Zyɔbi 31 - Cebaara Bible 2010

Zyɔbi joozanni kwɔ́ɔmɔ: Mii a yére Kolocɔlɔɔ yɛ́ʔɛ ma ní nyǔngi ní woyirigege ní

¹ «Mii maa nyɔɔ fàli ní mii nyapiigèle ní níì jo, mii a tée mii nyapiigèle le nàngeele-sinján pìcaa ni í.

² Lɛɛlìí si Kolocɔlɔɔ yaʔa naa mii ma n wi yaʔa yaà ǹjogi ni? Kɔrigìí Séew Myɛ Kàfɔlɔ yìrige yaà nyɛ̀ʔɛni na n tórigo naa mii ma?

³ Kálagili o nyɛ syɛɛnpeew kéele na ì? Wɔʔɔgi o nyɛ kakolobyebèle wóʔo ì?

⁴ Kolocɔlɔɔ ban wi mii kóloyi nyaagi ní i mii nyɔ̌ngèle myɛ córo ì?

⁵ Kapye mii n tánʔa jànvaa ni, kapye mii n tɔlɔgɔ wári námaraw kpéʔelele kurugo,

⁶ ki n yɛlɛ Kolocɔlɔɔ í mii cáan cúlosiɔn na, lǎli bee ni wi a mii kajoolo-funmi kéele cán!

⁷ Kapye mii tɔ́lɔgi n wàli n yiri kôzingi ni, kapye mii fúngi n taʔa mii nyapiigèle na, kapye nɔ́nʔɔraa n tára mii kɔ́yi na,

⁸ ki n yɛlɛ mii í lùguri lùgu, wàa nikwɔɔ si ba di lìi, mii tiifolovɔ́nyi si kɔ́nɔgi.

⁹ Kapye cɔlɔɔ kéele n mii fúngi kàriga, kapye mii n làra n sige mii syɛɛnnyɛnnɛ kpaaweele na,

¹⁰ ki n yɛlɛ mii céw í sa ra tire nànwaa nikwɔɔ ma, pèle nikwɔɔlɔ í da sìnɛ́ ní wi ní.

¹¹ Níì cán kapeekpɔʔɔ gii, ní kolomɔ, bee bi yɛlɛ ní kútii ni lè.

¹² Naà ki a dée pye bàā sórigolo kpéʔele bi sa nan kálagili wéʔe na, ki a dée mii yataari myɛ sórigo kwɔ́ɔ.

¹³ Mii ga mii falipyenàɔn wàlá mii falipyecaà tánʔa faʔa, wi ga pye kútii kéele na ní mii ní,

¹⁴ nyàʔá mii a pye lǎli ni Kolocɔlɔɔ ga yìri lè? Wi ga yìri sɛʔɛweleli kurugo, syɛɛnlurugodìí mii a kaan wi ma?

¹⁵ Wee wi mii sámaga mii nɔ́ɔw láʔa ni lè, woro ban wi wɔ́ɔ̀ be sámaga ì? Kolocɔlɔɔ wonijanw ban wi wo sámaga wo nɔ́ɔbèle láaya ni ì?

¹⁶ Yariga o yariga láa ki da pye lè foomɔfɔbèle na, kapye mii maa cée be ma gi na, kapye mii n lɔgucew nyapiigéle yaʔa a ge wéle n fɔ̀rɔ,

¹⁷ kapye mii nibin n mii lìíli lìi, círio ga lìi li na í,

¹⁸ níì cán mii cárimi làla ni, wi n lɛɛ ní mii ní àmɛɛ pyà leegi ni tofɔlɔ ní lè, mii wɔ́ɔ̀ yiri lè mii nɔ́ɔw láʔa ni terire, a mii pye lɔgucew yarifɔlɔ,

¹⁹ kapye mii n wàa nyaa wi i wɔʔɔ burovɔnw na, ní fɔ̀ngɔfɔw, wee wi lè làgogo o nyɛ wi ma í,

²⁰ wi fúngi si ga dùba pye mii ma í, mii bàpiigèle síire si ga káfugo le wi ni í,

²¹ kapye mii n kɔ́gi yìrige círio kánmi na, níì cán mii n dɛ̀ɛmɛfɔlɔ nyaa niyɛɛ na kútiijoo-tɛ́ɛgi ni,

²² ki n yɛlɛ mii fókaannyungi í wàli bi láʔa mii kàdogi na, mii kɔ́gi í ceri láʔa kágbeli na.

