Zyɔbi 2 - Cebaara Bible 2010

Zyɔbi sɛʔɛweleli siin wólo

¹ A ki ga pye cangaa, a Kolocɔlɔɔ pìíbèle pan n baa yére Yawe yɛ́ʔɛ ma, a Sutanaw wɔ́ɔ̀ pan n baa yére be níngi ni Yawe yɛ́ʔɛ ma.

² A Yawe Sutanaw pye: «Sán mɔ yìri?» A Sutanaw Yawe yari: «Tári mii fé ni forogi ni nyaari ni máari di ni.»

³ A Yawe Sutanaw pye: «A mɔ mii falipyew Zyɔbi kɔ̀rɔsíi lé? Syɔɔnwaa o nyɛ wi felege tári na í. Wi i nyɛ kajoolo fun, níì sín. Wi i fɛ̀ɛgí Kolocɔlɔɔ na, ní i còʔoró kapeebyeri na. Wi n sámaga n kòro wi kajoolo-funmi ni, á mɔ mii sɔ́ɔn wi na, a mii wi bɔ̀nɔ nyùngo fun.»

⁴ A Sutanaw Yawe yari: «Saligaa i fɛ̀ɛ́ kàa na. Yáriree myɛ di nyɛ syɔɔn ma lè, wi i di kaangi jàngó bi wi sìíw syɔɔ.

⁵ Kàjáa mɔ kɔ́gi sánʔa mi tánga mi wéle wi kaceleyi, ní wi césaligi na, mii n tága gi na wi a dánga syɛ́ɛnrɛ joo wáa mɔ na mɔ nyɛ́nɛ na.»

⁶ A Yawe Sutanaw pye: «Wi i wee mɔ kɔ́lɔ na, kàjáa mɔ a kɔ́ nan wi sìíw na í.»

⁷ A Sutanaw fala n núngo Yawe yɛ́ʔɛ ma. A wi sáà Zyɔbi kpúmɔn ní namipeere ní, n séli yédaagèle na fwɔɔ n sáà nan nyùnlibiw na.

⁸ A Zyɔbi sísɛɛlɛ láa n tɛ́ʔɛ ni wiyɛɛ ŋàamí, níì tɛ́ɛn cɔ́ɔngi nínge ni.

⁹ A wi céw wi pye: «A mɔ sèʔê kòro lé mɔ kajoolo-funmi ni? Dánga syɛ́ɛnrɛ joo mi wáa Kolocɔlɔɔ na mí kùu nya!»

¹⁰ Kàjáa a wi wi yari: «Mɔ i nyuu nilabala-jáʔa jooganma na. Cíi! Wolo maa kacànga taa Kolocɔlɔɔ ma. Wolo si a wɔ́ɔ kɔ́ fɔ̀lɔ lé kapeegi na í?» Gee bee myɛ fúngo ni, Zyɔbi ga kapeele pye wi syɛɛnjóori ni í.

Zyɔbi tàannyɛnbèle taanri panna kéele

¹¹ Kapeeyi myɛ yi Zyɔbi le lè, a wi tàannyɛnbèle taanri yi kéeli lóʔo, a be myɛ nibin nibin yìri yaà be tátɛɛyɛ ma n pan, poro be nyɛ: Elifazi wi lè Teman ye wów, ní Bilidadi wi lè Syuwa ye wów, ní Sofari wi lè Naama ye wów. Pe maa bɛ̀ɛ gi na bi pínɛ kári wi ma bi sa wi kéeli yáa ní wi ní si wi kpɛʔɛlɛ.

¹² N be yaʔa léelige, a be nyapiigèle yìrige n le wi ni, pe ga níì wi wéle n cán í. A pe i nyaan ni yákpogèle wáa. A pe be búroyi sulugu ní i támiigi koli ni wáa ǹjogi ni peyɛɛ nyúnyi ni.

¹³ A be tɛ́ɛn ní wi ní tári na canya kɔrɔsiin, ní yébiliye kɔrɔsiin, pe wàa faala ga syɛɛnrɛ joo wi ma í, níì cán pe maa wi wɔʔɔgi nyaa àmɛɛ gi kpɔ́ʔɔ n sɔ̀lɔ lè.