Zyɔbi 30 - Cebaara Bible 2010

Zyɔbi joozanni i syée: Kàjáa tɔ́ɔliw ni doò!

¹ «Kàjáa tɔ́ɔliw ni, bele be cɛ́rɛ n sɔ̀lɔ mii na lè, mii i nyɛ bele bee má kataanra yála, poro bele tòōlo be lè pe da pye mii má yarigaa í, mii í caa be córo mii bànaʔa-pɔ́nbèle nínge ni í.

² Nyàʔá be kɔ́yi fànʔa a dée gbǎn nyɔɔ mii na? Pe fǎngi myɛ maa kwɔ́ɔ.

³ Pe n waʔa fóomi, ní kateegi báriga ni. Pe i fé ni máari lɔ̀ʔɔfun tɛ́ɛyi ni yi téè pye yaà kataya lè ní tɛɛkalagiya.

⁴ Pe i sìnbirigi nyàā kíle ni kɔ́nɔgi tiipiiyi taana, ní i zyenɛ tiipiiyi nìnre pingi pe yaliiri.

⁵ Pe i be nɛnɛ ni yirigi syɛ́ɛnbèle nínge ni, pe i yákpogèle wáa be kurugo àmɛɛ pe ge wáa kàyuuo kurugo lè,

⁶ jàngó paa kòró fyáara gorógoroweeyi ni, ní tári wéeye, ní fálaweeyi ni.

⁷ Pe i sùpiigèle wáa tiipiiri nínge ni, pe i kpoʔolo peyɛɛ na wúuri tiipiiye láara ni.

⁸ Nifaʔaya ní mɛ́ʔɛ fun syɛɛnnɛ bɛɛ, pe n be nɛnɛ n yirige tári ni.

⁹ Tɔ́ɔliw ni, pe i mii ŋúu pe ŋúnuyi ni, mii i nyɛ be má bàrikpumɔn-yáriga.

¹⁰ Pe i mii córo yanɔnʔɔgɔ, pe i còʔoró mii na, ki o nyɛ be ma yarigaa bàā tɛ́ɛri wáa mii ma yɛɛcɔɔli ni í.

¹¹ Amɛɛ Kolocɔlɔɔ mii sedegi yɔ̀rɔ lè, níì mii cáan tári na, kàrafée ní o nyɛ be na mii yɛ́ʔɛ ma í.

¹² Pe i yìrigí mii kàliige ma, ní i mii fíla bi cáan, pe i wɔʔɔgɔ kóloyo wóo mii kánmi na.

¹³ Pe i mii tiimaa kobili cɛnɛ, ní i báara mii bɔ̀nɔw kéele na, syɔɔn faala si o be yéregi í.

¹⁴ Pe i maa mɔ a jo weekpɔʔɔ ni be forogi, pe i tìngí ni maa kpaatoori láara ni.

¹⁵ Fyáakpɔɔri n lúru n too mii na, ti n mii mɛ́ɛkpɔɔgi láa àmɛɛ káfalaga nyɛ lè n kári, mii nyɔɔmi kéele n sɔ̀lɔ n fala àmɛɛ fàfanʔa nyɛ lè.

¹⁶ Tɔ́ɔliw ni doò, mii sìíw i kwóo ni syée mii ni, wɔʔɔgi canya n mii nɛnɛ n cò.

¹⁷ Yébiligi ni mii kaceleyi fúrugu, yáami bi mii káa lè pi o sìnɛ́ í.

¹⁸ Pi gbǎnmi báriga ni a mii búrogi kánma fàli, pi n tára mii na àmɛɛ mii burodɔnɔgi nyɛ lè.

¹⁹ Kolocɔlɔɔ n mii wáa fárigi ni, mii n támiigi ní cɔ́ɔngi wíri.

²⁰ Mii i mɔ yiri mɔ í mii dɛ̀ɛmɛ, mɔ si o syoo mii ma í. Mii n yìri n yére jàngó mɔ í wéle mii ma.

²¹ Mɔ n baa kàri fungbangafɔlɔ mii kàbangi na, mɔ i mii túngu ní mɔ kɔ́gi fànʔa ní.

²² Mɔ i mii fé káfalagi ni syɔnʔɔ, káfalakpɔɔgi si i mii wáa ni máari kàbanyi myɛ na.

²³ Mii n tɔ̀nɔ n gi cán mɔ i syée ní mii ní kùúw ma, beè niweebèle myɛ peyɛɛ vàrá lè.

²⁴ Kàjáa wee wi nan bi kùu lè, wi a wi kɔ́yi yaʔa lé sìnyìrige ni? Wee wi nyɛ wɔʔɔgi ni lè, wi a wi yákpoli yaʔa lé sìnwáa ni dɛ̀ɛmɛfɔlɔ kurugo?

²⁵ Mii da nyatinmɛ wo, wee kéele na wi da pye cangbanyi ni lè ì? Mii da ni funbɛɛnrɛ kpéʔele fɔ̀ngɔfɔw kéele na ì?

²⁶ Mii sɔ̀ngumi maa pye kacànna taala na, á kapeʔe pan. Gbɛ̀ɛ́nmi mii da ni sigi, wéle, a yébilimi pan.

²⁷ Mii fúngi i kángi sìnyere, wɔʔɔgi canya n nan mii na.

²⁸ Mii i táanri ní céri ní wowɔɔrɔ ní, cángi kéele si ban í. Mii i yìrigí ni yèré syɛɛnkpoʔolomi ni, ní i yákpoli wáa.

²⁹ Mii n baa pye gbàáyi senyɛnnɛ̀, ní sòʔolobèle pínɛnyɛnnɛ.

³⁰ Mii césaligi n baa kàri n wɔ́ɔ mii na, mii kaceleyi n sógi cefuuri báriga ni.

³¹ Mii kɔ̀ríw ní o kàa pingi í kapye kùu káyaʔa ŋúnugo ŋuunɔ ban í, ní mii máani wìimɛ, kapye nyɛnifɔbèle yákpogéle ban í.