Zyɔbi 24 - Cebaara Bible 2010

Zyɔbi syɛɛnlurugori i syée: Kolocɔlɔɔ n syɛɛnpeebèle yaʔa peyɛɛ ma

¹ «Nyàʔá na Séew Myɛ Kàfɔlɔ ga làrigèle kèle kɔn n yaʔa í? Bele be wi cán lè, nyàʔá na pe o wi cányi nyaagi í?

² Pe i láʔagoloyi kàragí. Pe i yaweeri nàʔá, dee be yùu lè.

³ Pe i syée ní círibèle jòfani ní, pe n lɔgucew nɔ̀ɔ cò n yaʔa fwɔɔlɔ nyɔ́ɔ ni.

⁴ Pe i foomɔfɔbèle ŋɔrɔgi ni yirigi kólogi ni. Pe i tári fɔ̀ngɔfɔɔlɔ myɛ kɔ́ri pe i pìnɛ́ ni làrá.

⁵ Wéle, àmɛɛ seʔe jofanibèle gi kpéʔele lè fìími tára ni, ànbée be yirigi nyǐnjerigi na ni syée be fáliw kurugo jàngó bi yaliire taa, sìnbirigi yagana gi nyɛ bàā yaliire kaangi pìíbèle ma.

⁶ Pe i yaweeri nyàā kɔɔn sìnbirigi ni, ní i ɛrɛzɛnw cɛnɛ syɛɛnpeew ɛrɛzɛn séʔe ni.

⁷ Pe i sìnɛ́ ni syɔ̀ɔ́n cepyá, yalere fun, làgoyo o nyɛ be ma wéeri kéele na í.

⁸ Nyanbeleyi zàʔá i be nyíngi, tɛɛlaragi fɔ̀ngɔ kéele na, pe i fálayi fàán ni có ní be kɔ́yi ní.

⁹ Pe i círiw kíle ni láari ní fungbanga ní, ní i yarira syoo foomɔfɔlɔ ma ni téeri fwɔɔlɔ nyɔ́ɔ ni.

¹⁰ Pe i syée fée cepyá yalere fun, pe i yaliipwɔɔgéle tugu, á kateegi si be jáa gbanʔama.

¹¹ Pe i sǐnmi sámagi tɛɛsùluyi ni. Pe i ɛrɛzɛnw fórogi ɛrɛzɛn lógi tɛɛnùgugo ni bi gi taa lògbaalaagi i nyɛ be na.

¹² Bele be nyɛ kùúw tɛ́ʔɛmɛ ni lè, be cɛ́ɛnmi i lúro kěgi ni, wogbalibèle pìigēle i sùpiigèle wáa. Kàjáa Kolocɔlɔɔ o kapeegi bee córo í.

¹³ Pèle n peyɛɛ lége bele ni be peyɛɛ bye lè gbɛ̀ɛ́nmi nigoolo, pe o bi kóloyi cángi ni láʔala í, pe o kòró bi kobiigèle ni í.

¹⁴ Syɛɛnkpoow i yìrigí nyǐnjerigi na bi wɔʔɔgɔfɔw, ní foomɔfɔw kpóo, ki ga pye yébiligi ni, wi n pye mɔ a jo kàyuuo wii.

¹⁵ Kanɔnʔɔbyew nyápile i wɔɔfarari yèʔerí, wi i gáà jo: ‹Syɔɔn faala a mii nyaa í.› Wi n si fàni tɔ́n wi yɛɛcɔɔli na.

¹⁶ Yébilimi ni be kpáayi kabagi, ní i kpáayi tɔ́ngi peyɛɛ na cángi làla ni. Pe ga gbɛ̀ɛ́nmi cán í.

¹⁷ Nyǐngi nyɔ́ɔ i nyɛ be ma àmɛɛ kùu nyímɛ nyɛ lè. Ncan pe i kùúw fyáara kele cángi ni láʔala.

¹⁸ Ee! Syɛɛnpeebèle i nyɛ mɔ a jo yafaʔala lii, lɔ̀ʔɔ ǹjoʔo ni ni syée! Pe lɛɛli n dánga tári na, pe o syée ɛrɛzɛn séyi kólogo ni í!

¹⁹ Amɛɛ wáami ní káfugi lànɛɛzyiw lɔ̀ʔɔ gbo lè, kánmi bee na kúbèle tɛɛkòrogo kapeebyeo jóori!

²⁰ Wi nɔ́ɔw láʔa a fɛ̀ʔɛ wi na, wí pye fyɛ́ɛnri ma lìijànna, pe a ní sɔ̀ngí taa wi kéeli na í! Sìnzinmi n ceri n yiri yaà àmɛɛ tiige nyɛ lè.

²¹ Cenaa-sìnzeew wi lè pyà fun ni, wi maa ni wee bee fuguri, wi da ni lɔgucew sámagi ni có í.

²² Kàjáa Kolocɔlɔɔ na, wi fǎngi báriga ni, wi i syɛɛntanʔabèle sìi canya nɛʔɛgi, poro be yìri n yére bele, bi gi taa pe da níì tága sìíw kéele na í.

²³ Wi n ŋɔ́ndaala kaan be ma li pye be tɛɛ̀sigili, wi nyɛnɛ i nyɛ be kóloyi na.

²⁴ Pe n yìri n làlaa cɛɛri kwɔ́ɔ, pe si ga níì nyaa í, pe i tuun, pe i nangi be kwɔ́ɔganmi na àmɛɛ syɛɛnsanbèle myɛ nyɛ lè. Pe n be ceri àmɛɛ yaliikanga nyɛ lè.

²⁵ Kapye ki o nyɛ nya í, wìí wi a jo mii n finɛ, si mii syɛ́ɛnri kàriga gbanzan syɛ́ɛnrɛ?»