Zyɔbi 29 - Cebaara Bible 2010

Zyɔbi joozanni: Ee, booma canjǎnyi kéele

¹ A Zyɔbi níì taʔa n fala wi kajooli kurugo níì jo:

² «Ee! Ki láaw i nyɛ mii na mii í ní pye àmɛɛ mii da pye lè yéyee ni yi sɔ̀lɔ lè, mii í pye mɔ a jo cányee ni Kolocɔlɔɔ da ni mii kpáaw wéle lè,

³ á wi fètinni si i nyín mii nyúngi ni, a wi gbɛ̀ɛ́nmi kíni mii yɛ́ɛgi na yébilimi ni!

⁴ Mii í dée pye àmɛɛ mii da pye lǎli ni mii da pye mii lǎli ni lè, lǎli ni Kolocɔlɔɔ da ni mii fànikpaagi kɔ̀rɔsíi àmɛɛ tàannyɛnnɛ nyɛ lè,

⁵ lǎli ni Séew Myɛ Kàfɔlɔ da sèʔê pye ní mii ní lè, á mii pìíbèle si i mii máari,

⁶ lǎli ni mii tɔ́lɔyi da ni jé sǐnmi ni lè, á fálagi si i sìnlɔʔɔ lókoloyo yirigi a yi i fóo mii taana lè.

⁷ Mii maa pye mii ga ni yìrigí ni syée kěgi kpàánweele ma, ní sa ni mii kǒli cáan kadàlagi na,

⁸ nìgɔcaribèle ga mii nyaa, pe n càri, wolɛɛbèle n si yìri n yére,

⁹ mɛ́ɛyi fɔ̀ɔlɔ n si be jóomi yérige, níì kɔ́yi tɔ́n be nyɔ́ɔyi na.

¹⁰ Kùndigibèle yákpogéle n si kwɔ́ɔ, pe nyíngèle mɛ̀ɛ́ tára pe gbǎdanbèle na.

¹¹ Líiweeli li da ni mii syɛ́ɛnri lúro lè, li maa ni dùba kpéʔele mii ma, nyapili li da ni mii nyaagi lè, li maa ni mii séeraw kpéʔele.

¹² Níì cán mii maa ni fɔ̀ngɔfɔlɔ syoo, wee wi da ni yákpoli wáa ni dɛ̀ɛmɛnɛ caa lè, ní círiw wi da pye lè dɛ̀ɛmɛfɔlɔ fun.

¹³ Wee wi da nan bi kùu lè, wi dùbaw maa ni nangi mii na. Mii maa ni lɔgucaa fúngo nyìngí fundaanri na.

¹⁴ Mii maa ni sínni nii burogo. Mii kányɛɛgi maa pye mii na burogbɔʔɔ ní nyùndɔngɔ.

¹⁵ Mii maa pye fúunw nyapiigéle, ní tɔgalagiyi fɔ́lɔ tɔ́lɔyɔ.

¹⁶ Mii maa pye tofɔlɔ fɔ̀ngɔfɔbèle ma. Syɔ́ɔnwee wi lè mii da wi cán í, mii maa ni wi kútiiw kéele sámagi ni sɛʔɛ.

¹⁷ Mii maa ni syɛɛnnaa-sìnziɔn kpacɔʔɔlɔgɔ kabagi, yáriri wi da ni có lè mii maa ni di kíle ni yirigi wi gǎngèle lariga ni.

¹⁸ Lǎli bee ni mii maa ni gi nyuu níì jo: ‹Mii a kùu mii zyàári fúngo ni, mii sìíw canya a nɛʔɛ àmɛɛ táminyɔɔw nyɛ lè.

¹⁹ Mii nǐnri a nan lǒgi na, kásagi a ra syɔ̀ɔ́n mii káganyi na.

²⁰ Mii nìjanri a kòro bàā tiyɛɛ kàragí wovɔnrɔ ní mii ni, mii sedegi a ra fànʔa taagi mii kɔ́gi ni.›

²¹ Pe maa ni lúro mii ma níì kòro ni sige, pe maa ni pyèrí ní i mii lálii syɛ́ɛnri lúro.

²² Mii ga mii syɛ́ɛnri joo n kwɔ́ɔ, pe o gáà níì joo í, mii syɛ́ɛnri si maa ni ŋuu be na àmɛɛ kásagi nyɛ lè.

²³ Pe maa ni mii sige àmɛɛ pe zàʔá sigi lè, pe maa ni nyɔ́ɔyi múru àmɛɛ gi kpéʔele zěselige kéele na lè.

²⁴ Mii ga ni tɛ́ʔɛ ní be ní, pe o gáà tága gi na í, pe maa ni mii yɛ́ɛcɔɔli darigala caa.

²⁵ Mii maa ni gi nyɛ́nɛ ni wóo bàā syée ní be ní, mii maa pye be nyúngi na. Mii maa tɛ́ɛn àmɛɛ fànʔafɔlɔ nyɛ lè kapɛɛnkpumɔnbéle kabiga nínge ni, àmɛɛ wàa nyɛ, wee wi funnyɛniyi fɔ̀ɔlɔ kpɛʔɛlɛ lè.