Zyɔbi 27 - Cebaara Bible 2010

¹ A Zyɔbi taʔa n fala wi joomi kurugo níì jo:

² «Kolocɔlɔɔ woweew mɛ́ʔɛ na, woro wee wi cée mii táangi joolo na lè, Séew Myɛ Kàfɔlɔ wi mii fúngi nyìn yasorogo na lè,

³ n mii ŋɔ́ngari yaʔa mii ni, Kolocɔlɔɔ nyɔ́ɔgi káfalaga si pye mii fínaaweegèle ni,

⁴ mii nyɔɔwari a tée sìnzinmɛ syɛ́ɛnrɛ joo í, mii nyínni a tée jànvaa syɛ́ɛnraa joo í.

⁵ Mii í tànʔa kaan yele ma, ki n yɛlɛ sɔ̀nguri bee í léeli mii na. Fwɔɔ bi taa mii í ŋɔ́ngazangi ŋɔ́n, mii a tée mii sínni yaʔa í.

⁶ Mii a kòro mii sínni ni, mii a li yaʔa í. Mii fúngi o kolomɔ kaangi mii ma mii cángaa faala kéele na í.

⁷ Ki n yɛlɛ syɛɛnpeew wóʔo félege í pye mii nigoow na, syɛɛnnaa-sìnzinw wóʔo félege í pye mii kàsiitun-nyɛ́nw na.

⁸ Sɔ̀ngumɔ tɛɛtaʔagìí gi kòro Kolocɔlɔɔ yɛ́ʔɛnaa-sìnvyaaw ma, lǎli ni wi ga ceri n láʔa yaà lè, lǎli ni Kolocɔlɔɔ ga wi sìíw kwɔ́ɔ lè?

⁹ Lǎli ni wɔʔɔgɔ ga nan wi na lè, a Kolocɔlɔɔ i wi sùpili lúro lé?

¹⁰ Séew Myɛ Kàfɔlɔ lé wi a pye wi fundaanri? Wi a ra Kolocɔlɔɔ mɛ́ɛgi yiri lé làrigèle myɛ ni?

¹¹ Mii a yele tama Kolocɔlɔɔ séew kapyegèlē na. Mii a Séew Myɛ Kàfɔlɔ kakɔrirɔgēle làriga yele na í.

¹² Kàjáa yele myɛ n ge sámaga n nyaa, nyàʔá si gi nyɛ yele gbanzan syɛ́ɛnri bee nyúngo, dee yele nyuu ni wáa káfalaga kurugo lè?

Taali li lè li a mɔn í

¹³ «Lɛɛli Kolocɔlɔɔ kúun syɛɛnpeew ma lè, loro li nyɛ lee naa, kɔ́rigee Séew Myɛ Kàfɔlɔ kaangi syɛɛntanʔaw ma lè, koro gi nyɛ gee naa:

¹⁴ Wi ga jaafɔnɛʔɛbéle taa, poro i nyɛ ŋɔséew wòolo, wi yòdaʔayi a gbǎn lìile taa li be tín í.

¹⁵ Káfalagi yáama pi a kári ní be wogorobèle ní, pe lɔgucebèle si a nyɛni be kéeli na í.

¹⁶ Wi ga wálifiiw kpóʔoro a wi pye àmɛɛ támiige nyɛ lè, wi ga búroyi kpoʔolo a yi pye àmɛɛ cóoro nyɛ lè,

¹⁷ woro wi a yi kpoʔolo, kàjáa syɛɛnsiɔn wi a yi le, tɛɛlɛ fun syɔ́ɔn wi a wálifiiw taa wi lɛɛlɛ.

¹⁸ Wi n wi kpáagi faan àmɛɛ vàánvanʔa wóʔo nyɛ lè, ní àmɛɛ kpaàweleo vobiige nyɛ lè.

¹⁹ Wi i sìnɛ́ lɔrɔfɔlɔ, gi kwɔ́ɔmi si bi nyɛ poro. Wi n nyapiigèle múgu, yafyɛn ga níì kòro í.

²⁰ Fyáakpɔɔri i foo ni jǐn wi ni àmɛɛ lòyo nyɛ lè. Káfala-sìnjinnɛ n wi láa yébiligi ni.

²¹ Canʔafolomɔ káfalagi i wi lée, wi i syée. Ki i wi kíle ni kɔ́ngi wi tɛ́ɛgi ni.

²² Pe i wi ŋɔɔgi ní ŋaaya ní nyinimɛ fun, wi si i ŋàʔaná bi fǎn syɔɔ yi ma.

²³ Pe i kadaagèle kóri wi kéeli na, ní i wi sɔ́nɔ beè wi da pye lè.