Zyɔbi 22 - Cebaara Bible 2010

Elifazi jooli: Zyɔbi n kolo kányɛʔɛ na

¹ Elifazi wi lè Teman ye wów, a woro syɛ́ɛnri láa n gi joo níì jo:

² «A syɔɔn a gbǎn yarigaa nyɔɔ lé Kolocɔlɔɔ na? Eʔe, sícilio kanyɔɔni i nyɛ wiyɛɛ tiimaw na.

³ Mɔ ga sín, nyàʔá gee bee a nyɔɔ Séew Myɛ Kàfɔlɔ na? Nyàʔá wi taagi mɔ kajoolo-funmi tánʔaganma ni?

⁴ Mɔ Kolocɔlɔɔ yɛ́ɛgi fyáara na lé wi mɔ kpúmɔn, níì pye kútii na ní mɔ ní?

⁵ Mɔ kaŋágabye-nɛʔɛri kéele na ban ì? Ní mɔ kolomi kèlē ge lè córomɔ fun ì?

⁶ Níì cán mɔ maa ni yarira syoo nyùngo fun mɔ senyɛ̀nnɛ ma ni téeri fwɔɔlɔ nyɔɔ ni. Mɔ maa ni búroyi nɛnɛ ni syoo bele na mɔ da ni yaari lè níboribéle.

⁷ Mɔ da ni lɔ̀ʔɔ kaangi syɔ́ɔnwee ma wee na lògbaalaagi nyɛ lè í, mɔ maa ni cèʔé yaliiri na kateèjaaw ma.

⁸ Tári maa pye nànniriw wóro, nɛ̀ɛnyɛnɛgi fɔ́lɔ wi pye di nyúngi na.

⁹ Mɔ maa ni lɔgucebèle lúrugu ni tórogi ní kɔwaayi ní, ní i círibèle kɔ́yɔ kabagi.

¹⁰ Koro na karinyanya mɔ màʔa, á fyáakpɔɔri pàla n too mɔ na.

¹¹ Yébilili i wóo, mɔ ní o yafyɛn nyaagi í, á lòkpoloyi mɔ wáa.

¹² Kolocɔlɔɔ o yaà nyɛ̀ʔɛgèle ni ǹjoʔo ma ì? Ŋɔripiigèle léeliganma wéle àmɛɛ ge yaà lè ǹjoʔo ma!

¹³ A mɔ si jo: ‹Nyàʔá Kolocɔlɔɔ cán? A wi a gbǎn yébilimi kalaragēle nyaa lé bi ge kútiiw ceri?

¹⁴ Fàfaanyi i wi tɔ́ngi, wi o yafyɛn nyaagi í. Wi i nyaari ni nyɛ̀ʔɛgèle máari.›

¹⁵ Cíi! Kolɛɛgee ni syɛɛnnaa-sìnzinbèle da ni táanri lè, koro ni lé mɔ caa bi kòro?

¹⁶ Pe n be cò n lǎli yaʔa sìnnan ni, cábiga n be kàpɔɔnw láa.

¹⁷ Pe maa ni gi nyuu Kolocɔlɔɔ ma níì jo: ‹Léeli wolo na.› Lǎli bee ni nyàʔá Séew Myɛ Kàfɔlɔ a gbǎn pye be ma?

¹⁸ Bi gi taa woro wi da be kpáayi nyìn lɔ́ri na. Mii ní syɛɛnpeebèle lálii ní, wo n léeli woyɛɛ na.

¹⁹ Syɛɛnsinbèle a gi nyaa sáā fundaanra kpéʔele, tɛɛlɛ fun syɔ́ɔnw a ra wiyɛɛ nyɛ́nɛ be na, si jo:

²⁰ ‹Wolo kàsiitun-nyɛ́nbèle be kwɔ́ɔ bele! Náagi n be yanɛʔɛri sórigo mɛnɛ mɛnɛ!›

²¹ Ki n yɛlɛ mi bɛ̀ɛ ní Kolocɔlɔɔ ní, mɔ a yɛɛ̀nyinge taa. Kánmi bee na mɔ lɛɛli a pye wojanna ní.

²² Tamani lóʔo wi nyɔ́ɔgi na, mí wi syɛ́ɛnri kɔn mɔ fúngi ni.

²³ Mɔ ga lúru n pan Séew Myɛ Kàfɔlɔ ma, mɔ a lúru miyɛɛ daa, ní mɔ ga tɛ́nɛ̀ sìnzinmi léeli mɔ fanikpaagi na.

²⁴ Tɛ́ɛw wáa támiigi ni, Ofiiri tɛ́ɛw wáa lòcooloyi kàdɛnɛrɛ nínge ni.

²⁵ Séew Myɛ Kàfɔlɔ wi a pye mɔ tɛ́ɛw, bi pye mɔ ma wálifiio gbooyo.

²⁶ Lǎli bee ni mɔ a Séew Myɛ Kàfɔlɔ yaʔa wi pye mɔ fundaanri kèlē, mɔ a mɔ yɛ́ɛgi yìrige bi wáa Kolocɔlɔɔ kàbangi na.

²⁷ Mɔ a wi nyɛ́ɛri, wi a mɔ nyɛ́ɛrigi lóʔo. Mɔ si mɔ nyɔɔfaliyi foro.

²⁸ Mɔ ga keelaa joo n ceri, li a nyɔɔ mɔ ma. Gbɛ̀ɛ́nmi a ra nyín mɔ kóloyi ni.

²⁹ Pe ga mɔ cɛ́rɛ, á mɔ jo: ‹Nɛ̀ɛnyɛnɛgɛ gii gee!› Lǎli bee ni, wee nyúngo gi jùngu lè, Kolocɔlɔɔ a wi syɔɔ.

³⁰ Alí wi a kolomi fɔ́lɔ syɔɔ, woro wee wi yɛlɛ ní wi syɔɔli ní lè mɔ fɔɔnrɔ fun kɔ́yi báriga ni.»