Zyɔbi 23 - Cebaara Bible 2010

Zyɔbi syɛɛnlurugori: Kolocɔlɔɔ n cée mii ma pínɛ-mí-jooli na

¹ A Zyɔbi wi yari:

² «Níjanʔa níìgēle, mii káyaagi joolo i nyɛ céemɛ kéele, mii kɔ́gi i mii cɛ́ɛnmi có ni yéregi.

³ Ee! Mii ga maa gi cán tɛ́ɛgee ni wi a nyaa lè, kapye mii a dée gbǎn nan wi tɛɛkòrogi na,

⁴ mii a dée mii kéeli joo wi yɛʔɛ̀ ma, mii a dée mii nyɔ́ɔgi nyìn kérigèle na.

⁵ Syɛɛnlurugori wi a dée kaan mii ma lè, mii a dée di cán, dee wi a dée joo mii ma lè, mii a dée di kɔ́rɔw cán.

⁶ A wi a dée wi fǎngi myɛ tɛ́ʔɛ lé bàā cáan ní mii ní? Eʔe, wi a dée tɔ́ɔ lóʔo mii ma.

⁷ Lǎli bee ni, wi ní syɛɛnsiɔn a dée ra nyuu ní peyɛɛ ní. Mii kútiijoow a dée kòro bàā mii táangi nyuu.

⁸ Kàjáa mii ga kári canʔafolomɔ ma, wi o yaà í. Mii ga kári canʔajeemɛ ma, mii a wi nyaa yaà í.

⁹ Mii n wi caa solomɔkulo kàbangi na, mii si ga wi nyaa yaà í, níì lúru n pan wòrogulo kàbangi na, mii ga sèʔê wi nyaa í.

¹⁰ Kólogee si ni mii táanri lè, wi n gi cán. Wi ga mii sɛʔɛ n wéle tunweele ni lǎli ni lè, mii a yiri féw fɔɔnrɔ fun àmɛɛ tɛɛ̀ nyɛ lè.

¹¹ Mii tɔ́lɔyi i nyɛ wi nyɔ̌ngèle ni. Mii n wi kólogi tánʔa ki tánʔaganmi na, mii ga wàli n yiri gi ni í.

¹² Mii ga wi nyɔɔwari kajoodɛɛngēle yaʔa í. Mii n mii nyɛ́nɛ kéeli yaʔa li taʔa wi nyɔ́ɔgi syɛ́ɛnrɛ na.

¹³ Kàjáa wi ga keele kɔ̀rirɔ n tímana, wìí wi a li kàriga? Gee gi wi dɛ́nɛ lè, koro wi kpéʔele.

¹⁴ Koro na kéelee wi tímana mii kéeli na lè, wi a li foro. Li feleye saʔa sèʔé i nyɛ wi ma.

¹⁵ Gee bee si na zɔ̀nviigi mii kɔɔn wi yɛʔɛ̀ ma. Mii ga sɔ̀ngi gi na, mii n fyáa wi na.

¹⁶ Kolocɔlɔɔ n mii bárigaw kwɔ́ɔ. Séew Myɛ Kàfɔlɔ n mii nyìn fyáari na.

¹⁷ Níì cán yébilimi ban pi mii kálagi n láʔa yaà í, yébiliwɔɔli ban li mii tɔ́n í.