Zyɔbi 18 - Cebaara Bible 2010

Bilidadi jooli: Karinyanga n le syɛɛnpeew na

¹ Bilidadi wi lè Syuwa ye wów, a woro syɛ́ɛnri láa n gi joo níì jo:

² «Làlìí ni yele a yére nya syɛ́ɛnri naa joolo na? Ye sɔ̀ngi, koro kàdoʔo ma wo a jo.

³ Nyàʔá na wolo córo àmɛɛ yaweere nyɛ lè? Nyàʔá na wolo nyɛ mɔ nyɛ́nɛ na nikaanriya?

⁴ Ee, mɔ wee fundanʔaratɔw wi wiyɛɛ sulugu lè, a tári yɛlɛ lé di kòro wowaara ní mɔ kéeli na? Fálaga í yìri lé gi tɛ́ɛgi ni?

⁵ Syɛɛnpeew gbɛ̀ɛnmɛ a tɔ̀nɔ́ fígi, wi naanyǐngi ki da ni yìrigí lè, ki a ní da gbɛ̀ɛnmɛ yirigi í.

⁶ Gbɛ̀ɛ́nmi a pye yébilimɛ wi fànikpaagi ni. Wi fètinni li lè wi ǹjogi ni, li a fígi.

⁷ Wi nyɔ̌ngèle cáanna fanʔa i kwóo. Wi tiimaa kajoo-mí-cerigèle a wi cáan.

⁸ Níì cán wi tɔ́lɔyi i wi wáa cɔ̀ɔ ni, wi i táanri ni máari ni có mɛ́ɛngèle na.

⁹ Karinyangi n wi cò yédeleeli na, mɛ́ɛngèle i wi cɔ́ɔnnɔ.

¹⁰ Wi cǒli mɛ́ɛnnɛ n làriga tári ni, karinyanga si i nyɛ wi kólogi ni.

¹¹ Fyáakpɔɔrɔ kele i zɔ̀nviikɔnirɔ wáa wi na kàbanyi myɛ na, ke i wi fèʔelé.

¹² Kateegi n nan wi fǎngi na. Wɔʔɔgi i nyɛ wi taana wi lɛ̀ʔɛgèle ni.

¹³ Ki n wi césaligi tɛ́ɛyɛ káa n kwɔ́ɔ, kùúw pìiselio n wi yasɛɛyi káa n kwɔ́ɔ.

¹⁴ Pe n wi kíle n yirige wi fànikpaagi ni, gee na wi da wi sɔ̀ngumi taʔa lè, mɔ a wi kíle kári fyáakpɔɔri kèlē fanʔafɔlɔ ma.

¹⁵ Mɔ a gbǎn kòro wi fànikpaagi ni, ki ní o nyɛ wi woʔò í. Dìrigíw n cariga wi tɛɛkòrogi ni.

¹⁶ Wi nǐnri i waari táàma, wi káganbiiri si i pábari ǹjogi ni.

¹⁷ Wi kéeli sɔ̀ngurɔ i kwóo ni yirigi tári ni, wi mɛ́ʔɛ a ní pye tɛɛgaa ni í.

¹⁸ Pe n wi ŋɔrigɔ n yirige gbɛ̀ɛ́nmi ni n lége yébilimi ni, pe i wi nɛnɛ bi yirige dulunyanw ni.

¹⁹ Pìibēle wàlá pìinyanbiiye ga kòro wi ma wi syɛ́ɛnbèle nínge ni í, wàa ga kòro sìi na tɛ́ɛgi ni, gee ni wi da pye lè wodɛ́ɛɔn ni í.

²⁰ Wi kwɔ́ɔganmi n canʔajeemɛ ye nyínima, á fyáari canʔafolomɔ ye cò.

²¹ Koro gi kòro syɛɛnnaa-sìnzinw tɛɛkòroyo kwɔ́ɔganma, wee wi lè wi ga Kolocɔlɔɔ cán í, koro gi nyɛ wi tɛ́ɛgi.»