Zyɔbi 20 - Cebaara Bible 2010

Sofari jooli: Syɛɛnpeew wɔʔɔyɔ

¹ Sofari wi lè Naama ye wów, a woro syɛ́ɛnri láa n gi joo níì jo:

² «Wéle, koro na mii fûngabalagatɔw mii ŋàʔaná mii í syɛɛnlurugori kaan.

³ Mii n fúlogo syɛ́ɛnrɛ lóʔo, dee di mii faari lè. Kàjáa mii pǐli i syɛɛnlurugori kaangi mii ma, dee mii a joo lè.

⁴ Mɔ ga gi cán ì, ncan nlaa yaà làrigèle myɛ ni, nlaa be syɔɔn tɛ́ʔɛ lè tári na,

⁵ syɛɛnpeebèle fàndaara a mɔn í, Kolocɔlɔɔ yɛ́ʔɛnaa-sìnvyaaw fundaanra i nyɛ làlaa cɛɛri yagana ì?

⁶ Alí wi ga maa tɔnɔ fwɔɔ n sáà nan nyɛ̀ʔɛni na, a wi nyúngi sa ni cínɛ fàfaanyi na,

⁷ wi a kwɔ́ɔ gi kòro nya làla o làla àmɛɛ wi fíri nyɛ lè. Bele pe da ni wi nyaagi lè poro a ra gi nyuu si jo: ‹Sán wi nyɛ?›

⁸ Wi a yìri fókaanya na bi kári àmɛɛ ŋúnɔgɔ nyɛ lè, wi a ní nyaa í. Wi a nɛnɛ bi núngo yaà àmɛɛ yébilige yanyaʔa nyɛ lè.

⁹ Nyapilee li da ni wi wéle lè, li a ní wi wéle í, tɛ́ɛgee ni wi da tɛ́ɛn lè, ki a ní wi nyaa í.

¹⁰ Foomɔfɔbèle a ra wi pìíbèle kàfalima táanri, wi kɔ́yi si gi lúrugo kaan, gee ki da pye lè wi lɔ́ri.

¹¹ Wi kaceleyi maa nyìn wi nìgɔcarigi fànʔa na, koro si gi pínɛ n too gee ní wi ní támiigi ni.

¹² Péemi maa tɛ́nɛ wi nyɔ́ɔgi na, wi maa ni bi kpóʔoro wi nyínni láara ni,

¹³ àlí wi maa ni bi kɔngi, wi ga fɔ̀lɔ ni bi yaari í, fwɔɔ a wi i bi có ni yaari wi nyɔ́ɔgi ni.

¹⁴ Wi yaliiri i kálagi wi láagi ni, ti i pingi wi fúngi ni màátɔnsɔɔnrɔ.

¹⁵ Lɔ́ri wi jɔ́ɔ lè, wi a di tùgu, Kolocɔlɔɔ a di yirige wi fícɛnni ni.

¹⁶ Wàbisɔɔnrɔ wi da ni syɔɔnri, màátɔn a wi nɔn kpóo.

¹⁷ Sárigi, ní nàaráw wi da ni fóo àmɛɛ lókoloyo, ní cábiya, ní lòcooloyo nyɛ lè, wi a ní kɔ́ koro kàa nyaa í.

¹⁸ Dee wi báara n taa lè, wi a di lúrugo kaan, wi a di jɔ́ɔ í. Dee wi taa wi jàgiw ni lè, wi a ní di fundaanri pye í.

¹⁹ Níì cán wi n foomɔfɔbèle tɔ́nʔɔnɔ, níì kári níì be yaʔa, wi n be kpáagi nɛnɛ n syɔɔ, bi gi taa kàa wi da yɛlɛ bi faan.

²⁰ Wi o tíngi yarigaa na í, wi làáwologi n wi kaan wi o yarigaa faala yaari ki i sɔ̀lɔ́ wi na í.

²¹ Yarigaa faala da ni syoo wi làáwologotɔw ma í. Koro na wi nidaanmi a mɔn í.

²² Bi wi yaʔa wi yanɛʔɛri nínge ni, wɔʔɔgi a ba too wi na. Fɔ̀rɔgɔfɔbèle myɛ kɔ́yɔ a ba nan wi na.

²³ Wi a pye bàā fícarigi nyìngí Kolocɔlɔɔ si ba wi fundanʔari káfugbanga cáan wi na, si ŋaaya tɛ́ʔɛ bi wi kúru zàʔá, yee yi a jée wi céri ni lè.

²⁴ Wi ga ni fé túnmɔri kapɛɛnkpumɔn-yárira na, kanyɛɛnrɛ sedege a wi fùru.

²⁵ Wi ga ŋaagaa kíle n kɔ́n n yirige wi céri ni, ní naànijemuo ŋaafirigege wi yɛ̀ɛ́li ni, fyáakpɔɔrɔ kele a too wi na.

²⁶ Yébiliwɔɔgèle myɛ n kɔn n yaʔa wi ma n pye wi lɔ́ri, naà i wi sórogi mɛnɛ mɛnɛ, gee gi lè syɔɔn o gi kpèʔelé í. Gee ki a kòro wi fanikpaagi ni lè koro a lìi láʔa yaà.

²⁷ Nyɛ̀ʔɛni a wi kolomi tɛ̀ɛn, tári si yìri wi kánmi na.

²⁸ Wi kpáagi lɔ́rɔ a fóo kári Kolocɔlɔɔ fundanʔari canʔa na àmɛɛ lòcoologo nyɛ lè.

²⁹ Loro li nyɛ lɛɛli, lee Kolocɔlɔɔ kaangi syɛɛnpeew ma lè, kɔ́rigi bee Kolocɔlɔɔ nyɛ́nɛ n wòlo wi ma.»