛnri n kwɔ́ɔ be ma!

¹⁶ Mii si maa ni sige! Amɛɛ si gi nyɛ lè pe ní o nyuu í, àmɛɛ be láʔa lè syɛɛnlurugori kaanna na,

¹⁷ mii na gi nan, mii a wɔ́ɔ syɛɛnlurugoraa kaan. Mii i caa bi wɔ́ɔ mii kacánni joo tɛ̀ɛn.

¹⁸ Níì cán syɛ́ɛnri n tɔ̀nɔ n mii nyìn. Mii pǐli i mii ŋàʔaná fúngi ni.

¹⁹ Wéle, mii fícɛnni ni, ki i nyɛ mɔ a jo dùvɛɛn wii, wee wi lè tɛɛyirile o wi na í, àmɛɛ dùvɛɛn kpàbifɔnbéle nyɛ, bele be caa bi folo lè.

²⁰ Mii a joo, koro ga pye mii í ŋɔ́n bi tìgi. Mii a mii nyɔɔwari múgu bi syɛɛnlurugoro kaan.

²¹ Mii a syɔɔnwaa yirige wàa ni í, mii a tée syɔɔn faala fáana í.

²² Mii ga gbàn fáanaga na í, níì cán mii ga maa ni koro kpéʔele, mii Faanfɔw a dée mii láʔa yaà kelekele.