Zyɔbi 19 - Cebaara Bible 2010

Zyɔbi syɛɛnlurugori: Ki kwɔ́ɔmi na, mii táangi joofɔlɔ a ba kàa joo

¹ A Zyɔbi wi yari:

² «Làlìí ni yele a láʔa nya mii fúngi curugolo, ní mii tɔ́nʔɔnɔni na ní yele syɛ́ɛnri ní?

³ Wéle, ki tɔlɔyɔ kɛɛ wi wee, yele i nyɛ mii tɛʔɛlɛli na. Fɛ̀ɛrɛ ga yele taa lé kapeegi pyele na mii na í?

⁴ Alí ki ga maa caà wírè pye mii n pùuni, mii pùununi i nyɛ mii nyúngo túgoro.

⁵ Kányɛʔɛ na, kapye yele i sɔ̀ngí yele n fànʔa taa mii na, ní i mii faʔari córo mii kéele,

⁶ lǎli bee ni ye gi cán Kolocɔlɔɔ wi mii kolo, níì mii tɔ́n ní wi cɔ̀ɔ́w ní.

⁷ Mii ga yákpoli wáa péemi kéele na, syɛɛnlurugoro a taa í. Mii ga yeri pe mii syɔɔ, kútii a joo í.

⁸ Wi n mii kólogi tɔ́n jàngó mii a kɔ́ sɔ̀lɔ í. Wi n yébilimɛ lége mii kóbiigèle ni.

⁹ Wi n mii nìjanri wòlo mii na, wi n fànʔafɔ-nyùndɔnni kɔ́n mii nyúngi ni.

¹⁰ Wi n mii kálagi kàbanyi myɛ na, a mii i kwóo. Wi n mii sɔ̀ngumi tɛɛtaʔaga kɔ́n àmɛɛ tiige nyɛ lè.

¹¹ Wi fúngi n tanʔa mii kurugo gbanʔama, a wi mii córo àmɛɛ wi nigoowaa nyɛ lè.

¹² Wi kapɛɛnkpumɔnbèle kabiya n pínɛ ni maa, yi n yi kólogi wòlo fwɔɔ n baa nan mii na, ní baa tɛ́ɛn n mii fànikpaagi màʔa.

¹³ Wi n mii senyɛnbèle léeli mii na, bele be mii cán lè, pe n cariga n léeli mii na.

¹⁴ Bele be nùuni mii na lè, pe n mii yaʔa, mii nìgorobèle n fɛ̀ʔɛ mii na.

¹⁵ Bele pe baa tìrige mii ma lè, poro ní mii falipyecebèle i mii córo nibɔɔn, mii i nyɛ be syɛɛntéeo.

¹⁶ Mii i mii falipyew yeri, wi o syoo mii ma í. A gi yére mii tiimaa i wi nyɛ́ɛri gbanʔama ní mii nyɔ́ɔgi ní.

¹⁷ Mii n kàri nyɔɔnunmɔgɔfɔlɔ mii céw ma, mii n kàri yanunmɔgɔ mii pìiseebèle ma.

¹⁸ Alí nìbyapiiri i mii faari. Mii ga yìri, ti n ni tiyɛɛ nyɛ́nɛ mii na.

¹⁹ Bele pe da pye mii ma lè gbèéw syɛ̀ɛnnɛ, mii n pye be ma yanɔnʔɔgɔ, bele myɛ kéele li da mii dɛ́nɛ lè, pe n lúru ni cáan ní mii ní.

²⁰ Mii césaligi yagana gi kòro n tára mii kaceleyi na. Mii n kwɔ́ɔ n kòro gànʔana.

²¹ Ye nyinimɛ taa, ye nyinimɛ taa mii na, yele ye nyɛ lè mii tàannyɛnbèle! Níì cán Kolocɔlɔɔ kɔ́gi gi nan mii na.

²² Nyàʔá na yele mii kɔ́ri n láa àmɛɛ Kolocɔlɔɔ mii kɔ́ri n láa lè? Mii céri wɔʔɔlɔ ga kɔ́ɔ̀ yele tín nya ì?

²³ Ee! Ki maa yɛlɛ mii syɛ́ɛnri í dée sɛ́bɛ, ki maa yɛlɛ di sɛ́bɛ sɛ́bɛ ni!

²⁴ Gi pye ní tunmɔrɔ ŋáʔa ní, wàlá ní tunmɔnyinnɛ ní, di kòro yaà làla o làla wogánʔana-wòloro ní fálaga na!

²⁵ Mii si na, mii n tɔ̀nɔ n gi fílige n cán ncan mii Nyùnzyɔɔw i nyɛ woweeo ní, woro si wi a ba yìrí yére wozanw tári na.

²⁶ Lǎli ni mii césaligi ga kálagi n kwɔ́ɔ lè, àlí mii céri a ní pye yaà í, mii a Kolocɔlɔɔ nyaa.

²⁷ Woro mii a sámaga nyaa, mii lè, woro mii nyapiigèle a nyaa, wàa nikwɔɔ ban í. Koro mii fúngi sigi ni fɔ̀rɔgí.

²⁸ Lǎli ni yele ga gi joo lè níì jo: ‹Kanmìí na wolo a wi wɔʔɔ, koro ga pye wolo í kútii kéele taa taʔa wi na?›

²⁹ Ye fyáa ŋɔséew na yeyɛɛ kéeli na, níì cán ŋɔséew kpúmɔnrɔ n pee. Kánmi bee na yele a gi cán kútii i yaà.»