Zyɔbi 26 - Cebaara Bible 2010

Zyɔbi syɛɛnlurugori: Funbɛɛnrɛ dɛ̀ɛmɛnɛ mɔ tɔ̀nɔ́ kaangi mii ma lee!

¹ A Zyɔbi wi yari:

² «Mɔ n tɔ̀nɔ n gbàn ni fànʔafunvɔlɔ dɛ̀ɛmɛ́! Mɔ n tɔ̀nɔ n gbàn ni báriga fun kɔ́lɔ syoo!

³ Mɔ n tɔ̀nɔ n gbàn ni sícilimɛ funvɔlɔ yaragi! Mɔ tɔ̀nɔ́ i cánna saʔa tèé.

⁴ Wìí má si mɔ syɛ́ɛnri nyuu? Syɛ́ɛnri mɔ nyuu lè wìí wi di le mɔ ni?

Kolocɔlɔɔ dulunyanbow fànʔa

⁵ «Woguubèle be nyɛ lè lǒgi, ní gi yáriri táàma, pe i cɛ̀lɛ́.

⁶ Kúbèle tɛɛkòrogo i nyɛ womúguyaʔaga ní wi yɛʔɛ̀ ma, yatɔngɔ o nyɛ kálagili wéʔe na í.

⁷ Woro wi solomɔkulo kàbangi caragi yafyɛn funw na, wi n tári yérige dàʔafaliw na.

⁸ Wi i lǒgi kpóʔoro kiyɛɛ na wi fàfaanyi ni, fàfaanyi si o fúrugu ki líbeli báriga ni í.

⁹ Wi i yenyìn-mí-syɔ́ɔngi yɛ́ʔɛ tɔ́ngi, wi i fàfaanyi téeri ni gi tɔ́ngi.

¹⁰ Wi n tɛɛ̀laʔala kán círiri lǒyi na bi láʔala wòlo gbɛ̀ɛ́nmi, ní yébilimi nínge ni.

¹¹ Nyɛ̀ʔɛni gàángéle i cúngu, ní i curugu wi kàfulogi báriga ni.

¹² Wi n sólomi lɔ̀ʔɔ fúugo wi fǎngi báriga ni, wi n yacobeegi Arahabi tɔ́nʔɔnɔ wi sícilimi báriga ni.

¹³ Wi nyɔ́ɔgi káfalaga n nyɛ̀ʔɛni pɛ́ɛ, wàbigi gi fé lè, wi kɔ́gi n gi fùru.

¹⁴ Gee bee myɛ i nyɛ wi kapyegèle wobiigéle, joomɔ cɛɛri si wolo lúro yagana ge ni, kàjáa wi nyɛ̀ʔɛvōloli kàfulogo doò, wìí wi a gi kɔ́rɔw cán?»