Zyɔbi 17 - Cebaara Bible 2010

Zyɔbi syɛɛnlurugori i syée: Sɔ̀ngumɔ tɛɛtaʔaga ní o mii ma í

¹ «Mii ŋɔ́ngari i kwóo, mii cányi i sɔ̀lɔ́, nyángi n sámaga n yaʔa mii ma.

² Nɛ̀ɛnyɛnɛgi fɔ̀ɔlɔ ga mii màʔa bele ì? Mii nyapili si n yɛlɛ bi kòro nyɛ̀nɛ na be tɛʔɛlɛyi kéele na.

³ Ki n yɛlɛ mɔ tiimaa í mii séeraw yérige miyɛɛ ma. N gi yirige mɔ ni wìí wi ní i yaà bi mii kéeli nyúngo tugo?

⁴ Mɔ n be fúnyi tɔ́n jàngó pe a kɔ́ keele kɔ́rɔ cán í. Mɔ a wɔ́ɔ be yaʔa be fànʔa taa í.

⁵ Pe i nyɛ àmɛɛ syɔɔnwaa nyɛ wee wi wi tàannyɛ̀nnɛ yiri lè yakoliro lɛɛlɛ na, wi jáabèle si mɛ̀ɛ́ kɔ́ɔ̀ wéle n fɔ̀rɔ.

⁶ Mii n baa pye syɛ́ɛnbèle kàseewáa-yáriga, pe i tɛ́ɛri wáa mii yɛ́ɛcɔɔli ni.

⁷ Wɔʔɔgi n mii nyapiigèle kàriga yébilimɛ. Mii yasɛɛyi myɛ i nyɛ àmɛɛ kànyinnɛ nyɛ lè.

⁸ Syɛɛnsinbèle i káama ki nyaani na, tɛɛlɛ fun syɔ́ɔnw n yìri Kolocɔlɔɔ yɛ́ʔɛnaa-sìnvyaaw kánma na.

⁹ Syɛɛnsinw si n sámaga n kòro wi kólogi ni. Wee kɔ́yɔ yi nyɛ lè fɔɔnrɔ fun, wi i kàa fàrá wiyɛɛ fǎngi na ni syée.

¹⁰ Yele si na, ye ní ye lúru yaa maa ye myɛw sáan! Mii a sícilio nyaa yele níngi ni í.

¹¹ Mii cányi n sɔ̀lɔ, mii katimanagèle n kálagi, àlí mii fúngi kanidaangéle.

¹² Pe i yébiligi téeri cángi sìndɛʔɛ ni, ní i gi nyuu níì jo lǎli ni yébilimi wɔ́ɔ lè gbɛ̀ɛ́nmi n nùuni naa!

¹³ Mii sɔ̀ngumi tɛɛtaʔaga gi nyɛ mii í sa tɛ́ɛn kúbèle tɛɛkòrogo ni, mii í sa mii yasinɛgi cáan yébilimi ni.

¹⁴ Mii i yákpoli wáa ni gi nyuu weecurugi ma níì jo: ‹Mɔ wi nyɛ mii tóow.› Ní i gi nyuu fyɛ́ɛngi ma níì jo: ‹Mɔ wi nyɛ mii nɔ́ɔw, ní mii senyɛnw!›

¹⁵ Sán mii sɔ̀ngumi tɛɛtaʔaga nyɛ? Wìí wi mii sɔ̀ngumi tɛɛtaʔaga nyaagi?

¹⁶ Ki a tìgi ní mii ní kúbèle tɛɛkòrogo fúngo ni, lǎli ni wolo a sa pínɛ bi ŋɔ́ndaa lè támiigi ni.»