Zyɔbi 28 - Cebaara Bible 2010

Sícilimi kalarala

¹ «Wálifiiw tɛɛwòloyo i yaà, a tɛ́ɛw nɔ́nʔɔrɔ tɛɛyirigeye i yaà.

² Túnmɔri i yirigi támiigi ni, kàdɛnɛgɛ si i gbàlá ni kanyɛɛnri yirigi gi ni.

³ Pe i yébilimi kwóo ni yirigi yaà, pe i di caa ni nangi yaà tɛ́ɛyi na, yee yi cùru n sɔ̀lɔ lè, kàdɛnɛyi kurugo yi làra lè yébiliwɔɔli, ní kùúw nyímɛ ni.

⁴ Pe i weʔe túru léelige syɛ́ɛnbèle tɛɛkòroyo na, tɔ́lɔyi ní o dɛ̀ɛmɛnɛ kpéʔele í, yi n kòro ni yaagi léelige syɔɔn ye na.

⁵ Tári ni yaliiri taagi lè, ti n nyáʔami di tɛɛcùruyi ni náagi báriga ni.

⁶ Di kàdɛnɛyi ni safiiri taagi, ti míigi ni tɛ́ɛw taagi.

⁷ Kaàjɔɔ-féjɛnʔɛ ga di kobili cán í, kàcɔʔɔ-n-nyɛ̀nʔɛ nyapile ga kɔ́ɔ̀ li nyaa í.

⁸ Nɛ̀ɛnyɛnɛgi yaweeye ga tánʔa li ni í, càaraɔ ga sɔ̀lɔ li ni nyáana í.

⁹ Syɔɔn i wi kɔ́gi téeri ni gbèrifɔn-kàdɛnɛgɛ kpúmɔn. Wi i nyanbeleyi kɔ́nɔgi ni wáa ni càlagí.

¹⁰ Wi i jǐnweeye túru fálayi na, wi nyapili a gbǎn lɔgbanri yárira myɛ nyaa yaà.

¹¹ Wi i lǒyi cɔɔlɔlɔ yéregi. Wi i yalaraga yirigi gbɛ̀ɛnmɛ na.

¹² Kàjáa sán si sícilimi taagi? Sán cánni tɛ́ʔɛ nyɛ?

¹³ Syɔɔn ga bi lɔ́ri cán í. Pi o taagi niweebèle tára ni í.

¹⁴ Weecurugi n jo: ‹Pi o nyɛ mii ni í.› A sólomi lɔ̀ʔɔ jo: ‹Pi o nyɛ mii ma í.›

¹⁵ Tɛɛteleo a gbǎn kaan bi sìndɛɛgi ni í, wàlá bi wálifiio cáan cúlo na bí tɛ́ʔɛ bi syɔɔ í.

¹⁶ Ofiiri tɛ́ɛw ga bi kwɔ́ɔ í, wàlá lɔgbanri onikisi, koro ga jáa safiiri í.

¹⁷ Tɛ̀ɛw, ní vɛɛri a gbǎn tímana ní bi ní í, pi a gbǎn fàli tɛɛteleo yalele na í.

¹⁸ Korayiw ní kirisitaliw mɛ́ɛyɛ yerile nyúngo caa o nyɛ í. Sícilimi taala n kpɔ́ʔɔ n sɔ̀lɔ kɔ́nɔpiiyi na.

¹⁹ Etyopii topaziw a gbǎn tímana ní bi ní í. Tɛɛtelew a gbǎn cáan cúlo na ní bi ní í.

²⁰ Lǎli bee ni sán si sícilimi yìrigí? Sán cánni tɛɛkòrogo nyɛ?

²¹ Pi n làra sìi yáriri myɛ na. Pi n làra féjɛɛngèle na ke yìrigí lè ǹjogi ni.

²² Kálagili weecurugo ní kùúw i gi nyuu níì jo: ‹Wolo líiweegèle n bi kéeli lóʔo.›

²³ Kolocɔlɔɔ wi bi kólogi cán, woro nibin wi bi tɛɛkòrogi cán.

²⁴ Níì cán woro wi wéle ni nangi fwɔɔ tári láʔagéle na. Wi i ki myɛ nyaagi nyɛ̀ʔɛgèle láara ni.

²⁵ Lǎli ni wi káfalagi líbeganma tɛ̀ɛn n láʔa lè, níì lǒyi tɛɛ̀laʔala wòlo,

²⁶ lǎli ni wi kanma tɛ̀ɛn zěgi na lè, níì kologo wòlo nyɛ̀ʔɛni nyɛ́ʔɛnɛmɛ, ní nyɛ̀ʔɛvōloli ma lè,

²⁷ lǎli bee ni wi sícilimi nyaa níì bi múgu n tɛ̀ɛn. Wi n bi kàpɔɔnw le, níì bi sámaga n sɛʔɛ.

²⁸ Koro kàdoʔo ma a wi syɔɔn pye: ‹Wéle, gee gi nyɛ lè Kàfɔw yɛ́ʔɛ fyáara, koro gi nyɛ sícilimi. Bàā còʔoró kapeegi na, koro gi nyɛ cánni.› »