Zyɔbi 21 - Cebaara Bible 2010

Zyɔbi syɛɛnlurugori: Syɛɛnpeebèle fundaanra i nyɛ kapyele

¹ A Zyɔbi wi yari:

² «Ye lóʔo, ye mii syɛ́ɛnri lóʔo, kánmi bee na yele a mii kɛɛlɛ.

³ Ye mii kpàraco, mii si joo. Mii ga joo n kwɔ́ɔ, mɔ a naa ra miyɛɛ nyɛ́nɛ.

⁴ Syɔɔn ní lé mii gi taagi? A mii kpàracogi i kwóo lé nyùngo fun?

⁵ Ye fíige mii ma kí yele fúnyi wɔ́ɔ, yé kɔ́yi tɔ́n nyɔ́ɔyi na.

⁶ Mii tiimaa, lǎli ni mii ga sɔ̀ngi gi na lè, fyáari n mii cò, mii céri n ni cɛ̀lɛ́ gbanʔama.

⁷ Nyàʔá na syɛɛnpeebèle kòro beè sìi na? Pe i leegi, ní caa i fànʔa taagi.

⁸ Pe yòdaʔayi i fànʔa taagi pe nyɛnɛ na, ní be ní, pe pìinyanbiiyi i báragi pe nyɛnɛ na.

⁹ Yɛɛ̀nyingi gi nyɛ be kpáayi ni, fyáara o yaà í. Kolocɔlɔɔ kàgbeeli o nangi be na í.

¹⁰ Pe náapegèle fànʔa n nɛʔɛ, ke o wáa ni fɔ̀ngí í, pe nìnɔ́ɔyi i sii, yi seriyi o kálagi í.

¹¹ Pe i be nìbyapiiri yaari ti i fé ni máari àmɛɛ bàtogo nyɛ lè, pe pìíbèle i yóo.

¹² Pe i ŋúu ní tàmáw, ní kɔ̀ríw ní, ni fundaanra kpéʔele máani wìimɛ kéele na.

¹³ Be sìíw canya i kwóo fundaanri ni, cɛ̀ɛri na kúbèle tɛɛkòrogo fyáakpɔɔrɔ n be cíbele.

¹⁴ Pe si maa ni gi nyuu Kolocɔlɔɔ ma níì jo: ‹Léeli wolo na. Wolo caa o caa bi mɔ kóloyi cán í.

¹⁵ Wìí wi nyɛ Séew Myɛ Kàfɔlɔ, á gi yɛlɛ wolo í da báara wi ma? Wolo ga ni wi nyɛ́ɛri nyàʔá tɔ̀nɔfeleo wolo a taa gee bee ni?›

¹⁶ Pe fundaanri o nyɛ be kɔ́yi ni ì? Mii ní syɛɛnpeebèle lálii n tɔ̀nɔ n léeli woyɛɛ na.

¹⁷ A ki i nyɛ lé tɔlɔyɔ saʔa syɛɛnpeebèle fètinnɛ i fíri, a fóomi i tuun be na, a Kolocɔlɔɔ i be lɛɛli kaangi be ma wi fundanʔari ni?

¹⁸ Ba pe i nyɛ lé àmɛɛ nyàáwaʔa nyɛ, gee káfalagi lée ni syée lè, ní sùweʔe, gee káfala-sìnjinni yìrigí lè?

¹⁹ Kpúmɔnri Kolocɔlɔɔ kpéʔele lè syɛɛnpeew jàala kánma na lé wi di sámagi ni yaari? Wi tiimaw Kolocɔlɔɔ a wɔʔɔ jàngó wi gi cán.

²⁰ Ki n yɛlɛ wi wiyɛɛ tiimaa kálagili nyaa ní wi nyapiigèle ní, woro wi yɛlɛ wi gbaa Séew Myɛ Kàfɔlɔ fundanʔagbɔɔrɔ na.

²¹ Níì cán nyàʔá wi a ní da caa wi kpáagi kéele ni wi kàdoʔo ma, lǎli ni wi yéyi nyɔ́ɔ ga foro lè?

²² Kolocɔlɔɔ lé syɔɔn a tama cánna na, woro wee wi ǹjoʔo ma wóbèle kútii cɛnɛ lè?

²³ Syɔɔnwaa i kúu bi wi yaʔa wi nidaanmi ni, wi n pye wodɛ́ɛɔn ní sági yɛɛ̀nyinge na n foro kasɔngunɔ fun,

²⁴ kùnbɛnʔɛgèle n nyìn sǐnmi na, tùnmɔ si i nyɛ wi kacelepìremi ni.

²⁵ Wee si i kúu ní kayaagi ní, fúngi ni, kataanna sìnlaala ni.

²⁶ Pe n pínɛ ni sìnɛ́ támiigi ni, fyɛ́ɛnri si i be tɔ́ngi.

²⁷ Mii n yele sɔ̀nguri sámaga n cán, ní kolomi kèlē yele tímana ni taari mii na lè.

²⁸ Yele i gi nyuu níì jo: ‹Sán mɛ́ɛkpɔʔɔfɔw kpaʔa nyɛ? Sán fànikpaagi nyɛ, gee ni syɛɛnpeebèle da tɛ́ɛn lè?›

²⁹ Yele si ga tɔ̀ʔɔ́ kɔ́ɔ̀ kozɔ̀lɔbèle yíbe ì? Ba yele kérigèle cée lé, gele na be nyɛ lè séerabéle?

³⁰ Pe i kakolobyeo yaari bɔ̀nɔw canʔa na ní fundanʔagbɔɔri canʔa na.

³¹ Wìí wi a fúlo wi na wi nyɛnɛ na wi tánʔaganmi kéele na? Gee wi kpéʔele lè, wìí wi a gi sìndɛɛgi lúrugo wi ma?

³² Pe n kári ní wi ní nyangbaaw ma, pe i wi nyángi kɔ̀rɔsíi.

³³ Jǐnlɔgi kàboloro i nyɛ wi ma wovaʔara ní. Syɛ́ɛnbèle myɛ maa taʔa wi na ni syée wi kurugo, córomɔ fun syɛ́ɛnmɛ maa kíni wi yɛʔɛ̀ ma.

³⁴ Nyàʔá na yele gbanzan kɛɛlɛli naa félege kpéʔele mii ma? Yafyɛn o nyɛ yele syɛɛnlurugori ni kapye námara ban í.»