Zyɔbi 16 - Cebaara Bible 2010

Zyɔbi syɛɛnlurugori: Séerafɔlɔ i mii ma nyɛ̀ʔɛni na

¹ A Zyɔbi wi yari:

² «Mii n joomi naa féleye saʔa lóʔo. Yele myɛ i nyɛ wɔʔɔgɔ kpɛʔɛlɛfɔɔlɔ.

³ Syɛ́ɛnri naa di nyɛ lè káfalaga, kwɔ́ɔmɔ tɔ̀ʔɔ́ o nyɛ di na ì? Nyàʔá gi mɔ fúngi tanʔa mɔ si i syɛɛnlurugori naa kaangi?

⁴ Mii wɔ́ɔgēle, kapye yele ye da pye mii tɛ́ɛgi ni, mii a dée gbǎn joo àmɛɛ yele nyɛ lè, mii a dée gbǎn syɛ́ɛnraa kpóʔoro yaʔa yele kánmi na, mii a dée nyǔngi kólo yele kánmi na.

⁵ Mii a dée nyɔ́ɔgi tɛ́ʔɛ bi fànʔa le yele ni, mii nyɔ́ɔwari nyɛ́ʔɛnɛ a dée yele fúnyi nyíngi.

⁶ Mii ga ni nyuu, kàa a yiri mii wɔʔɔgi ni í, mii ga pyèri, nyàʔá ki a wòlo gi ni?

⁷ Tɔ́ɔliw ni, ée! Wi n mii fǎngi kwɔ́ɔ. Mɔ n kálagili lége mii narigbaagi myɛ ni.

⁸ Mɔ n mii cò kanbeemɛ na, koro n pye séera mii kánmi na. Mii waʔari i yìrigí ni kolomɔ kaangi mii ma mii nyɛ́nɛ na.

⁹ Wi fundanʔari i mii sulugu, ti i nyɛ mii kurugo, wi i gànʔana kúru mii kánmi na. Mii kàsiitun-nyɛ́nw n nyapiigèle còolo mii na.

¹⁰ Pe i be nyɔ́ɔyi múru gbanʔama mii kánmi na. Pe i mii kpúmɔn bɛ̀ɛ́nyi na jàngó bi mii faʔa, pe n pínɛ n tìn n kpóʔoro mii na.

¹¹ Kolocɔlɔɔ n mii le nìbyapiire kɔ́yɔ ni, wi n mii ŋɔrigɔ n wáa syɛɛnpeebèle kɔ́yɔ ni.

¹² Mii maa pye ŋɔ́ndaala na, á wi mii nyàʔara. Wi n mii cò kànyáaw ni n mii kabagi kabagi, wi n mii láa n yérige bàā ŋɔɔgi.

¹³ Wi ŋáayi n mii màʔa n kpàra. Wi i mii sárigèle fúrugu nyinimɛ fun ni, wi i mii yɛ̀ɛzoroli ŋuu tári na.

¹⁴ Wi n kòro ni wéeyi fúrugu mii na, wi i fùurí ni tuun mii na àmɛɛ kapɛɛnkpumɔɔn nyɛ lè.

¹⁵ Mii n gɔ̀nvaʔaga jɔli n le mii césaligi na, níì mii kpɔ́ɔmi kéle n yaʔa támiigi ni.

¹⁶ Mii nyapiiyi n nyɛ́nɛgɛ nyɛnigi báriga ni, kùúw nyímɛ i nyɛ mii nyapiikoriyi na.

¹⁷ Bi gi taa peemɛ ga nyaa mii kɔ́yi na í, a mii nyɛ́ɛrigi pye làla o làla fɔɔnrɔ fun.

¹⁸ Ee tára, mɔ a kɔ́ mii sìsyaanw tɔ́n í, mii sùpiiwáari sáā syée sìnyére ni!

¹⁹ Alí tɔ́ɔliw ni, séerafɔlɔ i nyɛ mii ma nyɛ̀ʔɛni ni, mii táangi joofɔlɔ i nyɛ yaà ǹjoʔo ma tɛ́ɛyi ni.

²⁰ Mii tàannyɛnbèle i peyɛɛ nyɛ́nɛ mii na. Kolocɔlɔɔ má si mii nyɛ́ɛri ní nyatinmɛ ní.

²¹ Ki n yɛlɛ wi jée syɔɔn ní Kolocɔlɔɔ níngi ni àmɛɛ gi kpéʔele syɔɔn ní wi syɛɛnnyɛnnɛ nínge ni lè.

²² Níì cán mii sìíw yɛ̀ʔɛlɛ nyɔ́ɔ i nùuní ge tɛɛ̀laʔali na n kwɔ́ɔ, mii si kólogi láa bi kári beè lè mii a ní yìri yaà bi lúru pan í.