²³ Níì cán wɔʔɔgi gi yìrigí Kolocɔlɔɔ ma lè, ki maa ni fyáakpɔɔrɔ cáan mii na, mii a gbǎn yafyɛn pye wi kpɔʔɔgbɔɔri yɛ́ʔɛ ma í.

²⁴ Kapye mii n mii sɔ̀ngumi taʔa tɛ́ɛw na, kapye mii n tɛɛtelew pye: ‹Mɔ wi nyɛ mii sɔ̀ngumi tɛɛtaʔaga,›

²⁵ kapye mii n fundaanra kpéʔele mii lɔ́ri kéele na, lɔnɛʔɛri mii kɔ́yi da taa lè,

²⁶ kapye mii n cángi gbɛ̀ɛnmɛ wéle lǎli ni gi wáa lè, ní yesóli, àmɛɛ li táanri lè,

²⁷ kapye mii fúngi n kiyɛɛ yaʔa a be lɛ́ɛlɛ làrama ni, ní kapye mii kɔ́gi n kári mii nyɔ́ɔgi ma syɔɔnrilɔ kéele na,

²⁸ koro a dée wɔ́ɔ pye kapeele, lee li yɛlɛ ní kútii ní lè, koro a dée pye mii n Kolocɔlɔɔ cée, wi lè ǹjogi ni.

²⁹ A mii da ni fundaanra kpéʔele lé mii parafɔlɔ wɔʔɔgɔ kéele na, wàlá ni muguri àmɛɛ kapeʔe wi taa lè,

³⁰ mii wee wi lè mii da fɔ̀lɔ mii nyínni í kapeele pye í, bàā wi kùu caa ní dánga syɛ́ɛnrɛ joolo ní í!

³¹ Mii fànikpaagi wòolo da ni gi nyuu ì níì jo: ‹Wìí wi nyɛ wi ga tín wi kaalɛɛlɛ na í?›

³² Nibɔɔn da ni syɔ̀ɔ́n kàfugo na í, mii maa ni mii kpáagi múru kùsɛɛbèle ma.

³³ A mii da ni mii kapeegèle làragí lé àmɛɛ syɔɔn ye nyɛ lè, ni mii kolomi tɔ́ngi ni yaari niyɛɛ ni?

³⁴ A mii da fyáa lé syɛɛnnɛʔɛmi kajooro na, wàlá a mii i fɛ̀ɛgí narigbaayi faʔara na fwɔɔ a koro mii kaan a mii nyɔ́ɔgi tɔ́n níì kòro yaà kpáagi ni?

³⁵ Ee, wìí wi a wàa kaan mii ma, wee wi a lóʔo mii ma lè? Mii syɛɛnsanri di dee naa. Ki n yɛlɛ Séew Myɛ Kàfɔlɔ í syɛɛnlurugori kaan mii ma, dàzɔɔnri syɛ́ɛnrɛ mii kàsiitun-nyɛ́nw sɛ́bɛ mii kánmi na lè.

³⁶ Mii a dée di taʔa mii fókaannyungi na, mii a dée di tɔ́n àmɛɛ fànʔafɔ-nyùndɔnnɔ nyɛ lè.

³⁷ Mii a dée mii nyɔ̌ngèle nyɔ́ɔ tɛ̀ɛn wi na, mii a dée nùuni wi na àmɛɛ fànʔafɔbile nyɛ lè.

³⁸ Mii tári ga ni yákpoli wáa mii kánmi na, di sɔ̌nyi ga ni nyatinmi ŋuu,

³⁹ mii ga di yaliiri lìi kawaʔa na, níì di kàfɔbèle báriga kwɔ́ɔ,

⁴⁰ ki n yɛlɛ wúuro í yiri di ni yaliiri sìndɛʔɛ ni, nyàápeʔe í yiri di ni orizyew sìndɛʔɛ ni.» Zyɔbi syɛ́ɛnri kwɔ́ɔmɔ.